February/Ramtuk Thla ni 20, 2025
Ram leh hnam hrang hrang leh mi tin hian ni pawimawh bîk kan nei ṭhin a, February ni 20 hi Mizoram State Day a ni a, ni pawimawh bîk a ni. Kuminah chuan he nî hi Lammualah State Day of Prayer hmanga hun buatsaih niin, thusawi ṭha tak tak bakah, Pathian chawimawia lâmte leh ṭhahnemngai taka ṭawngṭai hmuh tur a awm a: a lawmawmin thla an timuang e.
Mizorama sum chang thlai zînga chîn nasat ber chu sawhthing a ni a, kan state politics pawh a luah hneh hle. A bîkin ZPM kaihhruai sawrkar a pian hnû hian sawhthing hi kut hnathawktute’n man man taka an hralh kum a awm fo va. Chutihrualin, a man ṭhat loh kum a thlen vêk vêk chuan kum tluana chawh loh chângte pawh a awm fo bawk. He harsatna hi India rama state eng emaw zahte’n an chîn vang a ni. Sawhthing hralhna/market-a harsatna lian ber chu Bagha, Silchar, Karimganj syndicate hoin kan rama sawhthing market an thunun hi a ni a; he kawlpui ata tâl chhuah hlan nghakhlel taka thlirtu kut hnathawktute an va khawngaihthlak ṭhîn êm.
Kan hriat tlân angin February/Ramtuk Thla ni 20, 2025-ah Zoram mipuite’n nghakhlel taka kan lo thlîr ṭhin ZPM intiamna, manifesto-ah pawh an ziah sawhthing chu Rs. 50/Kg in an lei ṭan ta! Chief Minister Pu Lalduhoma’n hun rei tak a lo tlangaupui ṭhin chu a takin kan hmu ta. Hemi kawngah hian Pu PC Vanlalruata, Agri Minister te, Dr K.C. Lalmalsawmzauva, Adviser to CM leh Mizoram Agriculture Marketing Board (MAMB) member-te bakah District Agriculture Marketing Committee (DAMC) an thawkrim hle. Ka vei ve ber a nih avangin an inbuatsaih dan uluk takin ka zir a, an inbuatsaihna pawh a ṭha. Thutiama ding ngam kalphung thar sawrkar an fakawm a, Ramtuk Thla ni 20 (20/02) hi ni bik leh chhinchhiah tlâk tak a ni zel tawh ang.
Sawhthing hi a tui a, chhungkaw tin mamawh a ni bawk a, politics pawh a nghawng sam viau. Social media kan en a, opposition party mi leh saten kuthnathawktute sawhthing sawrkarin a leisak chu lawmpui ahnêkin, a ni lo zawngin thu mak pui pui an post nasa ngang mai. An thu post ho avang hian kuthnathawktu tam tak an chi-ai phah a ni tih zan lamah min lo hrilh hlawm a. Hetiang thil hi chu thleng nawn tawh lo hram se a va duhawm em!
Ni 21/2/2025-ah budget session-ah MNF MLA-te’n Mizoram sawrkar chu kuthnathawktute sawhthing man batsakah an puh leh bawk a. MIP hun laia aieng chi kuthnathawktute an leisakna man thla 2/3 an batsak te, hman ni lawka Sialhawk khaw lakhuihthei man kum 1 zet an batsakte kha a la rei vak lo a nia. Kuthnathawktute hian a sûr a sa hnuaiah kawng bumboh tak tak zawhin, ‘risk’ tak meuhin hma an la ṭhîn a, harsatna siam belh zâwnga khawsak hi chu a mawi lo e.
Aw le, agriculture marketing lamah hian hnuhma chhuanawm hnutchhiahtu sawrkar kan la neih loh avangin dap chawp ngai thil a awm nual thei; sawrkar (MAMB) thu leh hla kan ngaihven peih a ṭul hle ang. February/Ramtuk Thla ni 20, 2025 hi a bul ṭanna a ni tih hriain, duhthusamin thil kalpui theih a ni kher lo thei tih hriat lawk a ṭha âwm e. Kuthnathawktute pawn kan sawhthingte fai tak leh thianghlim taka buatsaihin, rinawmna nen hma lam i pan zel ang u. Tunlai khawvelah sumdawnnaa inelna a sang tawh em em a, chuvangin, kan sawhthing leitu turte lungawina ngei turin uluk takin kan thil thar chhuahte kan buatsaih a ngai a ni.
- Zion Lalremruata