Aizawl chawhmeh bazar
Aizawla chaw-hmeh bazar 'function' dan hi khawi ram university-ah mah an zir ka ring lova, buai nuai nuai fel thlap si hian an kal a ni. Vairamte aiin hetiang bazarah rau rau chuan a la fel fai zawk a, an hmunhma pawh a hnawk lo zawk a; mahsela hei hi Mizoram khawpui bera chawhmeh bazar kalpui dan tur a nih reng dawn chuan kei chu ka bang a ni mai!
Mizoram sor-kar ding tawh zawng zawng hian chaw-hmeh bazar kan mamawh tih an hre vek a, an sa thei lo hi chu ka dem. Tuna an sak chhun a tetzia leh ṭhutna an indaih lohzia hi Aizawl mipui bazar ṭhin chuan kan hmu a, keini ang pa-hmei deuh thaibawih vang ni chuang lova zingkara bazar ṭhin tan chuan Inrinni tuk hi chu khelmuala innek chak a pawimawh ang thoin innek chak a pawimawh ṭhin a ni! Hei hi kan sorkar hian a ching fel thei lo a nih chuan an nep ka ti.
Chawhmeh bazar hi ka ngaihdanah chuan Aizawlah hian a lian tham hmun 20-30 velah sak ni se, kan zavaia Dawrpui vela chawhmeh lei tura innek luih luih zel mai hi a rem hriat loh thlak a, thil atthlak tawpkhawk a ni tlat. Thawmhnaw leh thil dang lei tur chuan he hmun hi pan khawm ila a pawi lo, chawhmeh bazar chu veng kilkhawrah pawh kan mamawh a ni a, he hmuna kal
ṭhinte hi veng hla tak taka mite kan ni a, heng kan vengah hian Vairama an tih angin chawhmeh bazar hi nei ve mai ila a va
ṭha dawn em.
Tunah hian Bawng-kawn, Chanmari, Vaivakawn, Dawrpui, Treasury Square, Mi-ssion Veng (Thak-thing Bazar), Khatla, Armed Veng, Ṭhuam-pui, ITI Veng, Kulikawn leh ka sawi tel loh hmun
ṭhenkhatah hian 'bazar' han tih tham deuh chu a awm a, hei hi kan puntir loh chuan kan harsatna hi a nasa tulh tulh ang a, a awm kumkhua bawk dawn a ni. Chawhmeh bazar na na na hi chu kan zavaia kan mamawh a ni a, veng tinah kan din a rem loh a nih pawhin veng pali-panga inṭawm theih tur bazar te deuh hi siam ni se, chu chuan kawngpuia inpho hi a titawp thei ang.
Tunah chuan ṭhutna a awm loh avangin kawngpuia an ṭhutte kan phalsak a, motor kalna tura road tax kum 15 kan peknaah kan motor a kal hlei thei lova, mirethei thlai thar zuar tia kan 'khawngaih' vangin dan bawhchhiat kan phalsak bawk si a, hei hi i titawp tawh teh ang u.
Aizawlah chaw-hmeh bazar 20 tal sa thei sorkar hi nei ila. Aizawl khawpuia mipui buaina ṭhin bazara in nek luih luih hi a awm tawh lo ang a, kan buaina hi a fel duak ang.
- Lalzarmawia