Mizo ṭawnghmang pahnih khat

Tur chein

Kan ṭawngṭaina thua kan ṭawnghmang hman ngun ber pakhat, kan hman sual tlangpui nia ka hriat ṭhin pakhat chu, ‘tur chein’ tih hi a ni. 'Heng kan thilpekte hi min tihthianghlimsaka mal min sawmsak tur chein', ‘Kan inkhawm hi min awmpuia mal min sawmsak tur chein...,' tih ang hi.

‘Tur chein’ tih hi a hmanna hmun tur dik zawk chu a awm ngei ang. Mahse, kan ṭawngṭaia kan hman dan tlangpuiah hi chuan, ‘turin’ tih maia dik êt si, ‘chein’ tih kan belh kher hian ṭawngkam a tiveikhawr deuh tlatin a lang.

‘Tur chein’ tih hi a hmanna tur dik zawk nia lang chu–'Aw Lalpa, i mite i biak bûka kan lo kal hian, thinlung leh tih tak zeta chibai bûk tur chein min ṭanpui ṭheuh ang che,' tih angahte hi chuan ‘tur chein’ tih hi a dik lohna a awm lem lo ve. Tunlaia pastor leh upate thlenga kan ṭawngṭainaa ‘tur chein’ tih kan hmanna tam ber hi chu a dik lo deuh tlat hian ka hre ṭhin.

Lawm thu kan hrilh a che

Kan ṭawngṭainaa Pathian hnena lawm thu sawi nana kan ṭawngkam lar leh hman thiam ber pakhat ‘Lawm thu kan hrilh a che’ tih pawh hi dik tâwk lo deuh tlata hriatna ka nei. ‘Kan lawm e,' emaw, ‘Kan lawm em em a ni,’ emaw ti mai lo va, ‘Lawm thu kan hrilh a che,’ tih kher hi Mizo ṭawng kalhmangah chuan a ulh deuh. Kan ṭawngṭai hian Pathian chu hmaichhana bia angah kan inngai ṭhin a ni si.

Chuti a nih chuan lawm thu kan hrilh pawhin, ‘Ka/kan lawm e,’ emaw, ‘Ka/kan va'n lawm em’ emaw tih mai tur ni âwm tak a ni. Kan mihringpuite hnena lawm thu kan sawiin, ‘Ka/kan lawm e,’ emaw, ‘Ka/kan lawm lutuk e,’ emaw kan ti mai ṭhin si a. “Pu Lal, motor min hmantir avangin 'lawm thu ka hrilh a che,' ti ta ila, pawhlah rawng a kai zawk thei lek lek ang em? Nge, Pathian biakna leh kan mihringpuite biakna ṭawngkam chu a hrang tur a lawm, kan ti dawn le? Chuti ni se, thil dangah kan tidanglam leh chuang si lo.

Amaherawhchu, mi ṭhenkhatin, tute ṭawngṭai emaw, an ṭawnghmang thiam loh leh dik tawk loh vanga, ‘Amen pawh ka pe duh lo ve’ lo tih vel erawh ka haw têk a; a titute ka khak chawpchilh fo. Kan biak Pathian chuan a hnena kan thu sawi leh thlente chu kan ṭawnghmang dik leh dik loh emaw, kan chham thiam leh thiam loh lamah a buai hauh lo vang a, thinlung lam a en zawk ang, tih kan ring tlat tur a ni.

Vantlang hriata lawm thu sawitute’n an lawm thu sawi duhnate chungah lawm thu sawi mai lo va, an hnena lawm thu an lo sawi tawh report chauh ni awm taka 'Lawm thu kan sawi bawk e,' tih mai kan ching pawh hi a pawhlah deuh bawkin a lang. 'KṬP member-te thingpui buaipuiin an hah em em a, an chungah Kohhran Committee-in lawm thu a sawi e,’ ti liam mai lovin, ‘Kohhran Committee a lawm em em a ni,' tih mai tur niin a lang.

- PC Hmangaihzauva