THIL HRIA NGE TAM INTIHRIA?

Thil ṭha lo lam kan sawi hian 'Mizo hi chu' tih kan ching hle mai a, mahni hnam kan indah sang vak lo niin a lang. Mi a chet chhiat emaw a chet ṭhin viau chuan a 'Zo' kan han ti leh ngawt zel. Incheina
ṭhing deuh hlek inbel kan hmuh chuan 'a zo ṭiah ṭiah' tih kan ching viau bawk. Mahni hnam hmusit lo hian inchawimawiin inchawisang ila hma kan sawn nasa zawk viauin a rinawm.

Miin thil an han sawi a, a dik lo lai lo chang ṭhin an awm emaw tihturin an thusawi ṭha tak tak phek hnih khat lai a awm karah a dik hlel deuh tlar khat pawh tling lo kan hmu lian lutuk ṭhin hi thil kan hre leh lutuk nge kan inti hre leh lutuk zawk ni ang tiin ka ngaihtuah fo ṭhin.

Nupui nu leh pa te koh danah inhnialna a tam hle a, chanchinbu hrang hrangah kan hmu nasa hle. Chanchinbu ni mai lo TV lamah te thleng pawhin inhnialna hmuh tur a awm ṭhin. 'Nupuite nu leh pa hi kan puzawn/ pizawn an nih avangin ka pi/ ka pu tih tur a ni' ti an awm laiin ṭhenkhat chuan 'ka nu/ ka pa tia koh hi a dik lohna a awm lo ve' an ti ve bawk. Thu ziaktu reng rengin an thu rawn ziahah nasa takin an ṭang a, a chhiartu tan khawi zawk nge dik hriatthiam a har hle.

Mi pakhat chuan 'hmeichhia hian khaw hrana mi pasal an neih dawnin pa an zawng ṭhin a, mipa chuan hmeichhe nu leh pa te hi a hranpa in kan va zawng ve lem pawn ka hre lo. "An fanu zawk a ni kan duh chu ni" tiin a sawi a, a dik hmel viau pawn ka hria. He thuah ringawt pawh hian a dik ber hriatthiam a har em em a, a ziaktute lahin inti hre em emin an ziak vek hlawm bawk si. Heng thu rawn ziaktute hian an hre tak tak nge an inti hre zawk ni ang tih chu ngaihtuahna a kal thui ber pakhat a ni daih thung.

Mizoram chhung chanchin te, ram chhung chanchin mai bakah khawvel huap chanchin ang zawng pawhin nise hre tak taka sawi tam tak an awm ṭhin. Tam tak hi chu hre tak tak lem lo, mi sawi eng aṭanga inti hre deuh a sawi an tam viau lawi si. Mizoram mipuiten hma kan sawn theih nan inti hre deuh ni lovin hre taka thu kan sawi hi a ṭul takzetin ka hria.

Hre zik tluak si lo, hre deuh reuh bawk si a thu vawrh darh ching kan neih nual avang hian mi tam tak kan tiphawklek ṭhin hi a zia lo hle bawk. Eng thil pawh ni se kan sawi chhawn leh hmain a rintlak em tih chian hmasak zel hi a pawimawh hlein ka hria. Hre hmasa, sawi chhuak hmasatu nih kan chak lutuk
ṭhin hian mahni mawng min hlimtir fo ṭhin a lo ni.

- C. Lalremmawia