Zo ṭawng: Kohhran ṭawngkam hi le
Vanglaini chanchinbu chhuak 19.2.2025-ah khan 'Mizo ṭawnghmang tlêm' ('ṭawnghmang' hi inzawm lova 'ṭawng hmang' tia ziah ni se) tih hmanga thu ziah kan lo chhiar a; a bengvârthlâkin a ṭha tlangpui khawp mai. A ziaktu ṭhahnemngaihna a fakawm hle mai; kohhran ṭawngkam bîka hi tlêm ka'n tuihnih ang e.
Kohhran hi Isua Krista din a ni a, a hotu ber (supreme authority) pawh amah Isua a nih avangin Thlarau Thianghlim chên chilh a ni a. Chuvang chuan kohhran thil tih rêng rêng hi Pathian hminga tih anga ngaih vek a nih avangin Pathian zah tak chung leh inthlahrung tak chungin ṭawngkam pawh hman ṭhin a ni. Chutah chuan ṭawngkam nêm hman pawh thu pêk ('thupêk' ni lovin) anga ngaih a ni tho tih hriat a ṭha. Chuvangin, ṭawngkam nêm lam leh hawihhâwm hman hrâm hrâm ṭhin a ni.
Hetiang sawi hi chuan Rev. Rokhuma rilruah a lo lang a. An sawi ka la hriat reng chu: kohhran (hei pawh hi kohhran mal sawina a nih loh chuan 'k' hawrawppui 'K' hman loh tûr) ro rêlnaa Rev. Rokhuma'n, "A ni mai âwm tak e," a tih tawh chuan, kha an ro rêl kha a tlu ngei ngei ṭhin, an ti!
Mizorama kohhran hruaitu hmasate khan ṭawngkam hi an lo hmang fîmkhur ṭhin khawp mai; an hnung zuiin, an lo hman ṭhin dan hi chîn zui zêl a ṭha ang chu. '…ni se,' ‘...âwm e,' '... a ṭha ang e,' adt hman hi kohhran huang chhûngah chuan iai tûr a ni lo chauh pawh ni lovin, a hun leh hmun azirin hman zui zel chi a ni zâwk. Grammar mit aṭanga thlir pawhin a dik lohna a awm lêm lo.
Minister, kohhran upa leh rawngbâwltu dangte hi Pathian khawngaihna vang chauhva 'rawng bâwltu tling' an nih avang te, kohhran aw hi Pathian aw nia kan hriat avang tein kohhran mite chuan kohhran hruaitute thu puan rêng rêng hi zawm nghal duhna rilru nen kan lo châng/ngaithla sa a. Chuvangin, kohhran hminga thu puan, nêm tak anga langte hi Mosia dân (pentateuch) aia a khauh lohna a awm chuang rêng rêng lo. Entir nan, "Hnatlang turte chuan tuthlawh leh chem ken ni se a ṭha ang e," tia an puan hi "Hnatlâng turte chuan tuthlawh leh chem ken ngei ngei tur a ni," tia puan tlukah kohhran mite chuan an ngai tho.
A nihna takah chuan sawrkar (bureaucracy) te, school, college, versity, training institute, adt-ahte hi chuan zawm ngei ngei tur dan tesêp a awm sa vek a, mi â an nih ngawt loh chuan heng thu hnuaia awm zawng zawngte hian an zâwm ngei tûr a ni a, an zawm loh chuan inhremna tling a ni thuai ṭhin. Heng inahte hian kohhran ṭawngkam ang hi hman a nih erawh chuan an dan tesêpte chuan palzam a hlawh phah thei a, palzam a nih chuan inthununna (discipline) a rul phah ang a, hna an thawk hlei thei lo si ang. Hemi dawttu hi sawrkar ni lo pawl (NGO) tiin sawi mai ta ila.
Heng kan han sawi te, Assembly ṭhut khâwmna te leh puipunna dangte aṭanga thu sawi, thu chhuak, thu puanah hi chuan ṭawngkam nêm hman ai chuan Mizo ṭawng dik pangngai leh hman âwm tak kha hman tum zel a ṭha ber ang. Kohhranah pawh, a bîkin, rawng bâwltute chuan Mizo ṭawng hman dan dik pangngai hman kan tum hrâm hrâm dawn nia.
- Dr J.T. Vanlalngheta, Ziah Rûn