Khaw fai leh thianghlim
Sap thufing chuan hriselna hi damreina leh hausakna a ni a lo ti a. Mi a lo hrisel a, a lo hausak chuan a malsawm dawnna ṭobul ber chu faina leh thiang-hlimna a ni ti ila kan sawi sual tam lo ang.
Kan Bible-ah pawh "In thianghlim tur a ni kei ka thianghlim si a" tih a ni. Thianghlimna phenah chuan a mal-sawmna tam tak a awm a, hemi chang leh dawng thei tur chaun thianghlimna leh faina hi amah ringtute tan chuan kan ngaih pawi-mawh a ṭul takzet a ni.
India hnam pa Mahatma Gandhi pawh khan fai hi a lo ngai pawimawh em em a, a nun pumpuiah faina hi a dah san em avangin a pianchamah kum tin October 2 hi Faina Hapta ah hman ṭhin a ni ta a ni. Tunah central sorkar pawhin rawn chhunzawm zelin Prime Minister Narendra Modi kaih-hruaina hnuaiah scheme ṭha tak mai Swachh Bharat an rawn duang chhuak ta.
Hmun tin school, college leh zirna sang zawk University-ah te pawh kalpui zel a ni a, ram a lo fai theih nan leh thianghlimna kawngah kan ram hi ram dang lakah a lo hnufual lutuk loh nan ṭan a la mek a ni. Kan Zoramah ngei pawh hmun tinah faina hnatlang te neiin khaw fai ber hnenah lawmman sorkarin a buatsaih ta a. A ṭhain a ropui ka ti ngawt mai. Nitin faina hnatlang hi nei ṭhin ta ila kan veng/ khua hi chu a va changkang dawn em!
Thianghlimna nei tur chuan ṭanrual a ngai a, mi pahnih khat tlawmngaih ringawtin kan hlawh zo lo. Khaw fai nei tur chuan inpumkhat a ngai a, faina in a ken tel chu hmasawnna, zahawmna leh chang-kanna te hi a ni; politics khelh a ngai lo a, sum nghak kher pawh a ngai lo.
Ram changkang nia kan hriatte hi han en ila an hausakna leh an ropuina zawng zawngte hi eng aṭanga an neih nge ni ang? Siamtu malsawmna an dawn nan chuan an taimain an thawk rim phawt a, faina leh thianghlimna an ngai pawimawh bawk ṭhin. Tunlai TV serial film-ah te Korean an lar khawp mai. Korean ho lakah pawh entawn tur kan ngah - an thianghlimna leh aia upa an zaha te hi.
Mi changkangten heti khawpa faina lamah ṭan an lak chuan kan tih ve theih lohna tur a awm lo. Khaw fai nei tur chuan ṭanrual a ngai. Mizoram hmun
ṭhenkhatah khua a thim tawh tih mai avanga in leh dai hnai vela ek mai te, ekin mumal nei loa kawngpui sira naupang ektir mai mai te kan la chiang tlat. Hei hi kan changkan lohzia tilangtu a ni. Ek aṭanga natna hrik awm tuihawkin a lo len darh a, hri a lo leng a, kan boruak hipah te, kan tuikhurah te thlengin nghang ṭha lo leh natna hlauhawm tak tak a ṭai darh thei daih a ni.
Ran vulh kan nih pawhin vantlang tana rimchhia lo turin in sak sak ila. Kan ram hi ram entawntlak leh ram nuam ni turin theihtawp i chhuah tlang zel ang u.
- Jeho Rochangliana