Compensation buaia buai
Mizote hian awlsam tak sum hmuhna hi kan zawng nasa a, hmasawnna hna tam takin a ṭhuan-awp phah a, zawh tur hun bituk chhunga zawh hman loh chhan pawh hi sum kan duh lutuk hi a ni. Ram hmasawnna aiin mahni in chhung khur hmasawnnate kan ngai pawimawh zawk a, kan tuar mek a, kan tuar zel a rinawm, kan rilru kan thlak loh chuan.
Tuirial Hydel Project hi kan sum duh lutuk avangin thawk chhunzawm hlei thei lo khawpin kan suasam a. Compensation phut an tam lutuk a, MNF sorkarah khan an thawk chhunzawm thei lo a ni. Compensation changtute zingah kha-tihlaia poli-tician chhung leh khatte pawh an tel kha. Kolodyn Multi Modal Pro-ject turah pawh compensation buai bawkin kan buai a nih kha. Sum buaia kan buai ṭhin avangin hma-sawnna hna kal lai tam tak tihtawp a ngaih phah fo.
Tunah hian Sairanga rêl lût turin hma lak mek a ni a, hetah pawh hian compesation buaiin kan buai ang tih ka hlau hle. Mizoramin awlsam zawk, man tlawm zawka ei leh bar kan hmuh theihna tur hi tute emaw duhâm fal deuh avangin thawh hleih theih lohin a awm ang tih a hlauhawm hle. A hmaa ram nei ngai reng reng loin ram an nei thar thut ang tih te, ram nei sa, engmah chîng lo, dah hnim a, dah ngaw mai mai pawhin compensation sem a ngaih dawn hi chuan an ramah hian thlai leh thei tam tak zan khat thil thuah a ṭo thut thei ṭhin.
Ram neitu dik tak an awm a, heng miten an ram leh thlaite an chân avanga zângnadawmna an dawng hi chu a âwm hliah hliah mai. Ṭhenkhatte phei chuan ram hmasawnna tur, ram leh khawtlang tana thil ṭangkai tur a nih chuan an ram kha a pekin an pe tawp a, a nih loh pawhin a hming chauhin zângnadawmnate an la ve ṭhin. Chutiang mi dik leh fel, Mizoram hmangaih tak taktu karah chuan duhâm fal, hlawk thut tum eng emaw zat hi an lo inrawlh ve ṭhin. Heng mite hi a tam ber chu politician vua leh vâng an ni duh khawp mai.
Sairânga rel chawlh-hmun an siam turah te hian Sairang pa fel deuhte chuan Mizoram tan tiin an ram hlutna aia tlêm daih zângnadawmna te an la ang a, chutihlai chuan tute emaw hlawk phêt tum, ram pawh nei lo, thuneitute leh a buaipuitu lam hmelhriat avanga inrawlh phêt tum an lo awm ve ang tih ka hlau hle a ni. Ram hmasawnna, kan kawtkaia rel lo chhuak ve tur dang khawtlaitu an ni ang a, anmahni avangin Mizoram hian kan chan tur hi rei tak kan chang lo mai ang tih a hlauhawm hle. Kristian kan nihna hi hre reng ila, chu bakah Mizo kan ni tih hriain, sem sem, dam dam, ei bil thi thi kha i vawng reng ang u.
- Lalthununa Hrahsel