Publicity-a tuihal public leader

A bul kan ṭanna atana saw lan ka duh nghal chu Mizoramin tun hnaiah publicity lama tuihal public leader kan nei ta nual mai hi Mizo pi pu te khan rawn hmu ta se, an va han zak dawn tak em!!!! Tun hma kha chuan kan Mizo pi pu te kha chuan an thil tih ngei pawh kha an tih ni lo anga lan tir kha an tum hram hram ṭhin a, tunah hi chuan an tih loh pawh mahni tih anga lan tir duh politician in kan ram a khat zo ta hi a va han zahthlak tak em ve le.

MNF an sorkar tirh khan taxi a office kal te kha an awm a, taxi aṭanga an chhuk lai chiah chiah thla lo la fuh chat chat te kha an awm a, bike a chuang hreh lo VIP te kha kan nei a, mipui chuan, "Ekhai, an dang zak tawh dawn e, VIP culture a bo dawn e," an tih hnuah kan hotute tho chu Covd-19 hri len lai pawhin an in zawn tir leh mup mup duh tho bawk si a ni.

Term tirha Kris­mas leh Kumthar naa fatu kan VIP te zingah kum khat a vei hnu kum 2019 Krismas leh Kumthar naa fatu thlalak hmuh tur a awm leh tawh mang lawi si lova ni. Kan VIP zingah thlalak atchilh, mahni PSO te pawh thla la tura tir mai ṭhin, Facebook leh Whatsapp hmanga thehdarh leh tura kid nei sa an awm tam hle tih pawh kan hre tawh a, mi ṭhenkhat thu phuah phei chu a ziaktu pawh tin zawn theih tura thu chheh (wording) kalhmang inang a ni a, publicity lamah kan hotute hi an tuihal huam huam a ni a, thlalak thehdarh tura mi tir ṭhin an awm an ti hial a ni.

MNF sorkar hma Congress hunlai pawh khan hei hi thil awm tawh a ni a, Minister zingah lar khel thiam tak kha an awm tawh nual a ni. Lar khel thiam tak, journalist leh party mi an che vel theh darh tur kid nei an awm ṭhin a ni.

A tlang han kawm dawn ta ila, publicity hi politician te tan chuan thil pawi­mawh tak a tling a, mahse mipui hi mi mawl awm khawm kan nih tawh loh avangin a lova luak chhuaka in puanzar leh hming ṭhat lak tum leh lutuk hi chu Mizorama Mizo pangngai tih duh ngai loh thil a ni. MNF ah pawh hian tuna Minister ṭhenkhat uar uchuaka publicity ṭul ti lem lo Mizo pa, pa zahawm tak tak sawi tur an awm. 

Politics a nih avanga engkim thiang anga ngaih hi a ṭha lova chuvangin kan poli­tician te pawh hian tawk chin hi nei ve deuh teh se, mipui ṭhenkhat hi an bum thei a nih pawhin mi zawng zawng chu an bum thei tawh dawn si lova.