Group A hi tam hle mai se kan ti maw?

'Kum thara sawrkar ngenna pathum' tih ka ziahah khan group A officer kum tin lak ṭeuh ṭhin hi kum thum kum li danah tih ni tawh se, tih kha ka sawi a. Mahse, kei aia fing leh ram hmangaihtu zawkte’n group A officer kan la tlem thu leh hnawhkhah a ṭul thute an rawn sawi leh si a. Chu mai bakah, hetiang lam thu hi mimawl leh zirchianna nei lote’n lo ar mit ṭet khuanpui ve vak vak loh tur, tih lam hawi deuh khan an rawn sawi bawk si a. "E… a lo ni maw. A va zahthlak ve," ka tih rualin, ngaihdan mawl tak erawh chu ka la nei tho.

Zir san viau leh zir chian vak pawh ngai lo, mi fing uchuak tak ni ve kher lo pawha kan lo hriat ve theih chu–kan ram zau zawng area leh kan ram mihring tam lam population zat hi a ni. Chu bakah, kan sawrkar hmalak dan te, sawrkar hnathawkte chet vel dan te, mipui nunphung leh khawsazia leh kan ram inrelbawl dan boruak velte hi kan hmu pha ve vek tho a. Mihring pung chak si lovin sawrkar hnathawk pun chak thu te, hna ṭha aia mi duham pun chakzia te, hmasawnna tluantling aia eirukna tluantling pun chakziate hi kan hre thei ve tho a ni.

Sawrkar hnathawk tam lam hrim hrimah chuan mi state aiin kan ramah an tlem zawk ngei ang. Mahse, mithiam hoten in chhut danin, a mihring tam lama tehin kan ramah sawrkar hnathawk an tam lawr lak a, an hlawh tam lawr lak bawk in ti ṭhin a ni lawm ni kha? Hmasawnna hna thawhna tur let tam tak sawrkar hnathawk enkawlna leh an hlawhah a kal ṭhin tih in sawi ṭhinte kha tak tak niah kan lo ngai asin.

Administrative district 11 ngawt kan nei pawh hi, 'em ema' kan ti tawh a, mahse, kan ram inkalpawhnate a buaithlak em avangin a pawi lo ve, kan ti hram a ni. Nakinah chuan khaw 4/5 lek lek hian district nih an la phut ang a, veng 2/3 enkawl tur hian development block kan la siam ang a, mihring sang thum vel awp turin administrative sub-division-te kan la nei ang a, police lamah, veng 3 vel vil turin SDPO-te an la awm ang a, engineer lamah ni se, veng 2 tan EE enkawl turin division kan siam ang a, veng tinah SDO an la awm ang a, khaw 3 vel huamin SE enkawl tur circle-te kan la nei mai lo ang tih pawh sawi theih a nih tak loh hi. CE lah kan ngah tawh, E in C an ti. Lal dan indawt tur dang pawh an la ngaihtuah chhuak leh mai thei a ni.

Chutiang bawkin department dang pawh bial zim te te leh mihring tlem te te hi officer hautak pui pui hian an awp a, an intheisem vel mai mai ni ber hian kei thil hre zau lo hian ka lo ngai ve ngawt bawk ṭhin a nih hi.

Kan state aia let tam taka zau leh keini aia let tam taka mihring tam zawkte pawh hian Chief Minister pakhat, Governor pakhat, Chief Secretary pakhat chauh nei chung hian engtin nge maw sawrkar hna an thawh bik le? Buai chuang miah lo leh hmasawnna ropui tak tak thawk tur hian eng power leh eng magic nge maw an hman bik le? State danga officer ni tawhte khan min han hrilhfiah teh u khai.

Kan ramah officer kan la tam tawk lo, titute thlirna tlang hi chu high class dinhmun aṭangin, luxury seat-a ṭhu chungin, high power glass tarmit vuah chungin a nih hmel.

Officer leh officer lo post hi hnawhkhah lohvin a awm lo, kan ti lo va, kan ram dinhmun thlirin, sawrkar hnathawk size hi tite-in, hlawk zawk leh ṭhahnemngai zawka hna thawh i inzirtir ang u, kan tihna a ni e.

- K. Hmingthankaia