Aizawl khawpui tan rawtna ṭhenkhat
Mizoram khawpui ber Aizawl hi ruahmanna felfai tak hnuaia din a ni lo a, hmun hrang hrang aṭanga kan pan khawm a ni a. Chenna in leh mihring pawh kan pung zel a, khawpui ṭhang mekte pawh kan ti thei awm e.
Kan kawngpui hi a zau thut dawn lo a, mihring chengte pawh vawilehkhatah kan kiam thut lo ang. Ami chengte hian kan khawpui hmasawn dan tur te leh kan him zawkna turte kan ngaihtuah a ngai ta. Khawpui enkawltu tur AMC kan nei ta bawk a, anni leh State sawrkar chunga beiseina sang tak nei chungin Aizawl khawpui tan rawtna tlem i han siam chhin teh ang.
In sak ṭhat
Kan Aizawl khawpui laili, a bikin kawngpui (main road) kamah hian rangva in hlui tawh leh cement concrete upa deuh tawhte an la awm nual a. Heng in te hi hmun dang kawngpui hnaih vak loa awm nise chu ngaihmawh tur pawh a ni lo. Amaherawhchu, Aizawl hi keimahni mai bakah State leh ram pawn lam khualzin miten nitin an tlawh kual ve si avang hian kan khawpui hmel a timawi lo deuhin a lang. Tin, kangmei leh chhiatna dang thleng thei lakah a him lo zual bik bawk. Hengte avang hian sak ṭhat a ṭul hle in ka hria. State sawrkar/ AMC lam pawhin ruahmanna siam se.
Vanapa Hall sak ṭhat
Mizorama vantlang pun-khawmna hmun kan neih zinga lian leh kan hman rim em em Vanapa hall hi sak
ṭhat a ngai tawh hle bawk. A building a hlui ve tawh mai bakah mipui tam tham deuh a dawl zo ta meuh lo a, a kawta motor parking hian harsatna a thlen bawk.
Tin, chhiatna engemaw pawh thleng se chhuahka (emergency exit) a neih ṭhat loh avangin mipui tan a him lo. Tun aia design nalh leh changkang, ngelnghet, rinawm leh chhawng sang zawkin a sak theih ang. Sak ṭhat a nih chuan a hnuaia Petrol Pump to Temple kawng hi hei aia ṭha zawkin a siam theih ang a, hall chhungah motor dahna lian tawk tak a awm thei bawk ang.
Vawnban/ tlakdal siam
Kan kawngpui lun lai hmun hrang hrangah hian mipuite him zawk nan vawnban siam a ṭul. Hmun pakhat chauh han tarlang ila: Bara Bazar chuan chung, damdawi leh thil dang zawrhna phei vel kea kalna (footpath) hi a zimin a rualrem lo hle a, chutihlaiin thil zuar an la ṭhu fo bawk. Kea kal mipui leh motor tlan vel intai palh awl tak a ni. Chuvang chuan kea kalna (footpath) rualrem leh vawnban ṭha tak, Civil Hospital peng opposite aṭang hian Dawrpui Biakin lama kual letna bul thleng hian siam nise. Kawng kanna tur bik ruahman nise, mipuite kan him phahin lirthei chet vel pawh a awlsam phah ang. Bara Bazar chuan hnuai lama vawnban (railling) siam pawh a ṭangkai em hi.
Thing kih
Zodin Square leh Raj Bhavan inkar bakah Aizawl khawpui chhung hmun dang, motor kawngpui hnaiha thing lian tak tak awmte hi hlu teh mahse chhiatna a thlen theih lam hi kan ngaihtuah tel ve a
ṭul awm e. Heng thingte hi kan khawpui timawitu mah nise upa tak takte an ni tawh hlawm a, a chhung hi a kawrawng duh viau zel lehnghal. Thlipui na deuh leh lirnghingte pawh dawl zo lo thei an ni. A bul velah electric hrui leh hrui dang a inthlung hnawk rup mai si a, chhiatna thleng palh se ngaihtuahawm tak a ni. Hman kuma Vanapa Hall kawta thing tlu pawhin harsatna a siam nasat em kha. Tin, a zar ro tla/ tliak pawh a bul vela kal mihring leh lirthei tan pawh a hlauhawm thei hle ang.
Thing hnah motor kawng-puia tla ringawt pawh hi buaipui tham a ni. Chuvang chuan khawpui chhung kawngpui hnaiha thing lian tak takte hi a zar thlak emaw a kung a kih emaw ka rawt e.
Awmze neia thing phun
Thing phun kan uar ta viau a, a lawmawm hle. Awmze nei deuh zawka phun dan kan inzirtir erawh a ṭul. Motor kawngpui hnaih lutuka phun te, chenna in bul hnaia thing lian chi phunte hi a ṭha ber lo maithei. Zarkawt-in an veng chhunga an phun Rihnim thing pawh hi a dam rei a nih chuan a la hnawk ngei ang; a phunna hmun tur a zirin thing phun tur kan thlan thiam a pawimawh.
Aizawl khawpui tan bik chuan thing lian leh sang tak tak, hmunhma duh zau chi aiin thing lian vak lo, buk leih chi leh a hnah pawh tla kawlh vak loa hring reng chi (evergreen tree) te hi a phun chi viauin ka ring. Enkawl leh cheibawl a nuam zawk ang a, a ṭul huna paih bo pawh a awlsam zawk ngei ang. Rawtna han siam ve teh le.
- Lalnunmawia