Zu ṭhat lohzia inzirtir ve ila

Cigarettes and Other Tobacco Products Act (COTPA) kalpui a nih hnuah Mizoram-ah pawh he dan hi khawng taka kalpui mek a ni a; Mizoram State Tobacco Control Society (MSTCS) leh Indian Society on Toba-cco and Health (ISTH) Mizoram Chap-ter-te'n nasa takin hma an la a. District tinah Anti Tobacco Squad dinin, phal lohna hmuna mei zute leh COTPA dan bawhchhiate an vai ṭhin bawk a. Dan loa meizial zawrh leh phal lohna hmuna mei zu man thu leh pawisa chawitir an nih thu pawh media-ah kan hmu chàmchí ta a nih hi.

Ni e, vaihlo aṭanga thil siam chhuah reng reng, zûk leh hmuam kan tih maite hi a ṭha lo a, hriselna khawih pawi thei vek a ni tih hi kan hriat dan a ni a. Zûk leh hmuam dotute'n an do te, a ṭhat lohzia an puangzar ṭhinte hi a lawmawm a; nasa zawkin ṭan la zel se. Chutih rualin, mi dang tibuai lem loa mi tuin emaw a lo ti a nih chuan, ama duh thu a ni a, thuneihna hmanga khapsak ngawt chu a dik lo mai thei. Mi dang nin khawp emaw, mi dang tibuai thei zawnga tih erawh chu a dik hauh lo.

Kan Mizoram 'first lady' Pi Lal Riliani, Chief Minister nupuiin a vei êm vang ni maw, sorkar aṭang pawhin zûk leh hmuam chungchanga khapna dan awmte an kengkawh ṭha em em a, Anti Tobacco Squad-te pawhin squad drive neiin, a khát tâwkin dan loa mei zu leh meizial zawrh an an vai reng a; a lawmawm. Mizoram State Anti Tobacco Day-te hian kan nei ta a nih hi. Dan loa ti an nih miau chuan man mai tur an ni rêng a. Hetianga zûk leh hmuam a ṭhat lohzia mipuite an zirtir ṭhin leh COTPA bawhchhiate an vâi ṭhin hi chhunzawm zel rawh se.

Chutiang bawkin, zu chungchangah pawh hian sorkar tha chakna hmang hian tun aia nasa zawkin hma la ve bawk ila mipui leh kan ram tan a va ṭha dawn em. Zu zawrh ṭhat leh ṭhat loh emaw, zu khap a ṭhat leh ṭhat loh emaw sawi ka tum lo a; zûk leh hmuam ṭhat lohzia kan inzirtir nasat ang bawkin, zu ṭhat lohzia kan inzirtir nasat a ngaih thu leh a khuakhirhna dan khauh taka kenkawh chungchang a ni sawi ka tum ni.

Zu ṭha titu ka la tawng lo a, a in ṭhinte pawhin ṭha an tih ka la hre lo a, hriselna atan a ṭha ti pawh ka la hre hek lo; ṭha ti lo chungin an in a ni. Mithiamte pawhin zu hi ṭha an ti ngai lo a, doctor-te pawhin a ṭhatna sawi tur an hre meuh lo. A ṭhatna sawi tur a awm lo mai ni loin, vaihlo ang bawkin mihring taksa tichhetu a ni tih hi kan pawm tlan dan a ni. Hman ní deuha Mission Veng Bial KṬP-in 'Zu' tih booklet an chhuahah pawh, doctor hriat hlawh tak pakhat chuan zu ṭhat lohna, taksa a tihchhiat theih dan a ziah kûr nguai a nih kha.

Zûk leh hmuam ti ṭhinte zûk leh hmuam an tih vanga an hriselna chhiat theih dan chauh em ni kan vei dawn? Zu-in a in
ṭhinte hriselna a tihchhiat theih dan hi kan vei ve dawn lo em ni? Vaihlo tite nun chhe tur pawi kan ti a, zu inte nun chhe tur hi pawi kan ti ve lo em ni ang?

Kan sorkar hian Mizo mipuite hma a ngai tak tak a nih chuan, COTPA bawhchhiate a vâi ang hian, MLPC Act bawhchhiate pawh hi vâi ve se. Zûk leh hmuam ṭhat lohzia an tlangaupui ang tal hian zu ṭhat lohzia hi tlangaupui ve se. A ṭul a nih chuan, Mizoram State Tobacco Control Society a din ang bawkin, Mizoram State Liquor Control Society-te pawh din ve ang hmiang. Zu chungchang bikah a khawihtu Excise & Narcotics department an awm kan ti a ni mai thei; anni hi chu MLPC Act & Rules kengkawh tur an ni a, zu ṭhat lohzia puangzar chiam tur an ni âwm lo e.

MLPC Rules-ah zu in tur chuan permit/licence neih a ngaih thu a chuang a, permit/licence neite chuan zu leiin an kawl thei a, an in thei bawk. Mahse, MLPC Rules Part-IV ah chuan, zu lei, kawl leh in phalna nei pawh puipunna hmunah te, mi dang nunphung tibuai theia zu kawl, in leh ruih khap a nih thu te, rûi chunga motor khalhte phal loh a nih thute a chuang. Heng chungchangah hian mi tuin emaw a report nghak loin, a vâiin vâi ve ila, MLPC Act bawhchhia leh khawlaia rûi hmuh turte hi an tlem phah viau lo'ng maw?

Tun kar tàwp lamah hian Reiekah Anthurium Festival hman a ni leh dawn a; chu'ng hmunahte chuan MLPC Act bawhchhia an awm leh awm lohte hi enforcement-te hian an vâi ngam dawn em? Vai ngam se, khawng takin dan kenkawh se, dan bawhchhiate chu man hmak hmak se kan ṭhat tlânna tur a ni ngei ang. Kum hmasa lama Anthurium Festival-a zu rûi leh MLPC Act bawhchhia an tam ṭhinzia lah mi tam takin hahípa an sawi a tling
ṭhin a nih kha.

Lammual a ni emaw, puipunna hmun dangahte hian squad drive neiin, MPLC Act bawhchhia an awm leh awm lohte vai ṭhin ni ve se, COTPA bawhchhia an man zat aia tam fe hi man tur an awm ziah mai lo'ng maw? Zu zawrh ṭan hmain, thuneitute'n khuahkhirhna hnuaia zu zawrh leh dan chu khawng taka kalpui an tum thu an sawi ṭhin. Tun dinhmunah erawh chuan MLPC Act hi khawng takin kalpui a ni tih sawi ngam a har rih hle. Puipunna hmunah zu rûi hmuh tur eng emaw zat an awm deuh zel a nih hi!

Khawlai leh puipunna hmuna zu rûite khuahkhirh kan mamawh ve hrim hrim a, dan ang taka hrem zel a ṭul hle mai. Khawlai leh puipunna hmuna zu (ruihhlo dang pawh) rûi ṭhinte hian mi tibuaiin, buaina siam kher lo mah se, mi dangte tan harsatna an siam nghal hrim hrim a; mi dangte 'right' an palzût a ni. Khawlai leh puipunna hmuna rûite hian mi dangte tan harsatna an siam a, thlamuang lo takin mite an awmtir a, mi nun an tirálmuang lo ṭhin. Rûi hmuh ringawt pawha hlauhthawng zek zek leh thlabár taka awmte pawh awm theih a ni. Chuvangin, khawlai leh puipunna hmuna rûite hi chu man hmak hmak zel ni thei se a duhawm ngawt mai.

Vaihlo leh zu hi thih chhanah puh ngawt a har mai thei a; mahse, a kaihhnawiha thia ngaihte chu an awm ngei mai. Kum khatah vaihlo kaihhnawih vangin mi engzat nge thi a, zu kaihhnawih vangin mi engzat nge thi tihte hi sorkar (sorkar agency)-te hian zir chiang thei se. Kohhrante'n zu an duh lo a, an duh loh vangin kohhran ringawt tih turah dah chi a ni lo ang. Sorkar hian tih tak zetin, vaihlo ṭhat lohzia a puangzar ṭhin ang leh a do ṭhin ang hian, zu ṭhat lohzia nasa zawkin puangzar se, MLPC Act pawh khawng lehzualin kengkawh se; kan ramah hian zu kaihhnawih vanga thihna a tlakhniam ngei a rinawm.

- K Zothanpara