Hunthar Veng lei tlahniam a pumpelh theih
Kum tam tak Hunthar Veng lei tla hniam leh tawlh reng mai hian harsatna Aizawl tan mai ni lo Mizoram tan a lo thlen tawh ṭhin a. Kan sorkar leh khawtlang hruaitute lu tihaitu a nihna hi a rei tawh hle a, kum tin kan buai deuh ziah a ni. Kan mithiamte pawhin an endik fo tawh a, a chhan dik tak an la hre chhuak thei lo nge ni, vawiin ni thlengin chhungkaw engemawzat in in leh lo chanin harsatna an tawk mek a ni.
Kan sorkar lam pawhin a awmtirtu hi an la hre fuh thei lo nge, a siamna tur pawisa a tam tawk loh angin an la siam ṭha thei lo zawk? A hriaten an sawi danin a chhungah hian tuihna ṭha tak a awm a, chu bakah a hnuaiah hian pialtlep, lungpher zau tak a awm a ni ang an ti. Helaia tuihna luanna tur (drainage) ṭha tawk siam tur leh lei tawlh check dam nghet tak siam tur chuan pawisa tam tawk a ngai ngei ang. He lei tawlh control tur chuan kum engemaw zat a la duh ang. He lai hmun hi kan kawngpui lun National High Way pawimawh berin a kal tlang reng a ṭul bawk si.
He kawngpui hi kan Airport kawng a nih bakah kan nitin mamawh buhfai leh eitur dang phurh luh-na, insakna bungraw chitin reng phurh luhna kawngpui ber a lo ni bawk si, chhe reng thiang a ni lo. Hei bakah hian Rangvamual thlen dawnah he kawngpui hnawh ṭhin lei tawlh reng a awm bawk. He kawngpui chhe lai pumpelhna tur zawnga siam vat hi kan tih makmawh niin a lang.
Tuna pumpelh kawng kan neih chhun chu Sakawrtuichhun aṭanga P.T.C kalna kawng hi a ni mai a. Hei lah hi full load motor lian kal nan chuan a tlak loh, a chhuk-chho lutuk a ni ang, a chei pawh kan chei ṭha duh lo a ni. Motor lian 407 chin chunglam tan phei chuan kal phal loh a ni lehnghal.
Tunah chuan Mizo zingah pawh kawng zawng thiam engineer fel leh thiam tak tak an awm tawh a. Kan sorkar hian beng sika a ngaihtuah a hun ta.
Rawtna ka han siam teh ang. Rangvamual (Ch. Saprawnga Truck Terminal) aṭanga Ramrikawn (Tuiva-mit) kawng hi zawn ni se. Chhuk chho lutuk awm lovin zal nuam takin a chhuak chho theiin a lang. He kawng hi siam a nih chuan buhfai phur truck lian tak tak te tan pawh a ṭha ang. Khawpui chhung luta traffic tihbuai kher ngai lovin a chhuak leh lam pawh he kawngah bawk hian awlsam takin a chhuak leh thei ang a - a va
ṭha dawn em!
FCI Godown sawn chhuah pawh a ṭul lovang. MZU kawng problem an sawi
ṭhin pawh sutkian (solve) a ni nghal ang a. Kawngpui chhia vanga kan harsatna
ṭhin tak tihkian a nih theih dawn avangin a rang lama kan sorkar tan pawh bawhzui nghal chi a ni e.
- PC Lalthlamuana (MCS Rtd), Zarkawt