Zaithiamte u, hlau lovin zai rawh u

28th February, 2025

Lungleia Mizo Zaimi Inzawmkhawm leh Music Domain Mizoram hruaitute chuan Chapchar Kut Organising Committee lakah an lungawi loh avangin, an member zaithiamte chu kumina Lungleia Chapchap Kut lawmnaah zai lo tura an tih thu ka lo hre ve a. Chapchar Kuta zai lui chu an member aṭangin an bân dawn a, an dam chhungin member an ni leh thei tawh dawn lo a ni awm e. Sawi chak deuh deuh ka nei.

Media lama ka lo hmuh danin, MZI leh MDM ten hetianga thutlukna an siam chhan hi inhriattirna awm lova Chapchar Kut Organising Committee aṭanga paih an nih avang te, an hriatpuina tel miah lova Chapchar Kuta zai tur an ruat avang leh, zai tur ruat vek tawh hnua Organising Committee member atana telh leh hnuhnawh si an duh loh vang niin a lang.

Lunglei Chapchar Kut Organising Committee-ah hian tun hma aṭangin tute nge tel ṭhin tih ka hre lem lo a, MZI leh MDM aiawh an tel ve tawh ṭhin a ni mai thei. Aizawlah chuan MZI leh MDM hi Organising Committee-ah an tel ngai lo niin an sawi a, Organising Committee-a an tel loh avangin an sawi buai ngai lo va, Chapchar Kuta zai tur thlanah pawh sawi leh sêl an nei ngai lo niin a lang bawk.

Lungleia MZI leh MDM thutlukna hi zaimite hma an ngaihna leh duhsakna niin a lang lo va, anmahni, pawl pahniha hruaitute chapona leh thuneitu nih duhna rilru lang chhuak ta mai niin a lang. Chu rilru, pawla hruaitute lungawi lohna chu zaimite'n an tuar dawn ta a ni ber mai.

Zaimite ka chah ve duh chu –' Lungleia Chapchar Kut hman turah hian in duh phawt chuan zai rawh u, MZI leh MDM-te hi hlau duh lem suh u,' tih hi a ni. In zai avangin MZI leh MDM chuan an pawl aṭangin an lo bân ta che u a nih pawhin, eng nge pawi? MZI leh MDM member in nih avang khan eng nge hlâwkna in neih? Sum leh paiah leh lârnaah hlâwkna in neih phah lêm lo a ni lo'm ni?

Zaithiam chhuak tharte phei chuan MZI leh MDM hi eng hêhû-ah an ngai tawh lo. MZI leh MDM innghirngho reng kara awm ai chuan awm loh ve ve duh zawk hi an tam tawh. Pawl tel lovin engkim a tih theih; pawl inrawlh miah lovin social media chak tawh tak avang hian a lâr theih tawh lutuk; zaithiam hlawhtling tak a nih theih tawh. Chuvangin, hlau suh u, in duh phawt chuan zai rawh u.

Lungleia MZI leh MDM hruaitute khan zaithiamte lawmman/hlawh an bituk thar a, Lunglei khaw chhungah Rs 5,000 aia tlem lo leh Lunglei khaw pawnah Rs 10,000 aia tlem lo, an ti a ni awm e. Hei hi a taka zawm chuan loh tur a ni.

Tun hmain MZI hian zaithiam rate an lo bituk tawh ṭhin, zawm a ni ngai chuang lo, zawm tak tak theih a ni lo. Rate an bituk ang hian kal tak tak ni dawn se, zaithiam ni ve si, miin an sâwm ngai miah loh tur an tam. Sawm ngai miah loh zaithiam niha pawisa lak luh loh reng ai chuan, rate bituk aia tlem pawha zaiin, zaina tur hmuh tama lak luh theih a ṭha zawk tlat.

- Lalremsanga