Fuihpawrh theih sawrkar hnathawk

Pastor pakhat chuan ti hian thu a sawi a, "Sawrkar hnathawkte u, Pathian ṭih dêk chungin in sawrkar hnathawh hi thawk teh u, tichuan, Pathian malsawmna dawngin nun nuam tak leh hahdam takin in dam lai ni hian in awm dawn nia. Dik lo tak leh hamhai taka in thawh chuan in chhungkuaah lungngaihna chhûm a rawn zing ang a, in penson hnuah pawh natna khirh takin a tlakbuak zui ang che u tih a hlauawm a ni," tiin.

Tunlai hian Mizoram sawrkar chuan a hnathawkte chu zing lamah a hun dik taka thleng tur leh tlai lamah pawh a hun dik taka bâng turin a ti a. Hei hi sawrkar hnathawkte awm dan tur ni sa a ni a, an zawm ngei tura beisei sa leh an chanvo dih tak a ni. Nimahsela, eng emaw harsatna nei thei vek kan ni a, kum tluana zawm theih vek chu a ni lo ang. Amaherawhchu, inthlahdah kumtluan tur chu an ni lo. An eizawnna leh an hlawh lakna a ni miau si a.

In sain emaw, thil dang eng emaw thawk turin hlawhfa ruai ta la, i hlawhfa rawih kha a duh hun hunah lo kalin, a duh hun hunah haw se la, a hlawh chu ni khat hlawhfa lak ang tho lak tum si se la, i lawm an gem? Rawih nawn zel i duh ang em? Chu lo pawh chu, i hlawhfa rawih khan, "Vawiin chu mitthi inah kal ka ngai tlat mai, tiin emaw, vawiin chu inneihnaah kal ka ngai tlat mai," tiin chawhnu lamahte haw daih fo mai se la, a hlawh pangngai hlawh tho tum si se la, i lawm ang em?

Kan hriat ṭheuh angin Mizoramah hian sawrkar hnathawk fel tak tak an awm rualin, ṭhenkhatte hi chu an zawmthawin an inthlahdah em em ni tur a ni. Sawi leh selna pawh hriat tur a awm fo. Thingtlang lam aṭanga office dawr tura kalte pawhin an mi hmuh duh ber hmu thei loin ni hnih ni thum an châm phah thute pawh kan hre fo a nih hi. Office an kal tlaiin an haw hma em em tihte a ni. Chutih rualin, chhunah ni se, mo lawmin leh mitthi inah a kal tia chhuak bo sawi tur a tam hle bawk. Anmahni sawrkar hnathawkte chauh pawh ni loin, mipui hrim hrim pawh hian mak tihna leh dan lo angin an awm tih pawh kan hre tawh lo hial a ni.

Hetia sawrkar hnathawkte chunga Mizoram sawrkarin dan a lekkawh takah chuan mi ṭhenkhatin sawrkar hnathawkte fuihpawrh tum ni awm takin, "Sawrkar hnathawkte an nêkchêp, sawrkar hnathawkte an zalen lo," te an ti a ni awm e. Sawrkar hian a hnathawkte hi a nêkchêp rêng rêng lo a, an awm dan tur ni sa kha an zawm theih nan dan a lekkawh mai a ni zawk a ni.

Chuvangin, nangni sawrkar hnathawkte u, fuihpawrh theihin awm reng reng suh u. Kan Pathian thu pawhin, "Hna thawktu chu ei tur hmu tlak a ni," (Matthaia 10:10) a tih kha. Nangni pawh hlawh hmu tlakin, kan ram leh hnam tan thawk rawh u. Sawrkar hnathawk pakhat chuan ti hian a ti a, "Hlawh kan lak ni hi chuan ka hlawh hi tam ka tiin ka hnathawh nen hian inphu ka ti mawlh lo, ka hlawhah hian ka lungawiin a tam ka ti hle a ni. Ka hnathawhah hian zawmthaw taka thawh chi niin ka hre lo," a ti. Chuvangin, sawrkar hnathawkte u, in vanneihzia hi hre nawn fo u la, lawm hle mai teh u.

Mi ramah sawrkar hnathawkte’n eng angin nge an thawh ve tih leh sawrkar hnathawh hi an châk em tih chu ka hre lo va; mipui nawlpuiin an sawrkar hnathawkte eng angin nge an ngaih tihte pawh ka hre hek lo. Keini ramah hi chuan sawrkar hna thawh hi kan châkin kan ngaisang em em a, kan inchuh ruih ruih mai a nih hi. A thawk ve lote hian sawrkar hnathawkte chu vannei tiin, thawh ve châkin chilthli tla zawih zawihin kan thlir a ni ber mai hi. Sawrkar hnathawkte hi bêlte phai thei lo hmu ang hialin kan ngai niin ka hria.

Chuvangin, nang ni sawrkar hnathawkte u, in vanneihzia hi hre teh u. Ni sa leh ruahpui hnuaia ni tina kut hna thawka ei zawngte hian an awt teh mai che u a nia. ‘Keini zawng kan chan bik hi kan vannei hle’ tih hla hi sa veng veng chunga hlim tak leh taima taka thawk mai tur chu in van ni em. Tute fuihpawrh theih sawrkar hnathawk nih tum lo hram ang che u.

- Hausanga Hauzel