Midang ngaichangin lirthei i khalh ang u
Kan khawpui a lo chep ta hle mai. Lirthei nei kan tam ta viau a, chutih rualin kawng a zauh belh emaw a tam belh chuang si lo. Inti palh kan awm ta fo mai a. Chuvang chuan midang ngaichanga lirthei khalh tura in hrilh hriat hi a vei-awmin ṭan a ṭul hle.
A bik takin two wheeler intai palh emaw kawng nal avang emaw lung ṭhila tleng palh vanga accident kan tam ṭhin a. A hun lova motor pelh tum ṭalh te, kawngkawi thlen dawna motor side ngaituah miah lova tlan pelh tum te, traffic jam-ah line fel taka tlan diah diah kara hawihawmna nei miah loa a chep chepa rawn inrawlh ṭalh ching kan tam hle a, a ngai-mawhawm takzet a ni.
Lirthei khalhtu tin hian keimah avangin traffic a jam thei a, keimah avangin ṭha takin traffic jam lovin a tlan ho dial dial theih a ni tih hi vawng tlang ila. Tunlaiah lirthei man a to tawh si, a man chu sawi loh engemaw hlek siamtir pawn cheng 500/600 a zo zung zung tawh mai bawk si. Hah taka tuaka kan lei lirtheite engemaw fimkhur loh vanga a chhiat mai loh nan fimkhur tlan a pawimawh a ni.
Motor khalh-tute pawhin two wheeler-te ken thiam fo hi a
ṭha khop mai. Side pek theihna remchang a awm a pelh min lo dil a nih chuan i kian mai ṭhin ang u. Mahni pawh a ding ngil thei lo ke hnih khalh an ni tih hre rengin an thiamna a ni emaw ni lo emaw chetsual palh hlauh chuan nunna chan mai awlsam lehzualna a ni tih hi hriatsak ila. Chutih rualin lirthei ke hnih nei khalhtute pawhin ṭha taka pelh dilin driver-ten anmahni pel tura signal min pek hma chuan pelh luih hram tum lo ila tichuan kan him tlang lehzual thei dawn a ni.
Khaw pawn kawng-ah fimkhur a ngai lehzual; khaw kar kawngah motor a tlem tih vanga speed san vak mai te, kawng kawia mahni side la lo lutuka tlan te avangin vanduaina a thleng fo ṭhin. Heng hunah hian lirthei khalhtuten engtik lai pawhin motor dang tawk thei dinhmunah ka ding a ni tih vawng tlang ila, mahni fimkhur hle mah ila midang fimkhur loh rah avangin vanduai palh thei vek kan ni si a.
Social media-ah te Mizoram traffic chungchang ziah a awm nual a, chungah te chuan Mizoram driver te hawihhawmzia leh silent city ti a, khawpui dang ang lo taka horn pawh in pe ve tuar tuar lova, line mumal taka tlanho dial dial kan nihzia an pho lang fo a ni. State dang tana entawn tlak kan nih zel theih nan hawihhawm midang ngaichang takin lirthei i khalh hram hram zel ang u.
- Tung Tungi Pu, Electric Veng