FCI Kudam chungchang

Tun August 2016 leh September 2016 chhung hian Chanchinbu hrang hrangah F.C.I Godown, Ramri-kawn ami hnawkzia an rawn ziak zingin kan Chief Minister zahawm tak pawhin sawn an duh thu a sawi hi a lawmawm hle a; sawn ngei se a duhawm khawp mai.

Amaherawhchu, Mizoram pum han thlir chuan FCI Godown awmna reng reng hi a fel lo emawni dawn ni? Buhfai leh ei tur (food stuffs) loading emaw unloading emaw a awm reng rengin a bul hnai velah hian motor rit phur (loaded truck) te hi a ding nghuk zel a, traffic a ti jam deuh reng ṭhin a ni.

Truck load chang leh unload tum, a bikin Rengtekawn leh Bualpui North-ah hian motor dang kal ve tan a buaithlak chang a tam hle a ni.

Bairabi FCI godown bulah phei chuan motor za dawn lai load chang kawng sir blacktop bak thleng thleng an ding nghuk zel mai a, ṭhal khaw ro hma phei chuan an motor tang han chhuah tum hi clutch plate tikang ta leh tang nghet deuh differential ti chhe tawk pawh an awm hial ṭhin nia sawi a awm nual bawk.

Hei bakah hian motor a hnathawk driver leh handle man tan inthiarna (toilet) awm hek suh, mi kal loh laia in hnangfak lo ngai mai ṭhin bawk nen hriselna atan pawh thil pawi tak a thleng fo ngei ang. A hnuaia rawtna hi ngun takin sawrkhar hian lo ngaituahin FCI godown bulah reng reng chuan a hnuai ami ang hi dah tel thei se:-

1. Parking Area truck 100 tal dah theihna (highway) a tih buai loh nan.

2. Amenities (community toilet and drinking water) truck a hnathawkte tan.

Dik tak chuan Ramrikawna FCI Godown pawh hi an sak tirh khan a chunga ka sawi takte khi lo dah tel sela chuan tuna kan ngaimawh ang em em hian kan ngaimawh lem lo ang.

Hmun danga FCI Godown awmna reng reng- Bairabi, Reng-tekawn, Bualpui, Luangmual (Lunglei) leh Lawng--tlai mipuite pawh hi an la beng-chheng lo na a, a chunga kan sawi anga ruahmanna a awm loh chuan rei han tawrh theih zia reng a awmin a lang tlat lo.

- K. Lalhmingthanga

Upper Republic, Aizawl