GREECE ECONOMY

Greece economy tlukchhiat thu leh chumi nghawng avanga European ram hrang hrang Euro hmang ram 22 bakah IMF leh keini India thlengin a nghawng ṭha lo thlen palh thei chung chang hi BBC, CNN, NDTV, Times of India, India Today, etc, etc ah nasa taka tarlan a ni. Chu ti khawpa khawvelin a ngaihven leh bengkhawn thil nimahse, sawrkar hmalakna kalmek NLUP, Sawrkar hnathawk leh nitin inhlawhfate hlawh leh thil dangahte min nghawng ve lem lo a. Amaherawhchu, globalisation hnuai-ah engkim inkaihhnawih thei vek a nih avang leh hriat ve hrim hrim pawh a ṭul ve tho mai.

Greece economy tlukchhiat dan 2009 ah daih tawh khan Greece Sawrkar chuan Budget Deficit 12.90% zet zep rual loh leh loh theih loha an neih thu a puan aṭangin Credit Rating Agencies - Fitch, Moody, Standard & Poor te chuan Greece Credit Ratings a tihniam thut a, chumi avang chuan investor thar hmuh chu sawi loh investment nei mek ramte leh company-te pawhin hmanhmawh takin puanthuah an tel ta rum rum a. European Union-a tel member ramte hian Budget Deficit 3% aiin a sang tur a ni lo tih inkaihhruaina dan mumal tak an lo nei sa reng a ni.

2010 khan Greece chuan Budget Deficit tihniam turin hmalakna te a han puang ve bawk a, reilote hnuah leiba a neih mekte chu a hun takah a rulh theih loh tur thu a puang chiang ta law law a. European Union ramte pawhin bail-out tumin Euro 240 billion zet sum an puk belh tir a, eng an ang pha lo. An leiba rulhna tur pawh a daih pha chuang lo.

A lo inṭan dan

A hmasa berah chuan, mahni sum lakluh mil tawka khawsak thiam loh chu a chhan bulpui ber a ni. Mimal pawh Sawrkar pawh ni se, sum lakluh mil tawka khawsak rel thiam lo leh ruahmanna ṭha tak leh rulh theih dan tur mumal tak awm loa sum puktu tan chuan a tawpah talbuai leh mualpho palh mai hi a hlauhawm reng a ni.

Greece-ah hian kum eng emaw zat kal ta aṭang khan an rama Party lian pahnihte chuan, ruahmanna mumal awm loin an party mi leh duhsak zawng apiangte chu sawrkar hnaah an thun nghek nghek reng mai a. Report ṭhenkhatah phei chuan Greece-ah chuan mi 5 zelah 1 chu Sawrkar hnathawk zel ang an ni. Tin, European Union ramte pawhin Greece-in puk a dil ang ang chu, eng dinhmunah nge an awm tih ngaih ṭhatlohna nei lem loin European Central Bank, IMF, Germany, France leh Spain ramte chuan sum an puk tir hmiah hmiah mai bawk.

Greece Sawrkar lahin a Budget Deficit chu 3.4% ang vel lek a ni e, tiin report dik lo a lo siam chawp ve bawk a. A tawp a tawpah GDP aṭanga 15% dawn Deficit an nei tih hriat chhuah a nih meuh chuan, phengphehlepa khua a lo tlai zo ta si a ni.

Hengte bakah hian Greece Sawrkar hnathawk kum 45 mi awrh tan pawh Full Pension Scheme neih theih dan a awm avangin hnathawk 75% chuan Early Retirement Pension an thlang ṭhin reng a, hei hian sawrkar chawmhlawm a ti tamin sum a ti hek em em a. Kum 2050 ah chuan Greece population 1/3 zet chu kum 65 chunglam ni tura chhut a ni. Greece Sawrkar Revenue pumpui aṭanga 50% aia tam mah pension hlawh leh 17% GDP chu Pension-ah a kal ral mek bawk a.

January 2015 General Election neih zawh takah khan European Commission, European Central Bank leh IMF ten Pension Reform - Pension kum tihsan, etc rawtnate chu mipuiin an duh loh em avangin, ‘Pension Reform kan namnul ang’ titu party te bawk chu thlan tlin an ni. A tawp a tawpah hmanni lawkah erawh chuan Pension kum hi 2016 aṭang 67 a kal an tum ta. Australia-ah chuan 65 hman mek a ni a, 2035 aṭang chuan kum 70 turin Prime Minister Abbot Sawrkar chuan dan thar a siam. USA-66, UK-65, China-60, India-60, South Korea-55, Japan-61.

Tin, 2012 ah khan pension & welfare benefit dawngtu mi 2,00,000 zette chu dawngtu tur ni lo leh thi tawh an ni tih finfiah an ni. (Thlarau MR kan tih ang hi ni maw). Hei hi tlem tham te an ni an la ti zui leh ta nghal a! (Developed Countries-ah mihring an pun chak loh avang leh an dam rei bawk si avangin, hnathawk thei an tlem a, Pensioner an tam a, sum senso a sang si a Pension kum tihsan a ṭul a, ram mipuite erawhin an duh lem lo. A letling chiah hian Under-Developed/ Developing Countries-ah chuan thil awmdan a ni thung.)

Economy siamṭhat leh dan tur

Engpawhnise, thil a nih tur ang ang chu a lo ni zo tawh a, Greece Economy siam ṭhat leh dan tur erawh a hautak hle dawnin alang. Austerity measures atan minimum wages 22% a tihhniam, sawrkar hnathawk 15,000 ban leh post tam tak tih bo bakah Sawrkar leh Corporation hminga Assets i.e., Building & Property etc, etc a neih mek tam takte hralh, Tax lakna thar siam leh awmsa mek tih san etc, etc te a ni nuai mai. Greece mipuite chuan heng hmalakna tur rawtnate hi duh loin mipui tam tak kawtthlerah chhuakkhawmin kawng zawh ropui an lo huaihawt ve mup mup bawk a.

Greece Prime Minster Tsiparas chuan European Union leh IMF hnenah leiba an neih mekte rulhna hun pawhsei sak dilna a thlen leh ta ngawt a, hetih mek lai hian Greece ram pumpui huapa mipuite ngaihdan lakkhawm result-ah chuan European Countries, IMF, etc te nawrna avanga sawrkar inrenchemna tura hmalakna tura rawtna ang chi chu 61% zetin duh lo lamah ‘Vote’ an thlak si avangin sawrkarna fawng vuan mektute tan pawh hmalak ngaihna a vang a, a luhai thlak hle ta ve ang.

Greece Economy tluchhiain European & Khawvel a nghawng dan

June 30, 2015 a lo ral chiah khan, IMF a leiba rulh tur USD 1.7 Billion an rulh theih loh vangin Greece chu Developed Country zingah defaulter ni hmasa ber ram a lo ni ta a ni. Developed Country zinga mi ni si kha, Bank zawng zawngte chu pawisa neih loh avangin khar vek a ni a, ATM aṭangin Euro 60 emaw lek lek chauh lakchhuah phal a ni.

Greece economy innghahna pawimawh leh sum lakluhna hnar ber chu Tourism aṭangin a ni. Hetia an economy a lo sawngkawn tak hnu hi chuan Tourism lam pawh nasa takin a nghawng lo thei lo. Kum tin Tourist mi maktaduai 14 zet he ram tlawh ṭhinte tan pawh mahni mamawh tawk tur sum fai an intum sa nghal thlap thei a nih loh chuan sum hman vak theih a ni lo. Bank aṭang pawisa lak tur awm loh mai bakah ATM aṭangin nikhatah USD 60 lek lek bak lak theih a ni si lo. Ramdang aṭanga thil lakluh tur ang chi te pawh pawisa lo pek tur ber an neih si loh chuan mamawhin lakluh duh hle mah se lakluh theih a ni lo a, thil a buai thui leh.

Greece hian kum tinin ramdang aṭangin chaw leh damdawi lampang chi 40% leh power & energy-ah 80% vel zet a la lut ṭhin a, hetianga an economy a lo tlukchhiat tak hnu hi chuan khawvel ramdang, mamawh a lakluhna ṭhin ramte chuan, tun hma lam angin Greece hnenah hian an bungruate an thawn lut zel ngam ang em? tih pawh an inngaihtuah nasa vein an lu a hai hle a ni.

Greece sawrkar hi khawvel ramdangte mithmuhah a mualpho ta tak zet a ni. Direct chuan Mizo­ram min nghawng ve lo nain eng emaw tal zirchhuah tur kan lo neih ve hlauh takin tiin ka han ziak a ni. Greece Sawrkarin bail-out sum a mamawh zat hi Euro 86 Billion zet a ni a, European Central Bank, European Commission, IMF te nen inbiakna an nei chho mek.