MIZO ṬHALAITE
Mi pahnih khat awm dan ṭha lo avangin pawl leh khawtlang a hmingchhe thei a, kohhran kalphung a dik lo theih bakah kohhran huang chhungah boruak ṭha lo a thleng thei.
Ṭhangtharten sawi leh sel kan tawng nasa a. Thuziak tam takah leh kan ram hruaitute thusawi tam tak aṭangin kan hre hnem ta viau mai. Ṭhatna lai sawi ve tur pawh nei lo ang hialin nu leh pa tam zawkte hi chuan ṭhalaite hi min hmu a. Hna thawk peih lo, nu leh pa thawhchhuah sa ringa inti lian, zahna chang hre lo, tlawmngaihna pawh nei tawh lo anga ṭhalaite an sawi ka hre ṭhin a, a na ka ti deuh. Ṭhalaite tlawmngaih
ṭhinzia leh hna thawh hreh vak an neih bik lohzia mit ngeia ka hmuh ve fo avang hian mak ka ti ṭhin.
In veng, in khuaah mitthi lumen ngai an awmin mahni hrehawm pawh pawisa lova, mitthi chhungte an rilru hrehawmna te leh tawrhnate an theih ang tawka hnem tura zai tlaivar ṭhin kha tute nge? Ṭhalaite an ni lawm ni? An zai tlaivar ṭhak hnu pawha tlawmngai taka thlan lai ṭhintute hi nu leh pate an ni em? Ṭhalaite tho mawle!
Khawhar len pui a, riahpuitute hi tute nge, ṭhalai te tho an ni lawm ni? City bus-ah puitling zawkte
ṭhutna kian ṭhintute hi ṭhangtharte hi an ni lo em ni? Ṭanpui ngai nia an hriat
ṭanpui a, mihring nunna chhanhimna atana pawimawh lutuk, pawisa ina a lei theih loh, tlawmngai taka thisen pe ṭhin-tute pawh hi tute nge? Ṭhalai te hi kan ni lo em ni?
Heng lo pawh hi
ṭhalaite tlawmngaihna sawi tur a tam. Chuti chung chuan nu leh pate u, in fate hi tlawmngaihna nei tawk lo angin min la sawi zel dawn em? Hmanlai mite aia kan tlawmngaih lohna bik engmah a awm hran lo. Kawng tam takah phei chuan, kan pi leh pute tlawmngaihna khan tunlai ṭhalaite tlawmngaihna hi a tluk lo hial mai thei.
Mi hnuaiah hreh-awm tam tak tuara hna thawk a, mi dawr nghaka inhlawh a, mi insaknaa mistiri/ helper ṭhin hi tute nge? Nu leh pa te vek em ni? ni bik lo e...
ṭhalaite kan ni ve tho asin. India ram pawn Singapore, Dubai leh Malaysia etc. thleng thlenga hna thawk chhuak ṭhinte hi ṭha-laite vek an ni asin. Hna thawk peih lo, nula leh tlangval tiin min la sawi fo mai hi a mak a ni. Nge, hnathawk lo a leng ṭhalai ṭhenkhat, dinhmun ṭha tak taka ding in hmuh fo vang zawk?
India leh foreign thleng thlenga ram tana feh chhuak, mizo hming ti ṭhatute hi nu leh pa, sorkar hna lama dinhmun sang tak tak chelhtute chauh an ni bik lo; ṭhalai te an ni ve tho.
Kan ṭhatlohna leh kan fel lohna lam aiin kan ṭhat ve na leh kan fel ve nate hi in hriat sak tawn ta ila. Kan ram leh hnam hian a ṭhatpui zawk awm mang e.
- Nawlchunga Chinjah, Siaha