Taxation department han che teh se

Taxation department chuan April 1, 2025 aṭangin dan loa Mizorama bungraw phur lut an check dawn ta a, a lawmawm khawp mai. Department chuan thuchhuah a siam tawh a, sumdawng leh mimal bungrua state pawn aṭanga dan loa lak luh tihtawp a tum a, Vairengte-a data collection centre-ah tax invoice leh eway bill dik lo neite a kaltlangtir tawh dawn lo niin a tarlang.

Nikum aṭang khan Mizoramah state pawn, a bik takin Silchar aṭangin vai sumdawng, bungraw chi hrang hrang phur, motor lian pawh ni lo, car thlengin hmuh tur an awm a; Aizawlah mai ni lo, Champhai leh Siaha thlenga phurin an hralh ṭhin. Ho ang reng tak, ngaimawhawm tak pakhat chu panhnah leh thil dang dang an phurin an hralh fo mai.

Heng bungraw phur tam tak hian dan loin a phurin an hralh ṭhin tih a chiang reng mai. Hman deuh khan maxicab neitute'n passenger phur tura an motor register ni si lo, man chawia passenger phur an lo check chiam tawh a. Chuta ṭanga lang chu passenger phur tur ni miah loin sumdawn nan car leh lirthei dangte an hmang nasa tih a hriat a ni.

Mizoramah phalna nei lo tan sumdawn a theih loh a, mahse, hnam dang thurualpui an tam tih pawh hriat a ni. A bikin sumdawng tênaute'n an ching leh zual a; hmeichhia hlei hlei hian an hrat viau. Mahni hnam phatsan ta lâwp lâwpa hnam dang kawp paha sumdawnpui hi engzat tak awm ang maw? Pasal nei lai pawh an bâng bik lo. Sum an hmuh theihna a nih phawt chuan an tan 'uire' tih vel chu nêp tak a ni ta.

Hnam dang (vai) ṭhenkhat, bike hmanga ṭhutthleng (plastic chair) rawn phura rawn zuar kual ta pawh hmuh tur an tam ta hle. Kolasib district chhung kawngpui dungah hmuh tur an tam zual a, kawng sira nu mâwl tak takte chuan a tlâwm avangin an bâwr hut hut mai a ni.

Silchar kawng tlangdungah car hmanga bungraw phur minute tin an insûlpêl zut zut mai hi a ngaimawhawm tak zet. Heng zawng zawng hi Taxation department-in Vairengte-a Data Collection Centre-ah uluk zawkin lo endik ngei teh se. Dan chu dan a ni mai a, dan loa sumdawnna chi reng reng tun aṭanga kan do loh chuan nakin lawkah chuan sumdawnnaah chîmral kan ni mai dawn.

Taxation department-in April 1, 2025 aṭanga tih an tum hi Mizoram leh Mizote tan thil ṭha tak a ni dawn a, mi tinte'n kan thlâwp tur pawh niin a lang.

- Lal Rinmawia