A chhe lai siamṭhatu
Isaia bung 58-naah zâwlnei tih tur pawimawh tak kan hmu. Sakhuana an kalpui dan dik tawk loh avanga zirtirna pe turin Pathianin a tir a. Chaw nghei leh chawlhni serh chungchang zirtirnaa ngaih ni bawk ṭhin. Mahse, a lan chhuahna mai chauh a ni, thûk zawkah dik lo a awm. Mipui kal sualna, Pathian lungawi lohna thlentu ber chu mi rethei, rilṭâm, chenna tur nei lo, saruak leh ṭanpui ngaite hre chang hauh lova anmahni hlawkna tur atan chauha sakhuana an kalpui kha a ni.
Miin Pathian a hmangaih chuan a hnen aṭanga thil ṭha, malsawmna chauh beisei lovin, Pathian hnathawhpui, Lalpa hman tlak a lo ni ṭhin a. A hmangaihte pawh hriain a hmangaihpui thei dawn tihna a ni. Mamawhtute tana hna ṭha thawh hi Pathian lawm zawng a ni a, a mite hnena tih tur pawimawh tak a hnutchhiah a ni bawk.
Israel-te duh ber chu Pathian hnaiha awm leh a rorelna fel tak hnuaia awm a ni a. An nunah erawh takna hmuh tur a awm hauh si lo. An chaw nghei leh chawlhni serhte chuan Pathian tilawm mai turah an ngai a. Mahse, a pawimawh zawk–felna te, khawngaihnate leh rinawmnate chu an hlamchhiah tlat si (Mat. 23:23). Pathian rorelna dik tak hi an dil anga hmu mai tur chu ni se la, thiam loh chang zawk tur an ni ngei ang. He laiah hian ringtute tana inenfiahna tur a awm, rorelna dik leh fel tak ni lovin khawngaihna zawk dil mai tur kan ni ang em?
Chaw an nghei a, an lungawi chuang lo. Pathianin an ngaihtuahna a hria – malsawm nih an duh avang mai chauha ti an ni. Inthawina aia thuawihna duh zawktu lung an tiawi zo tlat lo. Pathian chu engkim siamtu a ni a, a thilsiamte chunga thu neitu a ni bawk. Chu chu hrethiam lovin a thilsiam, mihringte’n an tih ve hmanga chettir an tum kha a dik lo va; an âw kha chung lam aṭanga hriat tlak a ni thei ta lo a ni.
Pathian chuan rorelna dik lo avanga tuar te, mi hnuaihnungte leh eng eng emaw salbeha awm mekte tana zalenna siamsak hi a lawm a. Rilṭâmte hnena ei tur pek te, chenna nei lo leh saruak tuamhlâwmte leh ṭanpui ngai apiang tlânchhiatsan lohte hi a mite tih atan a duh tlat. Phurrit insiam tawn te, ṭawng huatthlalate leh indem tawnnate hi a bo va. Tlai leh puar taka inhmangaih tlang tak leh indawm tawna kan awm chuan Pathianin kan ṭawngṭaina leh au thawmte chu a lo ngaithla ang a, kan tana ṭanpui vartu hnai reng a lo ni thar leh thei ang. Hei hian malsawm kan nih lehna tur a entir a, kan dil ṭhin ang taka Pathian awmpuina leh kaihhruaina chan a kâwk bawk.
Mi felte chu harsatna karah pawh nun duhawm zawk nei zel thei turin Pathianin a venghim tlat ṭhin. Taksa leh rilru hriselna te, hausaknate leh Pathian rinawmna tâwp chin nei lote chu an chanvo a ni. An vanneihna pawh anmahni aṭanga chhuak chu thil ṭha hlir a lo nih tawh dawn avangin, ‘A chhe lai siam ṭhatu’ nihna chanvo ropui leh hlu tak an chang ang. Chung lam aṭanga malsawmna a ni a, mawhphurhnain a chhunzawm tlat thung. Pathian duh dan ang taka hna ṭha thawktute nihna niin thiltihtheihna leh chakna ropui tak nei a ni bawk. Ram leh hnam dintu, mi dangte tana malsawmna leh mi dangte’n lei rem an lo rah ve theihna tura Pathian hmanraw ṭangkai tak nihna a ni.
‘A chhe lai siam ṭhatu’ tih hi ringtu zawng zawngte chanvo a ni a, Pathian duh zawng leh kan tih tur dik chu kan hre thei mai âwm e. Thinlung lam en zawk ṭhin Pathian neitute kan ni a, sakhuana leh mihring aṭanga kan tih ve lam aia pawimawh zawk, Pathian lawm zawng zawng thiam ila. Pathian ṭihna te, thutak te, felna te, hmangaihna te, khawngaihnate leh rinawmnate hi Pathian leh a thilsiam zawng zawngte hriat thamin keimahniah ṭheuh hian chhawm nung thar lehin, rawngbawlna dik hlân ila. Lal Isua rawngbawlna ki pui ber pakhat chu mimal nun leh, ram leh hnama danglamna ṭha zawk thlentir (Nazareth Manifesto–Luka 4:16-20) hi a ni tih hre rengin, a chhe lai siamṭhatu nih hi i tum zel ang u.
‘Father of Modern Missions’ tih hiala khawvelin a hriat lar William Carey-a kha India rama chanchin ṭha hril tura koh a nih angin a lo kal a, a rawngbawlna tur hmuna mite mamawh a hriatna chuan rawngbawlna zau zawk neihtirin, India rama hmeithai hâl hlumna dan (Sati) chu December ni 6, 1829-ah chuan tihtawp a lo ni ta a, nunna hlu tak chu chhanhim a lo ni ta. Hei hi danglamna ṭha zawk chu a ni a, hetiang hian khawvel hian ringtute tel vena hi a hre thei ṭhin tur a ni dawn lo’m ni?
- H. Lalroluahpuia