Hmanah chuan maw.... Tunlai ang mai a ni
Hmanlai thil ka hriat ve kan sawi mai mai teh ang, thawnthu hi kan sawi loh chuan a liam mai ṭhin.
1. Transport sub-sidy hi thil fel lo a ni tih kan hre lova, industry a taka kalpui mang loh phuahchawp hian a thei faten an dil sup sup a, chumi hmanga inti lian chuan Mizoram huap mi lian tak tak an lo chhuak a, tunah chuan thil awmzia kan hre ta a. Transport subsidy hi hausakna dik lo a ni tih kan hre ṭan tawh a, a subsidy dik lo hi tun thlengin a la duh an la awm a, an zak lem lo.
2. Hman deuh-ah kha chuan consultancy firm din hi Vaiho tih turah kan ngai a, tlem lai deuh aṭang khan Mizote'n kan ti ve thei tih an hre ta. Tunlai chu consultancy firm indin siak ang kan ni a, a thar a chhuak zel a, intihsiakna ṭha tak a ni dawn a, hei hi intihhmuh chi niin ka hria. Hmanlai kha chuan kan khawih ve thiang lo emaw kan ti a, a lo harsa vak si lova, tunlaia 'copy paste' ang leka thil siam theihte a lo tam si a, kan um ta hum hum mai a ni.
3. Hmanlai
aṭang tawhin North Eastern Council (NEC) kal vel dan hi kan hmelhriat dan a dik lo laklawh a, a bilhah kan tho lo tawh a, sum siamna leh sum lak chhuahna angah kan ngai a, tun thlengin NEC kan hmuh dan a dik lo. NEC min hmuh dan a dik bik lova, kan chhawr
ṭangkai lova, anni lam pawhin ṭangkai taka hnathawk turin min beisei lo a ang ka ti a, hmanlai
aṭangin tunlai thlengin kan buai.
4. Hmanlai chuan airport din tum a ni tih hriain mi rem-hre deuhte chuan Lengpui chhehvelah ram an lo nei sup sup a, compensation an han la tak tak mai chu tlakchhiat theih tawh lohna tur khawpa ram zau an lo nei a. Hydel project siam a ni dawn tih hriain Tuirial chhehvelah ram an lo inneih siak leh tak tak a, tunah rel kawng pal tlang tur tih an hriatnaah ram an inneih siak leh sup sup a, hmanlai leh tunlai hi kan la inang deuh reng mai.
5. Hmanah zu an zuar a, an khap leh a, a duh leh duh lotute chu rorelna ṭhutthlenga an ṭhut leh ṭhut lohah a innghat a, tunlai pawhin zu an zuar a, tichuan a duh leh duh lotu pawh a zu lam aiin an party awmna lam aṭangin a teh theih a, hmanlai leh tunlai hi a la danglam vak lo a nih hi.
- Thantea