Sawrkar Library-te hi khawpui lailiah dah ni se

Mi changkang leh mi inchhiar zau deuh leh zirlai lehkha chhiar peih deuhte tan chuan library hi a pawimawhin a hlu em em a. Mi tam takin lehkhabu leh chanchinbu chhiar nan library hi an hmang ṭhin.

Kan zawlkhaw­puiah pawh hian sawrkar library pahnih lai kan nei ve a, a lawmawm hle. Amaherawhchu, a lawmawm viau laiin mipuiin kan chhawr ṭangkai tur ang aiin kan chhawr ṭangkai thei lo erawh hi chu a pawi ka ti a ni.

Kan chhawr ṭang­kai theih loh chhan chu a awmna hmun hian a zir lo em a ni. State Library hi a building a ṭhain a changkang viau a, mah se a awmna hmun Mizoram Secretariat Complex lam daih a nih avangin mipui vantlang tan pan a harsa a, kan chhawr tur angin kan chhawr ṭangkai thei tlat lo.

District Library lah hi pawn aṭanga han en reng reng pawh hian library a ni ang tih pawh rin ngam a har hial a ni. A building te lah hi zahpuiawm tak, luh chakawm lo em em mai a ni a, hmun ualau lai pawh chang pha loin hmun kilkhawr leh biru takah zawn fe ngai khawpa langsar loah a awm a. Hnam dang hmuhah phei chuan a zahpuiawm hial zawk a ni.

State Library hi chu mahni building ṭha pui mai luaha awm an ni tawh thung a, mipui tan chhawr phak vak loa hlaah awm mah se han sawn chi a ni tawh bik si lo.

Chuvangin, Dis­trict Library zawk tal hi chu hmun ualau lai leh hmun laili lai deuh heng - Temple Square leh Treasury Square vel emaw, Dawrpui phei leh hmun ualau leh kawngpui an deuh laiah hian dah thuai theih ni se. Mimal in luah man a sang deuha kan tlin lo kan ti a nih pawhin Mizoram Secretariat hlui zawk Treasury Square lama mi, tuna Mizoram Secretariat Annex an tih takah te hian library leng tawk room engemaw zat hi District Library tan pe ve se a ṭha ang.

Library enkawltu Art & Culture Deptt hian Library pawi­mawhna hriain Dis­trict Library Sikulpui­kawna awm hi chang­tlung zawkin thuam se. Hmun ualau leh mipui tam zawk tlawh theihna hmunah dah vat se a ṭha ngawt mai.