Inkhawmpui puala pawisa thawh

Kar hmasa mai February ni 13-16, 2025 chhunga Lunglawn, Lungleia MṬKP inkhawmpui rorelah khan MṬKP inkhawmpui puala ṬKP member tinin kum tina pawisa an thawh ṭhin chu Rs. 50-ah tihpun an rel tih ka lo hre ve a. A ṭha ka va ti tak em.

Vanglaini-ah ngei kan chhiar tawh angin, MṬKP inkhawmpui pualin, a thlengtu ṭanpuina atan kum 2015 aṭang khan ṬKP member tinin kum tin Rs 10 an thawh tawh a, kum thum chhung an kalpui hnuah kum 2018 aṭangin a leta tipungin Rs 20 kum tin an thawh leh a. Cheng 20 chu kumin 2025 aṭang hian a let aia tama tipungin, cheng 50 an thawh leh dawn ta a ni. ṬKP-te hi an 'advance' riau tlat mai!

Member tinin kum tin Rs. 50 zel an thawh chuan member pakhatin MṬKP inkhawmpui vawi khat atan (kum 3 chhungin) Rs. 150 an thawh dawn tihna a ni a. Member zat (thawh lo an awm theih avangin a tlem lamin la ta ila) 50,000 angin chhut ta ila, MṬKP inkhawmpui vawi khat atan Rs. 75,00,000 an thawh khawm dawn tihna a ni. Kumin 2025 MṬKP inkhawmpui thlenna atan khan budget cheng nuai 70 chuang hret an nih thu tarlan a ni a; chuti a nih chuan, member-te thawh khawm hian a daih zãn dawn tihna a ni.

Hetianga ṬKP-te'n an inkhawmpui lian ber puala pawisa an thawh khawm hi a ṭha ka ti tak zet. UPC (Mizoram) hnuaia PYD pawhin an inkhawmpui lian pualin member tinte a zat tukin pawisa an thawhtir niin ka hria. Hetianga ti ve dang kohhran ṭhalai pawl dang pawh an awm mai thei e.

Hetih lai hian Mizorama kohhran ṭhalai pawl lian ber KṬP erawh chuan an inkhawmpui lian ber general conference thlenna senso atan an member tinte tuk zat neiin pawisa an la thawhtir ve lo! KṬP pawh hian ti ve thei se a va ṭha dawn em.

KṬP-ah hian member 1,70,000 chuang an awm niin an sawi. An general conference pualin KṬP member tinin Rs. 20 pawh thawh ve ta se, thawh lo awm palh theiah mi 1,70,000-in thawh angin chhut ta ila, general conference vawi khat atan kum hnih chhungin Rs. 68,00,000 an thawh thei dawn tihna a ni. General conference thlengtu tana hautak leh harsa lutuk ṭhin nasa takin a chhâwk ngei dawn tih a chiang.

Kohhran ṭhalai pawl inkhawmpui lian ber puala member tinin pawisa an thawh khawm hi a ṭha tak zet a, titawp mai lova chhunzawm zel chi a ni. KṬP ngei pawh hian han ti ve se, an inchhir lo ang. KṬP member-te pawhin ṭha an tih a rinawm a, phûr taka an thawh ngei a rinawm.

Thil ṭhaah hi chuan mahni aia tê zawk leh naupang zawkte lo tih hmasak tawh pawh ni se, tih ve mai ngam a ṭha; tih ve duh tlat lohna rilru awm ṭhin chapona rilru vang a ni a, a Pathian thu lo a ni.

KṬP general conference puala member tinin thawh tur zat bituk neia pawisa inthawhtir tur hian anmahni KṬP-in hma an la mai lo a nih pawhin, KṬP neitu Mizoram Synod lam hian hma la se thei se a ṭha ngawt ang.

- Zoramchhana