MIZO ṬAWNGHMANG TLEM

Tunlaia kohhran leh puipunna hmun danga thu puangtu leh sawitu tam takin sawi ṭul an tihte an sawi/puannaa an ṭawnghmang intihhmuh ṭhenkhat ka lo ngaimawh ruk deuh ṭhin zinga tlemtê chauh han sawi ila.

1. 'A ṭha awm e'

Vantlang hmaa thu puangtute’n mipuite hriat leh zawm atana an duh thu an puanin, 'Hria ila a ṭha awm e,' tiin emaw, 'Zâwm hram hram ila a ṭha awm e,' tiin emaw a tlang an kâwm leh mai ṭhin a. Hei hi mipuite hriat leh zawm atana puan ni si, 'I zâwm hram hram ang u,' emaw, 'Zawm hram i tum ang u,' emaw ti mai lo va, 'I zawm hram ila a ṭha awm e,' emaw, 'A ṭha ang e,' emaw tia a tlang an kâwm leh chauh si hian ṭhahnemngai taka an thu puan kha an chhuah dal leh deuh riau ṭhin. Inngenna mai ni lo, zawm ngei ngei ngai chi thu puan, zawm lote pawm theih lohna tur ang chiahte phei chuan, 'Tur a ni,' tih mai tur emaw a ni ang.

2. 'Ka sawi duh a/Ka'n sawi duh a ni'

Mi tam takin pun khawmnaah emaw, mipuite hriata an sawi duh an sawi zawhin, 'Chungte chu ka'n sawi duh a,' tih an ching hle. Sawi duh neihte sawi zawh hnu a, 'Ka sawi duh a,' la tih chauh hi a ṭawng chuang ang reng hle. Tin, 'Chungte chu ka'n sawi a ni,' tih leh kher pawh hi a chuangtlai tawh angreng a, thu sawi a tinawi a, a ṭawnghmang haihchhamthlak deuhin a lang ṭhin a, pumpelh theih atan a ṭha hle.

3. 'An tia ni'

'An tia ni,' tih leh, 'An tih chu,' tih ṭawngkam hi tun hmaa tlangaute khawlaia an au ṭhin laia an thu tlangkawmna ṭawngkam ṭhin a ni a. Tunlaia thu puangtu (secretary)-te emaw tu pawhin, an thu puan tur an puan zawhin, 'An tia ni,' tih la ching riau an awm bawk. Committee thu emaw mipuite hriat tur thu puang si, 'Hengte hi puan tur awmte chu an ni e,' emaw, ‘Khati zawng kha kan puan tur neihte an ni e,' emaw tia a tlang kâwm mai lo va, 'An tia ni,' tih hi chu a veikhawr deuh tlat bawk.

Heng a chunga kan sawite hi kohhran platform-ah hian a zualkai bik a. Veng/khaw tinah hian kohhran hi thu puan kan ngaihthlak tamna ber a nih avangin ṭawng dik kan zirna tur platform pawimawh tak a ni a. Mi tam takte chuan Mizo ṭawng lo piang sual zel pawh hi kohhran an mawhchhiat hle ṭhin. Kohhran hi ṭawng dik lo theh darhtuah an puh hial rêng a, huat theih pawh a ni âwm lo ve.

- PC Hmangaihzauva