Sawrkar hnathawkte'n NGO hmanga sawrkar hmalakna an dodal ṭhin hi
NGO Coordination Committee leh CYMA chuan Indian Air Force hnena Lengpui Airport hlan an remtih loh thu nikum leh tun kumah hian ṭum 2 an puang tawhin ka hria a, ka hre sual em lo ang chu maw? An thuchhuak ka hmuha ka rilrua awm rauh rauh ṭhin kan sawi lang mai mai teh ang.
Pakhatna chu–NGOCC leh CYMA-ah hian hruaitute zingah sawrkar hnathawk an awm nual a, chung sawrkar hnathawkte chuan pawl behchhanin, pawl chakna hmangin sawrkar hmalakna an dodal niin a lang. An tih loh tawp tur an ti niin ka hria.
Pahnihna chu–Lengpui Airport hi NGOCC emaw, CYMA emaw siam a ni lo va, an enkawl a ni lo va, an thuneihna a ni hek lo va. Chuvang chuan IAF hnenah a ni emaw, AAI hnenah a ni emaw, private firm tu emaw hnena sawrkarin a hlan leh hlan lovah thuneihna an nei miah si loh avangin an kuang lo an nawr a nih hi maw le, tih a ni.
Pakhatna zawk khi sawi zui ila. Sawrkar hnathawkte hi CCS Rules-in a phuar vek a, sawrkar hnathawk an nih angin an tih tur leh tih loh tur tam tak a awm. An sawi ṭhin pakhat chu, sawrkar hnathawkte chuan sawrkar policy leh hmalakna dodal zawnga chein thil an ti tur a ni lo va, sawrkar rawih an nih angin sawrkarin ti tura a tihte an tiin an thawk mai tur a ni tih a ni. Sawrkar policy, programme leh hmalaknate pawh media-ah a sawisel tur a ni lo tih a ni bawk.
Chutihlaiin Mizoramah chuan sawrkar hnathawk tu tute emaw chuan hruaitu an nihna NGO hmangin sawrkar hmalaknate an dodal fo niin a lang. Chutiang chiah chu Lengpui Airport chungchangah pawh hian a ni kan ti thei ang.
Lengpui Airport hi sawrkarin IAF hnenah a hlan dawn leh dawn loh la tichiang lo mah se, hlan tumin hma a la ngei tih chu a chiang a. Hlan a ṭhatna leh ṭhat lohna lam sawi ka tum ve lo va, ka hre lo bawk a. Airport chungchanga sawrkar hmalakna sawrkar hnathawk ṭhenkhatte'n NGO-a an nihna hmanga an dodal hi a dik ka ti thei lo va, sawrkar hnathawkin a tih loh tawp tur an ti niin ka ngai hmiah mai.
NGO-a hruaitu ṭhenkhatte hi an inngai ropui mah mah em ni aw ka ti rilru. Sawrkar hmalakna leh thil tih chungchanga an mimal ngaihdan, duh dan leh duh loh thilte hi hruaitu an nihna NGO chakna hmangin an tilang ni te hian ka hria a!
A lehlamah chuan, Mizoram pum huapa NGO hruaitute tan chuan indah chungnun a awl ve viau chuan ka ring. Sawrkar meeting pawimawhahte an tel ve a, sawrkara an aia chung zawk, protocol-a anni aia sang daih zawkte aia hmaah, langsar zawkah an ṭhu fo mai; chanchin tharah kan hmu ṭhin. Hei hian sawrkar hnaa mahni aia sang zawkte aia chung zawka inngaihna rilru a neihtir ve ṭhin thei awm e.
Sawrkar hnathawk chuan NGO-ah hruaitu sang tak pawh ni se, danin a phuar a ni tih hi hre reng se, chumi avang chuan tih tur leh tih loh tur an nei a ni tih hi vawng tlat se ka ti ngawt mai.
- Zoramchhana