Zirtirtu an sawipuite kha An la ta em?

Mizoram chanchinbu hi chu thil hi an han ziak ve uk a, an bawhzui ngam leh tak tak lo a nih loh pawhin an bawhzui thu hi kan hre ve leh bawk si lo. MNF sorkarin zirtirtu advertisement chhuah miah lova mipui hriat lova an lo lak dan chanchin leh an dilpui dan an ziahte kha kan hre chak a ni. 

Kan Minister pakhat kha chuan a duhsak dan kha a han over mai mai khawpa sorkar hnaa la tura a ziahsak bakah “Chutah chuan attach-in dah rawh u,” tihte kha a ziak tel a, a zialo ngawt mai kha em em kha chu. Pakhat khan an lak chhan turah khan, “Lehkhathiam thei tak a ni a, he mi khua tan hian a la ṭangkai dawn a, zirna siam ṭhat kan tumna lamah hian a ṭha dawn,” tih lam ni lovin, “Ka iptepui banna,” tih kha a ‘criteria’ a ni ve leh tawp. Pakhat dang leh kha eng Merit List tih lam a ni ve lova, “Ka duhsak No. 1” tih kha a ni ve leh tawp bawk! He Zoramah hian khua a la var dawn lo. 

Zirna siam ṭhat hi he sorkar hian a rawn vei nghal chatin sawi nuam pawh an ti. Mimal takin zirtirtu 900 rual zet an lak danah khan ka lung a lo awi ve khawp asin. Zirtirtu an lak khan a khaw mi leh a khaw hnai an ti hram hram khan ai kal buaina hi a ching fel thei dawna ka hriat thu hi ka sawi ve ṭhin dan a ni. Aizawl pa thiam tak hi chhim tawp leh khawthlang tawpah an han dah a, a kal duh si lova dan lovin aikal a ruai kumtluan mai mai a. Tunah chuan aikal rawih ngai tawh lovin a khaw mi leh a khaw bu hnai mi an la a, hei hi thiam tak aikal la leh tho ai chuan an ṭha zawk a ni. 

Mihring hi famkim a harsa ve bawk a ni tih tilangtu chu zirtirtu a hlawma an lak dan kan fak zawh hma hmain a rukin iptepui bannaa mite an lo la leh mai mai hian zirna siam ṭhat an duh tak tak lovin a lan tir a ni. Mizoram zirna chuan hma a la sawn mai dawn lo tih ti langtu chu, “Ka duhsak zawng” tia kan ruling party hruaitu ngeiten an la ziah kulh mai avangin zirtirtu chu lo la mai mai teh se, tih ang vel hi tuna kan ram dinhmun chu a la ni. 

- Rosiamliana (RSA Chhangte)