COVID-19 HRI KÂI PUN LEH HLUAI HMAIN AMC INTHLANG ANG AW

"Pathian leh kan ram tan" titu Party kal dan leh chêt dan hi chhui chiangin, sawi nawn leh lawk ang aw. Tute maw "Pathian leh kan ram tan" titu te chu? E le, MNF Party, Pu Zoramthanga leh a kaihhruai, a pawlte hi maw le. 

An pawl inrelbawl dan tlangkam titi ka lo hriat thawi dan chuan, MLA/Minister chuan Party-ah nihna a nei tur a ni lo tiin, Dr. R. Lalthangliana, Health Minister chu Party OB aṭangin President, Pu Zorama'n a ban a. A duh tawk mai dawn emaw tih laiin, MLA pawh ni lo, Minister pawh ni chuang lo Pu Tlanghmingthanga a ban leh bawk a. Tin, ngai teh; a duh tawk tawh mai dawn emaw tih laiin kum hnih chhung leka Health Department sum hman dan a chhui tir leh a, an sum hman dan dik lo an hai chhuak ṭeuh lehnghal! A ti lutuk tawh lo maw? 

Lunglei lama MNF hruaitu ni sa, Dr. Thangtea lamṭanga ngaih a ban chungchang kha chu sawi kìlh kèlh tawh lo mai ang. Mawm chawm châk ṭheuh ṭheuh, buai angin lang rih lo mahse, a hun a la thleng ang - a lan chhuah hun ngei chu. Introduction ka nei thui lutuk dawn e. 

MNF Party-in AMC inthlan an cho lo tih hriat theih turin October 5, 2020 a an Party thuneitu sâng National Core Committee (NCC), an party President Pu Zoramthanga hoa neih chuan MNF Block hruaitu inthlang loa inruat mai ni se an ti a. COVID-19 hri kâi hniam lam pan mek lai a ni nghe nghe. Ngaihtuahna fing tak anga lang hmanga mipui rilru hruai kàwi tum rânin rilru an sêngin a lang a. "Block inthlan pawh kan nei ngam lo a, kan inruat mek laia AMC inthlan te chu a," an tih theih turin, mipui laka hmai phih faina atana hman an tum ni ngeiin a ngaih theih. 

AMC hi tun dinhmunah MNF sorkarna a ni a, a theih chen chen pawhsei hi an rilru niin a lang. Inthlanna neih a, AMC sorkar an chân palh an hlau ni berin a lang bawk. Check & Balance a awm theihna atan an rorèlna hi an chân ngei a rinawm tawh si a, inthlan duh rih lo lamah an bán an phar tlat tawhin a rinawm. 

He mi avang hian AMC inthlan hi a hun pangngaiah min neihpui ngei ngei se tih ka rawt hnuhnawh duh a; ka rawt duh chhan pawh an rilru put hmang a dik tawk loa ka ngaih avangin a ni. COVID-19 hri pawh a la reh lo a, mahse a hma aia nasa fê in hri kâi kan tla hniam tawh a, a hun pangngaia inthlan ngei hi MNF tih loh Party hrang hrang duh dan a nih ka ring ta. An rilru put hmang chu dik se, ka ngaihdan hi ka auchhuah pui nawn kherin ka ring lo; ngaihdan nghet tak ka nei sa ràn. 

State Election Commi­ssion (SEC) hian AMC in­thlang tura rawtna hi Mizoram sorkar hnen aṭangin a dawng tawh em? October 14, 2020 kha chuan a la dawng lo ngei mai a. COVID-19 hri kâi pun chhoh mek laiin Village Council leh Local Council inthlan chu August 27, 2020 khan neih luihpui kan ni a, party hrang hrang leh mithiam tam takin neih rih loh mai nise tiin, sorkar leh SEC an ngèn lawm lawm chungin sorkarna siam mektu MNF Party chu a ngawi tlat a nih kha. 

VC leh LC inthlan neihna hmun hrang hrangah 60% aia vote tlak ṭhatna a awm mang lo bawk. Khati chunga mipui hriselna aia mahni Party tana ṭha tur chauh ngaihtuahtu chu MNF Party chauh hi an ni tih mipuiin hre nawn leh ila. Natna inkaichhawn theih hlauhawm tak a awm laia mahni pumpui chauh hmangaih hi sim tawh se a ṭha ngawt mai. A hmaa hri kâi pun chhoh dan leh tuna Mizorama hri kâi kan neih hi chu inthlau tawh tak a ni. Health Minister, Dr. R. Lalthangliana chuan, "tunhnaiah Mizoram, a bikin Aizawl khawpui chhunga COVID-19 hri inkaichhawnna ‘transmi­ssion chain’ chu chhut chah a ni a, vantlangah chhui hleih theih loh khawpa hri léng darh tur chu thawh­hona ṭha avangin ven a ni," tih sawiin, The Aizawl Post, Oct. 5, 2020 khan an chhuah tawh bawk a ni. Ṭawngṭaina nen, hri kái kan pun leh hluai hmain AMC inthlan vat hi a ṭha mai lo maw? 

India rama State pakhat Bihar pawh tunah hian State Assembly Election nei turin a inbuatsaih mek zel a, thawh thuma inthlan tur niin, October 28, 2020 hian thawhkhatna neih tur a ni. November 3, 2020 hian thawh hnihna, November 7, 2020 hian thawh thumna neih a, November 10, 2020 hian result puang turin an in buatsaih a ni. Tin, October 22, 2020 thleng khan Bihar-ah hian COVID-19 hrikai mihring 55839 an awm tawh a, he natna thihpui hi mi sang chuang fé an tling tawh bawk a ni. Heti chung hian inthlanna felfai leh hripui ṭaidarh lo thei tur berin inthlan an la tum fan a ni. 

Mizoram sorkar pawh hi inbuatsaih ṭha sela chuan VC leh LC inthlan khan in­thlan­na felfai leh hri kâi pun belh miah lo pawhin a awm theihin a rinawm a, inbuatsaihna ṭha lo tak karah election duty turin an training-na aṭangin an han kai darh hmasa nghal ngawt te kha in zirna tur leh kan hma lawka AMC inthlanna neih tur atan hian ṭangkaiah hmang thiam ila a ṭha ngawt ang. 

COVID-19 hian reh tih hun a neih mai hmel si lo a, he hripui awm reng chunga nun dan (Live with COVID-19) hi kan zir chhoh zel a hun tawh tak zet a ni.