HMUNPHIAH

Mizoramah hian hmunphiah a ṭha duh em em mai a, ramhnuaiah leh dai velah te, kawngpui kamahte pawh tu’ma chîn leh phun pawh ni miah lovin hmunphiah hung lian tak tak hmuh tur a awm ṭhin. Mizote’n hmunphiah hi chi hnih lar tak tak kan neih chu–phiahpui leh phiahthir a ni âwm e.

Kan pi leh pute kha lo neia ei zawng an nih avangin an hun lai khan lo an vahnaah hmunphiah hung a tam viau chuan vah a tihhar phah em em ṭhin a, an ning thei hle ṭhin. Hlo thlawh hunah pawh hmunphiah hi a chawr chak a, buh leh thlai a dîp a na hle a, lo a tihnim chak si a. Chuvangin, hmunphiah hi lo tihartu, tihrêm har leh tihthih har si a ni.

Nimahsela, tunlaiah chuan hmunphiah chu sum chang thei a lo ni reng ta mai a, pi leh pute ngaihtuah phak bak a ni awm e. Mizote hian hmunphiahin sum tam tak tak kan la lut tawh tihte hi han hria se, awih har an ti ngawt ta ve ang.

Tunah chuan hmunphiah hmunte siamin hmunphiah kan ching ta sup sup mai chu a ni a, hmunphiah a ṭhat theih nan hma kan la ta sup sup mai a, thil inthlakthleng mak pawl tak chu a ni ngei ang. Hmanlaia lo tihartu ni ṭhin kha tunlaiah sum chang thei hlo a ni ta reng mai si a; ṭhangtharte hi kan va vannei tak em. I lawm ang u.

Hetia hmunphiah sum chang thei hlo a lo chan takah chuan mi tam takin sum lak luh nan hmunphiah kan ching ta a, kan la ching zel dawn ni pawhin a lang. Kan ramin sum leh pai hmuhna ṭha takah hmunphiah kan hman takah chuan, a chin danah te, a seng khawm leh a keh danahte kan fimkhura kan uluk a ngai hlein ka hria. Khawvel hmun hrang hranga mite’n an lei duh tura kan ram hmunphiah kan sawngbawl pawh a ngai a ni.

Mizote hi thil uluk peih lo tak hnam kan ni a, kan thil neih hlu takte pawh hi uluk taka kan sawngbawl peih loh avanga a hlut tur anga hlu lo leh man man zawka kan hralh theih loh a awm fo. Chutih lain, sum hmunna turah chuan dikhlel deuh pawha tih hreh lo kan awm leh ṭhin si. Entir nan, kan thil hralh tur a bûk rih nana thil dang dah telte leh a kara a ṭha lo dah tel ang chite hi; hei hi thil pawi tak a ni. Hnam dangte chuan hnam rinawm loah min ngaih phah a, kan Kristianna nen pawh a inhmeh lo hle. Chuvangin, hmunphiah pawh hi kan ram leh hnam tihmingṭhatu a lo nih a, tun hnu zela kan ramin sum leh pai lak luhna hnâr a lo nih zel theih nan uluk takin i sawngbawl teh ang u.

Kan hriat ṭheuh angin kan ram hian ruahtui kan dawng ṭha hle a, thlai chi tinreng chin theihna ram tiin kan chhuang hle. Nimahsela, kan ramah thlai thar aṭanga sum lak luhna kan nei lo em em a; mi ṭhahnemngaite’n châwmhlawm ram kan ni an ti fo reng a nih hi. Tunah hian sum chang thei–hmunphiah kan hre fuh ta a, sawrkar lahin theihtawp chhuahin kan hmunphiah thar chu kan hralh theih nan ṭan a la a. Chuvangin, keini hmunphiah chingtute pawh hian mite lei duh ngei tur leh an leitute pawhin an zawngchhang ngeina turin ṭan i la sauh sauh ang u.

Khawvel ram hrang hrangte hian an rama thlai eng emaw tak hi dinchhuahpuina an nei ṭhin. A ṭhenin bekang an dinchhuahpui a, a ṭhenin alu, a ṭhenin vaimimte leh thil chi hrang hrang–sawi vek sen a ni lo. Tunah kan rama ṭha duh em em, a hrana chin loh pawha kan ram leilunga awm sa hmunphiah, pi leh pute chuan lo tihartu tia an lo sawi kha, Pathianin kan ram tan sum hmuhna ṭha tak ni tura a lo ruat a ni ngei ang, kei ni tan sum chang thei hlo a lo ni reng si a, a lawmawm tak meuh a ni. Chuvangin, theihtawp chhuahin i buaipui teh ang u; khawvel hriata kan din chhuahna hmanrua a ni mai thei si a.

Hmanah pi pute len lai ni khan,

Sirah puan ang an lo hnawl che a,

Sakhming ṭha leh mawi pawh hlan loin,

Hnawm hnawk tinreng phiattu hmunphiah tiin.

Tunah kan ram sum leh pai kungpui i lo ni,

A riang fate’n par ang kan lawm che,

Kan ram dung leh vang, chhak leh thlangah hian,

Parin vul zel ang che aw.

- Hausanga Hauzel