Jabeza ṭawngṭaina

Jabeza chu lungngai tak chunga a nu hrin, mi khawngaihthlak a ni. A hmingah pawh ‘Jabeza’ tih a pu - a awmzia chu, “Na, tuar, lungngai” tihna a ni. “Jabez” tia an kohte hian a eih ve lauh lauh ṭhin ang a. A nihna takah chuan a hming hi a mawi lua lo! Mizo ṭawng chu ni se, “Na-a, Tuara, Lungngaia,” tihna ang vel a ni. 

Chu chu a hming a nih miau avangin, a hlim ber lai pawhin, ‘Na-a’ tia koh a ngai a. A lawm lai bera “Tuara” an tih pawhin a eih tho a ngai. Natna te, tuarna te, lungngaihna te hi amahah a bet tlat a. Inngaih hniamna leh tling lo riauva inhriatna te pawh a nei chek ang. Mahni chauhva a awm pawh­in a zak ru chem chem ṭhin ta ve ang. 

Inkiltawih reng rengin dam chhung ni a chhiar ve ṭhin mahna. 

Chutiang mi baihvai chu a nih avangin a chanchin hi thui tak ziah a ni lo va, a nunah hian chhui thui tur tam tak a awm lem lo a ni ang; mahse, a ṭawngṭaina erawh chzu Bible-ah a lang pha teh mial. 

A lo chawr chhuah­na a chhiat ve tehlul nen, a dinhmun a chhuanawm loh vei nen, miin an ngaihsan loh ve ṭhin nen, Pathianah chuan Jabeza hi a huai hle a ni. Tlangnel takin a ṭawngṭai a, chung lam hawiin, “Aw, mal mi sawm ngei ngei la…” a ti. 

“Mal min sawm ve ang che,” te chu kan ti ve fo, thil har pawh a ni hran lo. Mahse, Jakoba te, Jabeza te anga, “Mal mi sawm ngei ngei rawh” tih chat erawh chu a danglam a ni.  A thil dil hi a hraw hle. “Ka ramri hi mi zauh la, i kut chuan mi awmpuiin lung­ngaihna ka chungah a thlen loh nan sual lak ata mi thiarfihlim ang che,” a ti. 

Pathianin engtin nge a lo chhan? “I lo chawr chhuahna a chhe em mai,” tiin a hawisan lo. A dilna a lo ngaithla a, mal a sawm a, a chhang a ni. 

Jabeza ang hian kan awmna aṭangin ding chhuak ila, Lalpa i au ve teh ang u. Lalpa, “Kan ramri hi min zauhsak ang che,” tiin. “Kan ngam loh chalah chil kan hnawm palh ang e,” tia tlawm sa nghala ṭawngṭai lovin, “Kan intodelh si lo va…” tia pum zut chunga dawih aw chhuah hek lovin. Ring tlat chungin, “Mal min sawm ngei ngei ang che, kan ramri hi min zauhsak ang che,” tiin. 

Thil lian tak, hnam damna tling i dil ve ang u, Jabeza ang hian.