State Day of Prayer: 20th February, 2025. 11 AM to 4 PM Lammualah Mizo hnam pum ṭawngṭai beihpui
Tun February 20, 2025, Ningani hian AR Lammualah kan ram hi Pathian lalna ram a nih theih nan ‘I ram lo thleng rawh se’ tih Matthaia 6:10 thupuia hmangin ram pum huap ṭawngṭai beihpui chu State Day of Prayer Committee chuan a buatsaih leh ta. Nikum khan Pathian hruainain hlawhtling takin sual thupha chawi ṭawngṭaina kan lo nei tawh a, kan ram pum tan a ni. Sorkar hmalakna a ni lo va, rinnaa hmalakna a nih avangin a senso tur pawh mimal tinte inpeknaa innghat a ni. Committee-te ngenna angin kan CM hian State Day of Prayer patron-ah min ṭansak a ni.
Hemi ni hian Mizorama khua zawng zawngah leh Zoram pawn–khawvel ram hrang hranga Zo fate chenna hmun tinah kohhran pawl bik sawi lovin, political party leh NGO zawng zawngte’n inlungrual tak leh inngaitlawm taka he ram pum ṭawngṭaina hi hmun remchang siama lo zawm ve turin a buatsaihtute’n an ngen a ni.
Tun ṭumah hian kohhran hrang hrang aṭanga zaipawl infin mi sang chuang zet tura beisei zaipawlpui chuan Lammualah Pathian fakna hla an rem dawn. He ram pum ṭawngṭainaah hian kohhran hrang hrang an inhawng zau hle. Mizoram Kohhran Hruaitu Committee (MKHC) leh Council of Churches in Mizoram (CCM) pawhin min hriatpuiin, ṭhahnem an ngai khawp mai. Kan ramah Pathianin lalna a chan vek theih nan political party hrang hrangte pawhin an lo ngai pawimawh hle. Tlawmngai pawl NGO zawng zawngte leh Zo fa ringtu mipui zawng zawngin Lammual bakah kan awmna khua zawng zawngah hemi ni hi Pathian hnenah lawmthu sawiin, kan sualte thuphá chawiin, kan ram sorkarah te, office tinah te, sumdawnna leh eizawnna hmun tinah te, zirna hmun tinrengahte leh kohhran zawng zawngin Lalpa hnena ṭawngṭaina nia hmang turin inhlan ṭheuh turin kan insawm a ni.
Tichuan, hnam pum inlungruala Lalpa fak leh kan sualte min ngaidam turin kan ṭawngṭai mup mup dawn a. Lalpa thutiam 2 Chro. 7:14-a mi, “Ka hming pu ka mite chuan inngaitlawma an ṭawngṭai a, min zawn a, an awm dan sualte an hawisan chuan, van aṭangin ka lo ngaithla ang a, an sualte ka ngaidam ang a, an ram chu ka tidam leh ang,” tih thutiam hi tun thleng pawha khawvel ram ṭhenkhata a thleng angin, Lalpa hian Mizoramah pawh min thlensak ve ang tih kan ring tlat a ni.
Hun hman dan tur tlangpui
Chawhma lamah Committee chairman Rev. Dr K Thanzauva’n kaihruaiin, CM Pu Lalduhoma’n thu a sawi ang a; chawhnuah working chairman Pu F Rodingliana kaihhruaiin, Frederick Lalrindika’n thu a sawi ang. Chawhma lam leh chawhnu lamah mipui ṭawngṭaihona vawi thum ve ve a awm ang a, zaipawl an zai ve ve bawk ang. Political party MLA nei chinte aiawhin short speech an nei ṭheuh dawn a; ṭawngṭai thupui tur ziahna leaflet a hmunah sem a ni ang.
Zo fa ringtu mipuite’n he ni hi inngaitlawm tak leh inlungrual taka a huhova Lalpa hmaa kan kûn ho ni-ah hian kan zavaia tel vek turin Committee chuan mipui min ngen a. Kan dilna tlâwm tak chu Lalpa’n min tihhlawhtlinsak ngei ang tih pawh i beisei ang u.
- Dr PC Biaksiama,
General Secretary, SDP Committee