Nawchizuar Lane-ah ka puang e

Aizawla kan hmun lun lai leh laili ber lai, Vanapa Hall aṭanga Zodin thleng hi Open Red light, (Nawh­chizuar lane) area a ni tih mi tam takin kan hre ngei ang a. Helai hmun hi a tlai tulh tulh a, a lun tulh tulh a. Mizo hmeichhia, powder paw tak taka inhnawih, sexy thei ang bera incheite zan tuallenna ber a ni. An sumdawnna hmunpui a ni bawk.

He sumdawnna rapthlak takah hian Taxi driver ṭhenkhat chu a meizanghlaptu ber an ni a, hmeichhe inzuar mai ni loin mawngkawhur inzuar eng emaw zat an awm reng bawk.

Helaia ualau taka inzuarte hian dawrtu an haihchham loin, an inhralh seng lo lam zawk mah a ni. Inzuarte in hralh haw lam nghakin Mizo tlangval leh Mizopa eng emaw zatin an nghak reng bawk a. A ṭhen two wheeler-in an lo kal a, a ṭhen car leh motor nalh tak taka hmeichhe lei tuma rawn kal hi an ṭhahnem viau ṭhin.

Vai eng emaw zat­in ke leh motor-in Mizo nula lei tur an rawn zawng ve reng bawk.

Hetianga ualau taka inzawrhna hi a hmu chiang leh hmu nitin zantintu chu, Assam Rifles-te an ni a, anni pawh hian an dawr fo bawk. KS dawrtu zingah pa pangngai hmel tak tak an kat nuk bawk. Zanah reilote va ṭhu chawl ve chhin la, mihur inzuar demand sanzia i hai lo ang.

Kelkang boruak san lai tak pawh hian demand leh supply hi a sang viau tho; a taka hmuh a hriat chi a ni.

Helai inzawrhna hmun hi sawrkar pawhin a hria a ni ang, Police an duty kual tir ṭhin a, khawm chang pawh an nei fo mai. YMA duty an kal deuh fo bawk a, anni pawh hian han khawm deuh rap rap chang neiin, Home-ah te an nam liam fo a ni. Mahse, inzuarte taimakna leh hratna hi sorkar chakna leh YMA tha pawhin a hneh lo tih chu vawiinah chiang takin kan hmu.

Ka sawi duh chu, Veng tin leh Kohhran tin te, Pathian Thlarau Thianghlim changa kan hlima kan lam luih luih lai hian, heng mi lepchiah, mi tihmawh, mi harsa, pawisak nei lemlo kan unaute hnen thleng phak khawp hi Thlarau Thianghlim chang ila a va han duhawm tak em.

A inchhawk pawh­in Kohhran Ṭhalai leh YMA branch te pawh hian zan khua khuain rawng inbawl chhawk ila. Kohhran hlim tak takte kut hian anniho hi va ban phak thei hram sela. Synod pawhin zirchiang ringawt loin, a hmunah a taka ke pen chhuak turin programme siam se. Tunah hian kan tlai lek lek tawh a ni.

Kan khawpui lun­­lai ber inti tatute chhan­chhuak tura hun tiam chin awm lek loa pawl ang leh mimal anga beidawng loa kan thawh chhuah thuai loh chuan an thisen mawh hi kan phurh ngei ka ring tlat a ni. Hawh teh u, zanin aṭangin i ngaihven ṭan ang u, a rapthlak e mai.