KA VISION

Kan Zoram kristian nun leh kan hmasawn dan hrang hrangte ka han ngaihtuah hian ka duhthu hi a sam lo mang e. Engati nge heti tak maia kan kristianna hi a sawngnawi a, kan ṭhan hi a ṭhuanawp tlat mai le? tih zawhnate hian ka rilru an luah a, ka phak ang tawk hian ka vei ve em em mai a ni.

Rev. Saiaithanga’n “Kohhran rawng­bawltu atan chuan piangthar aiin pianghlui kan duh zawk - Sen (nausen) reh lote u,” tia a lo sawite hi a dik telh telh hian ka hre tlat kan tunlai kristian nunzia leh kan awmdan phung ka en hian. Kawng lehlamah chuan keini ang tluka harh ngun leh harhna chang ngun hi khawvel ramdang kristiante zingah hian an awm meuh lo ang, mah se kan nun erawh chu a chhuanawm loh berte zinga mi a ni lawi si.

Heti taka kan la sawngnawi chhan hi thil hrang hrang a awm thei ang a, chung zinga a chhan pakhat chu kan Pathian thu hriat dan leh pawmdan (theological concept) hi a ni thei awm e. A tlangpuiin kan harhna chan ho reng reng hi kan chhui chian chuan a ‘vanchangril’ kuai zawng (eschatological concept) deuh hlir a ni. Chu chuan kan nitin nun uluk pawimawhna leh Pathian thu hi he lei kan awm chhunga thlen dik tir tur a nihna lam min theihnghilh tir a ni ang ka ti ṭhin. Harhna kan chan tawh hrang hrangten kan theology a nghawng dan leh kan nun a nghawng dan tlem azawng lo chhui hlek ila.

1. Kum 1906 harhna: He harhna hian Isua chu ramhuai aia thil tithei, sual laka min chhandamtu a ni tih lamah min hruai a.

2. Kum 1913 harhna : He harhnaah hian Isua chu thlamuantu a ni tih lam a ni ve leh a.

3. Kum 1919 harhna: He harhna hi Isua chu kan aia inpe a min tuarsaktu a ni.

4. Kum 1929/1930: He harhnaah hian Isua chu Vanram/ Pialral min kaltir or thlen theitu a ni tihin kan hre bawk.

Heng harhna hrang hranga Isua kan hriat dan leh hmuh dan a lo danglam chhan hi thil hrang hrang a awm. Chungte chu ramhuai hlauhna, he tih hunlai hi kristianna lo luh ṭan lai leh kristianna kan hmelhriat tirh lai vel a ni awm e. 2). Mautam leh Hripui. 3). Leimin leh Hripui. 4). Tam te an ni. Heng harsatna kan tawh ang zel hian harhna lo thlenga Lal Isua kan hriat dan leh hmuh dan pawh a lo danglam zel tih kan hre thei ang. Hetiang harsatna zawng zawng aṭanga min chhandam theitu a nihna lamah Isua hi kan lo harh pui tawh a. Hemi hnulam zela harhna lo thleng hrang hrang chanchin sawi zel tur a awm thei ang a, mah se hemi chinah hian harhna hmasa lam chanchin chu duhtawk ila. Tunlai harhna kan dawn leh chan (Kelkang leh a chhehvel harhna kan kai) aṭanga kan kristianna nunah lo thleng se tih ka duh ka han sawi teh ang.

1. Tunlai harhna kan chan hian Isua chu misual leh dik lote tiboraltu a ni tiin min hriattir se.

2. Isua chu mi taima leh mahni intodelh, midangte ṭanpuitu a ni tiin hre bawk ila.

3. Isua chu mi dik leh rinawm a ni a, chumi hmanga mite hneh ṭhintu chu a ni, ti te hian kan hriat a ngai tawh a ni.

Khaile, a enga pawh chu nise Zoram hian a mamawh ber nia ka hriat chu Lal Isua hi thlarau chauh chhandamtu ni loin kan mihring pumpui, rilru leh taksa chhandamtu a ni a, kan taksa peng tin hi thianghlim leh chhandam tawh thil ṭha leh dik chauh tihna tur a ni tawh tia kan harh leh a ngai. Chubakah chuan Lal Isua hi khuang a rik lai chauha lampui tur a ni lo a, nitin kan hnathawhna lamah pawh lampui zel tur a ni tia hriatna lamah hian he harhna hian kan theology hi min her danglam sak ve tawh se tih hi ka duhthusam (vision) chu a ni e.