National award to the teacher

Zirtirtute ni a zirtirtute chawimawi phu tak maiin chawimawihna an han dawng hi chu a ropuiin an lawmpuiawm tak zet zetin ka hria. Zirtirtuah hian ṭhangkhat lian zet ka lo ṭan ve tawh avangin hre vek lo mah ila, tawnhriat a mual mual te ka lo nei ve a.

Khawvel sawrkarah hian Russia leh Israel te khuan zirtirtu zah chu an tina ber awm mang e ka lo ti hial
ṭhin. Kan Lal Isua pawh kha zirtirtu an ti ngat a ni. India ram rau rauah pawh hian Mizoramah hian zirtirtu kan en dan hi a sang vak lo emaw chu aw ka ti. Teacher's Day-ah chauh lo hi chuan zirtirtute hi kan chawimawh lo a ang hle. Agra-a kan training laiin Cinema Hall-ah ticket la turin kan intlar a. Police pakhat a lo kal a, zirtirtu i nih chuan intlar ve a ngai lo, va la tawp rawh min rawn ti a. Midang intlar put pawh chuan "ani kha chu zirtirtu a nih kha" tiin min lo kian zung zung a. Ka ṭhiante nen chuan tihian kan ti a, "Kan ramah chuan zirtirtu a nih kha" tiin min kian kher awm si lova kan ti ru sap sap a.

Thingtlanga zirtirtu nih leh khawpuia zirtirtu nih pawh hi inang lo tak a ni. Kei takngial pawh hi thingtlangah leh khawpuiah lo thawk kual ve tawh ka ni. Office leh hotute pawhin an hmuh zin leh a va tlatlum awm ve aw han tih tur hi an awm ve ṭhin. Teacher award a dawng ngei ang a, tih rilruk te pawh hi an awm ve
ṭhin nia.

Chutihlaia, mahni hnaa rinawm tak sikul pawh tlai ngai lo, a hun taka sikul a hmuh tura awm zat zat, office leh hotute laka langsar ve lem lo, chhuanlam nalh tak tak siama sikul ṭhulh ngai lo te hi chu hriat hlawhah chuan an ṭang lo viau lawi si hian a lang. Tuifawna hnimtu nei ve lo zirtirtute hi chuan a ngai ngaiin an thawk tlawk tlawk mai zawng a nih mai hi maw.

In en hran: Hindi Teacher te chungchangah pawh hian in enhranna a awm emaw chu aw tih loh rual a ni lo. U.T. kan nih aṭang tawhin National Award For the Teacher tihah hian an hming hmuh tur a la awm miah lovin ka hria. Zaithiam, hla phuah thiam leh lehkhabu ziak thiam, central sawrkar pawhin lehkhabu a ziak ṭhat avanga nuai tel an pek te pawh an awm ve a, tui a fawna hnimtu a neih ve loh vang em ni ta ang le!

Middle School leh Primary School zirtirtute chu sawrkarin an RR siamṭhat a remti a. Qualification a phut angah khan an condone hmiah mai a. An lawm a, kei pawhin ka lawmpui takzet a, nihliap khat hnuaia awm ṭheuh ṭheuh Hindi Teacher te chu siamṭhat ve a, condone ve an dilna chu hnawl sak bik an ni - tun hmaa America a mi hang an en hran ang mai kha emaw ni le? a tih theih rum rum mai.

India rama awm, India pawisafai leh mamawh engkim India ram aṭanga lam, form fill up-ah Indian intih kuau si hian India constitution-ah meuh pawh Hindi hi India
ṭawng atan hman a ni ang tia an ziah 14th September, 1948 a ziah luh a ni. 26th January, 1950 aṭanga hman ṭan a ni a, chuta Hindi zirtirtute chu enhran a ni em? Hotute pawh hian inenfiah a ṭha lo maw? Committee hrang hrangah Association hotute koh khawm an nih hian koh hmaih a ni bik ṭhin em? Entirnan Bawrhsap-ah kum tin Teachers Day hman dan tur an duang ṭhin a, Association hruaitu hrang hrang kohkhawmah hian koh an ni ve ngai em? Sawrkar pawmpui pawl an nihna hi kan haider sak ṭhin em le!

Pu Tawma In: Thawnthu kan chhiar ṭhin, inenhranna hrehawmzia te kha kan hriain a rinawm. Chuvangin, pheikhawka hling awm chu a buntu chauhin a hre ṭhin tih ang mai a ni dah ang e. Kan tuar ve loh avanga inngaihsak loh mai hi chu a dik dawn em ni? Ṭhiante pumna chu a tuar a nuam bik tih ang lek fang a ni mai lo maw? Kohhran upa hotu tamna Education Department hian kan tarmit hi i tifiah deuh ang u.

Phung Sikula kal hauh si lo, phung hawrawp nih leh nih loh pawh hre hranga rinawm lo ten phung hawrawp kan tihte hi in hmuhsitna chikhat a ni mai lo maw! Pu Rokunga'n hnamdang hmusit mai lova, thian a sawm zawk tura min chahna hla te kha a mawi asin. Kan khaw hawi tih zau hi kan va ngai zawk em. Indian ni reng si, ni lova inngaih tlatna te hi a awm dah ang e. Mahni nihnaa chiang lote hi kan lo awm palh ang e in bihchian a ṭha lo maw.

- C. Darlianthanga