ZU - KELKANG - YOGA

Tunlai kan rama boruak sawi hlawh tak, Zu, Kelkang harhna leh Yoga chungchangah hian media hrang hrang - chanchinbu, facebook leh whatsapp ahte kan hmu zing hle a. A sawitute mizia tur awmang leh sakhuanaa an nihna pawh a hriat theih hle ṭhin.

Zu zawrh phalna sawi mawia Kohhran (Krista taksa) sawisel nuam ti tak tak te, kan Kristianna atana hlauhawma Kohhran Hruaitu Committee pawhin a ngaih Yoga pawh sawi mawi ngar ngar, Kelkanga Thlarau Thianghlim harhna chhimtute sawisel chak em em an tam hle mai. Heng zinga mi ṭhenkhat chu khawvel thilah chuan hre zau tak tak pawh an ni ang, hre berah pawh an inngai hial niin alang.

Amaherawhchu, khawvel thilah pawh hre ber an ni lem lo a, kan ram leh hnam, a mi chengte pawh hmangaih bertu an ni lo. A chhan chu mipui leh Sorkar thlenga an hruai tumna leh duhna ngaihtuah hian a hriat a ni. An sawi tam leh sawi nat anga miin an sawi duh loh avang hian an hre ber a ni chuang lo a, mite an hneh ta tihna a ni hek lo. Ṭhenkhat phei chu ka lo ngaihsan em em ṭhinte an ni a, amaherawhchu thlarau nun khawih thila an thu leh hla han hriat hnu hi chuan anmahni ka hmuh danah ngaihtuahna thar min neihtir dawn chu a nih hi.

Kan ram hi Isua Krista Chanchin Ṭha avang chauha enna hmu ve ta kan ni a. A, AW, B pawh la nei lo, ramhuai hnena inthawi ṭhin, Silchar thlang lamah mihring an awm ve tih pawh hre lo kan nih laiin khawvel hnam fing Sapho hmangin Pathianin min rawn zawng chhuak a. A, AW, B min siamsakin hun reilote chhungin khawvel eng min hmuhtir a, Kristian ram tih theihin kan lo awm ta a ni. Tunah phei chuan khawvel ram tinah kan inzarpharh ve ta a nih hi. Hemi avang ngawt pawh hian Zoram hian a siamtu hi a thlahthlam tur a ni lo a, a zuitu Kristiante hian an zui Lal Isua duhdanin an nung tur a ni ang.

Kristiante lehkhabu thianghlim chu Bible a ni a, a chhungah mihring khawsakna atana ṭha leh ṭha lo a chuang vek a ni. Zu ṭhatlohzia tam tak a awm bawk. Kohhranin a duh lo chungin Sorkarin zawrh phalna a pe lui a, Kohhran tan tih theih a awm lo a, Chanchinbu lamah a duhtu lam lah hian Kohhran an la vaw salh salh mai a. Kohhran lam lah Beram a hmul mettu hmaa a ngawi reng angin a ngawi hmiah mai. Mahse Pathianin a mite a hum tlat a, a duh lohzia chu a lang zel a ni. A ṭha titute hian sawi sawi mah se Kohhran tan chuan zu zawrh hi phal a ni ngai dawn lo a ni. Bible ringtu kan ni tlat si a.

Yoga pawh a lan danah mai chuan pawi vakin lang rih lo mah se, Hindu sakhaw thil a nih tlat avangin a hlauhawm a ni. Hriselna atana a ṭha an ti a, mah se Yoga hi doctor-te hian min chawh ngai lem lo chu a nih hi. Kan ram hi kan inen chian a ngai a, kan Kristianna tidazattu, thlarau sual hnathawh sawimawitu kan va tam ta em!

Zu leh Yoga-in kan ram a run lai hian kan beisei phak loh, Thlarau Thianghlim tihharhna chu Pathianin Kelkang hmunah min rawn hun sak a, kan vannei hle mai. Sum leh pai tam tak sen ngai mah se mimal, chhungkua leh Kohhran, khawtlang thlengin damna kan chang a, kan tih theih ni hauh lo Pathianin a mi khawngaihna vang liau liaua a hnathawh a ni. Hetih lai hian sawiseltu group chuan sawisel tur an la zawng reng tho. Kaihhruaina lam pawh ni lo, tehnate an lo hmang rawl nen, Bible-in, ‘I tehna ngai bawkin an teh ang che’ tih te, ‘teh kherin thlarau a pe lo’ tihte hi i hre teh ang u. Tumah i teh tling lo ang.

Kelkang khawtlang dinhmun harsatna hriaa Sorkarin a chhawmdawlnate pawh kan la sawisel ta zel a. A khawtlang leh pantute hi mipui an ni a, Sorkar chu mipuite tana ding a ni a, an tihawm tak an ti a ni. Mi ram, Kristian ram tia sawi pawh ni lo zawhah pawh mipui punkhawmna a nih avangin inkhawmpuina hmunte hi Sorkarin a umzui zawk ṭhin a ni.