MIZO KRISTIANNA HI

Kan Kristianna/ dan hi mithiamte (theologian ngei) hian zir chiang leh se ka ti. Kristian ram ni si he ti em em maia kan hlemhle ta mai hi. Sakhaw dang betute chaw nghei a hunah, tuma hmuh loh pawhin an rinawm ngat ngat theih laiin, Pathian min hmu rengtu betute zawk hian, midangin min hmuh loh phawt chuan kan ti ru in kan ei ru duh reng mai te. Hnam anga kan rinawm lo bik lutuk te hi zir chian ngai niin ka hria.

A chhan a ni thei ang em

a) Kan Mizo nihphungah hahdam leh zál raih d r m kar leka zai ṭhin kha... Kristiannain min luah hunah, music discipline em em mai solfa sak dik lohva lai mai hmangin kan zai ta. Hmanlai zai chu sual ang hialah kan ngai ta. Kan mi hmasaten khuang an paih a, khuang nena zai pawh chu sual angah an ngai zui ta zel mai.

Patea leh CZ Huala leh mi dang dangten Mizo zai leh solfa inkarah nem dep dawpin lengkhawm zai an rawn tichhuak leh ta a. Kan hmang tawp thei ta lo. Harhna thlen leh hlimpui a lo thlenin chumi type chu Pathian pawhin a hmang ta ber mai. Dik lo hlek lai a awm thei em?

b) Hmanlai chuan, in tinin zu an nei, chhiatni ṭhatniah an zu bel an pu khawm a, an zu tlang mai ṭhin. Ṭhalaiten zu an rui ngai lo, an lo rui palh hlauh a nih pawhin nuihzat leh hmuhsit an ni ṭhin. Upate inkawmhlimna a ni ṭhin a. Chu pawh chu sualah kan chhuah leh tho.

Kan hmeichhiate hi chuan hmanlai aṭangin tun thlengin inchhung khurah an tihtur an la chhawm, an chetna hmunhma a changkang ta a ni mai.

Mipa fain tihtur a nei ta lo, ramvah lah zahthlakah a chang zo tawh si, lo lam hna thawh tur a bo tawh bawk si; an tih ber chu awm awla suahsual zir a ni ta ber mai...

c) Pa, inchhung rel thiam chuan, a thawk chhuak a, inchhungkhur tan nu-in zai takin a lo hmang ṭhin. Nupa inṭhen leh broken family
aṭangin nu berin sum a zawn a lo ngai a, sum deh chhuahna nuam leh awlsam a zawng ta ṭhin a. Chumi chuan eirukna, drugs zawrh leh addic, KS leh hlemhletna thlengin a keng tel ta.

d) Camping leh campaign-ah kan hnam a dam zo ta lo. Kohhran mi kan tam tulh tulh a, kan hlemhle tulh tulh a, piangthar kan tam tulh tulh a, kan rinawm lo tulh tulh thung. Pathianin min tihsak tawh lam kan tuipui hle laiin kan tih ve tur lam kan hai der a. Dik lo takin kohhran ṭhenkhatin Missionary Rs 1,000/- a chawm angin kan in chhuah thul. Pathian ni-ah inkhawm kan pung tual tual a, Pathian ni bakah chuan engpawh kan ti hnial lo zo ta a nih hi.

Kan pi pute kha an sakhawmi em em ṭhin. Thing bul, lung bul, lui lian, tlang lian leh kham huai nia an hriat chu an ṭihin an hlau em em a - leiruangtuam leh zawng lu ro thlengin. Chaw an fak leh 'khuatlai' ti in, an hriat loh, lo thlirtu thlengin an chhiah a nih kha.

Kan culture kha Kristianna avangin kan hloh a, culture thar (sap nialnual) Kristian culture-ah hian ṭih tur dik tak ṭih kan thiam lo va, hlauh loh tur kan hlau a, hlauh tur dik tak kan hlau chuang hlei lo a nih hi. Hetianga kan kal reng chuan kan hnam hi boralna-ah kan la in awi liam ngei ang.

He boralna laka kan chhuah-lehna tur hian mithiamte lo zuang chhuak teh u khai... mi thiam rau rauah pawh theologian lam hian kan mamawh tak hi an zir chhuak thei ngei ang le.

- RL Zomawia