IAF enkawltir mai a ṭha zawk lo’ng maw? (Mizo pilot-te ngaihdan chhiar rawh le)

Indian Air Force (IAF) hnena Lengpui Airport enkawltir chungchangah sawi a tam ta hle mai. Hre tlem tak ni mah ila, kei aia hre bik lo tura ka ngaihte pawhin media lamah an rinthu leh zêldin thute an au chhuahpui ve tho alawm, tiin ka inthlahrung duh ta bik lo.

Khaikhawm nghal ngawt ila!

Chanchinbu leh social media te, TV/Youtube interview aṭanga mi ziah leh sawi aṭanga ka lo khaikhawm ve dan chu, Mizo zinga airport leh aviation kalphung (system & management)-a a taka tawnhriat nei zinga a tam ber chuan Lengpui Airport hi IAF enkawltir an pawiti lo. A taka tawnhriat nei zinga IAF enkawltir duh lo ka hriat chhun chu MNF-a nihna pawimawh tak nei wing commander (retired) pakhat hi a ni maiin ka hria!

Kum 2015 khan...

Congress party an sorkar lai, kum 2015 vel khan Mizoram sorkarin Lengpui Airport hi IAF hnenah hlan tumin hma an lo la tawh a, chumi chungchang chu October 12, 2015 khan khatih laia chief secretary Pu Lalmalsawma’n a pisaah press conference neiin a sawifiah.

Chief Secretary chuan, IAF hnena sorkarin Lengpui Airport hlan a duh chhan ber chu – state sorkar phurrit mi danga bel a nih thu leh, thutlukna la awm lo mah se, ngaihtuah mek a ni a, Cabinet-in a la ngaihtuah dawn thu a sawi. Lengpui Airport chu Airport Authority of India (AAI)-ah hlan tum ni tawh mah se, AAI-in security zawng zawng Mizoram sorkar tum tura a tih avangin inrem theih a nih loh thu te; IAF-in Lengpui Airport an enkawl chuan security lam operation area– runway, runway lights, ILS leh communication hmanruate an enkawl ang a, terminal building leh apron erawh chu Mizoram sorkarin a enkawl zui tur thu te; IAF-in operational area-ah venghimtu an tum ang a, terminal building venhimna chu state sorkar mawh a nih tur thute leh, ruahmanna dang dang a sawi bawk.

Ka tawnhriat ve hotê

September 2022 khan Defence Tour hmangin India hmarchhaka Defence hmun hrang hrang kan fang a. September 14-ah Guwahati Air Force Station kan tlawh a, a tûk September 15-ah Tezpur Air Force Station kan tlawh leh bawk.

Guwahati Air Force Station (AFS)-ah hian jet fighter a awm lo a; helicopter leh missile base AFS a ni a, helicopter te, Donier 228 leh missile-te leh thil dang dang a awm. Station-a hotupa ber Air Commodore Atul Saggar leh officer dangte nen kan inkâwm a, officer-te'n hmun hrang hrang min fanpuiin, min hrilhfiah a; kan hriat duhte kan zawt bawk. An sawi pakhat chu, Guwahati AFS hian runway hranpa a nei lo a, Guwahati Airport runway a ring ve nghal. Guwahati Airport khu IAF leh khualzin phur thlawhnate'n an inhman ṭâwm tihna a nih chu – chuti chung chuan India hmarchhak biala airport lûn ber a ni.

Tezpur AFS-ah erawh chu jet fighter base a ni a, runway hranpa a nei a, khualzin phur thlawhnain an hman ṭâwm lo. Wg.Cdr. Amitabh Ranjan leh officer dangte'n min fan kualpui a. An sawi danin, Tezpur AFS-ah hian air squadron pahnih a awm a, squadron khatah jet fighter 18 awmin, a vaiin 36 a awm a, Sukhoi-30 vek a ni. Indonaa hman chi helicopter eng emaw zat a awm bawk. Sukhoi-30 jet fighter 30 chuang awmna a nih bakah, mi dangin an hmanpui loh runway an nei bawk a, kan awm lai pawhin thlâwk chhuak leh ṭum an awm zut a ni.

IAF-in enkawl ta se

IAF hian India ramah AFS eng emaw zat an nei a, AFS tling pha lo unit tam tak an nei bawk a; Mizoramah pawh Lungleiah hmun (unit) an nei. India rama AFS zawng zawng hi jet fighter station a ni vek lo a, IAF hian jet fighter an dah vek lo. IAF-in airport an neih leh enkawlahte pawh jet fighter an dah vek hek lo. IAF enkawl Silchar Airport leh Bagdogra Airport-te chu helicopter base a ni a, jet fighter an dah lo a, Chandigarh Airport pawh transport base a ni.

Lengpui Airport hi IAF-in an enkawl a nih pawhin AFS a ni dawn tihna a ni kher lo; a ni dawn lo tia sawi theih pawh a ni chuang lo. AFS-ah lo hmang ta pawh ni se, jet fighter base atan hmangin jet fighter an dah ngei dawn tihna pawh a la ni lo leh zel bawk. IAF-a officer nia kum 20 vel lo thawk tawhte kha chuan a ram hmelhmang– tlang leh ruam awm dan vel avangin jet fighter base a nih an ring lo a nih nghe nghe kha. Jet fighter an dah loh miau chuan mi tam takin ni tura an lo ngaih– jet fighter exercise tih vel avanga passenger flight tihbuai chu a awm vak dawn lo tihna a ni ang. Indona leh rîkrum thilah erawh chuan jet fighter an dah ngei ang chu; hei hi chu IAF enkawl airport a nih leh nih loh lam a ni tawh lo.

MIZO PILOT-TE NGAIHDAN CHU LE

IAF hnena Airport hlan chungchang ziah ve ka tum avang hian Mizo pilot thawk mek pahnih chu an ngaihdan ka zawt a; anni chuan IAF hnena hlan an pawiti lo. Anni hi kum 20 chuang ve ve khualzin phur thlawhna lo enkawl tawh, a nâka zen tak taktu an ni a, an ngaihdan hi pawm tlak hlea ngaih tur a ni ang.

Mizo pilot pakhat zawk chuan, “IAF an awm chungchanga tuna an hlauh ang hi chu flight operation lamah chuan ka ṭâwmpui lo. A hlauhthawnawm lo. Duh duhin an tibuai ang, tih vel hi chu a dik lo… Agreement ṭha taka an sign thei a nih chuan, IAF chuan sum an nei a, airport leh runway an rawn upgrade thei a nih chuan a ṭha alawm,” a ti.

India ram hmar lam leh NE-a airport tam tak chu IAF-in an hman thu a sawi a, “Hmun ṭhenkhatah civil flight han tihbuai zauh zauh chu a awm ve a, mahse, min hrilh lâwk vek a, kan insiam rem mai a, thlawh chhuah theih loh leh ṭum theih loh phah a awm lo,” a ti. Jet fighter awmna Jorhat leh Tezpur-ah pawh harsatna a awm ngai loh thu te, Lengpui Airport runway chu PCN (Pavement Classification Number) a hniam avangin Delhi flight-ah passenger lak zatah restriction a awm thu leh Kolkata erawh chu a hnaih avangin restriction a awm loh thute a sawi bawk.

Mizo pilot dang leh chuan, “(IAF an awm avangin) A tihbuai phahna tur ka hre lo. Fighter-te’n exercise an lâk cháng a awm a, chutiang a nih pawhin a tihbuai lohna chinah an ti mai ṭhin. Delhi-ahte pawh Republic Day-ahte show an nei a, chungah pawh chuan an tihna tur huam chhung bik an khâr a ni mai a, thil dang a tihbuai ka hre lo,” a ti.

Hriat/thiam zawng kan nei

Airport chungchangah hian civil service lama kan mithiam tak takte pawhin an ngaihdan an puang chhuak a; a ṭha. Mahse, mithiam takte pawh hian hriat zawng leh hriat loh zawng an nei vek a; an hriat zawng an hriat viau laiin, an hriat loh lamah erawh chuan ngawng ve tak an ni fo.

IAS emaw, all India/central service-a tling theite hi an ngaihsanawm em em a, mahse, thil an hre vek bik lo tih hriat a ṭha. IAS an nih vang ngawtin kawngpui siam dan ṭha leh kalphung an hre ngawt lo a, Navy, Army leh Air Force lam thil pawh an hre ngawt lo; infiamna (sports) lama kalphung leh chanchin phei chu an hre lo lehzual duh viau. Chuvangin, an hriat bikna (expert) thil ni lo-ah chuan hre viau ni àwm taka an awm loh ngam ve pawh a ṭha àwm e.

IAF hnena Lengpui Airport hlan duh lotute hian eng zirchianna nge an neih aw? IAF awmna airport an sawi ṭhin; chu’ngah chuan khualzin phur thlawhnate’n harsatna an tawh leh tawh loh hi a hmunah an zuk finfiah em? A taka tawngtu, airport hmang ṭhintu mipui an kâwm nual ang em? Chutiang awm si loin rinthu an sawi mai mai zawk a ni ang em?

Hlauh ngah Mizote

Mizote hi hlauh ngah tak kan ni tiin mi ṭhenkhat chuan an sawi ṭhin; a dik vek lo a, a dikna chin erawh a awm. Aadhaar hlau, Unique Identification hlau, khawchhak lungpui lum hlau tlat, Sairang thlenga rél kaltir hlaua duh lo, ram hmasawnna tura hmalaknaah hlauhthawn neia duh lo ta maite kan awm nawk a nih hi. Hengte nen hian IAF hnena Lengpui Airport enkawltir hlau tlatte mi ṭhenkhat chuan huang khatah an dah hial mai thei e!

Hmachhawna tâwn tlang a ngai

Mizote'n khawvel kan dai dar zau telh telh a, hnam dang nen kan inpawlh nasa tial tial. Ram dangah hna thawka awm kan tam tial tial a, hnam dang pawh kan rama awm an tam zual zel. Hei hi khawvel inher danglam zel leh hmasawnna thar awm zelin a ken tel a ni. Hnam dangte hi kan hnualsuat ngawt tur a ni lo a, thawhpui thiam a pawimawh.

Mipuiin hmasawn zel kan duh a, kan ram pawhin hma sawn zel se, changkang zel se kan duh a; ram tihmasawna tichangkang turin sorkar pawh kan beisei. Ram hmasawn leh changkang zawk ni tur hian keimahni Mizo ringawtin thil tih vek theih a ni lo a, kan theihna leh thiamnain a phâk lo a, kan sum leh paiin a tlin lo. Ram hmasawn leh changkang zawk, dinhmun ṭha leh sang zawka awm ve kan duh a nih chuan min tihhmasawnpui thei tur kan zawn a ngai a, tihmasawn theitu turte kan thurualpui thiam a ṭul. IAF hnena Lengpui Airport enkawltir chungchangah pawh hian, airport ṭha leh changtlung zawk kan duh a nih chuan, mi tam takin an hlauhthawn leh an duh loh chhante hi kan hmachhawn ngam ve a ngai ang.

Politics-a inbeihna

IAF hnena Lengpui Airport hlan duh lohna thu leh a ṭhat lohna sawi kan hriat tam ber hi chu politics-a inbeihna, sokar hmalakna dodal hrim hrim tumna a ni. Duh lo zingah NGO Coordination Committee an tel a, anni hi chu politics-a hamṭhatna an zawn vang a ni lo turah ka ngai a; dik tak maw? Congress party phei chu IAF hnena hlan duhtu leh hlan tuma thui tak hma lo la tawhtu an ni a; tuna taka an han dodal leh hi chu – ṭha lo an tih tak tak vang ni loin, politics-a inbeihna vang bâk a chhan sawi tur a awm lo.

Tun hma aṭanga tun thlengin sorkar thil tih rêng rêng sawisel a, dodal chiam hi kan political party-te kal duh dan a la ni zel a; hetiang hi chu kalsan tawh ila a ṭha hle ang.

‘Hralh’ tih ṭawngkam hi

IAF duh lotute’n ‘hralh’ tih ṭawngkam an hmang ṭhin hi a zialo tak zet a; hma latute diriamna, mipui rilrua huatna tuh tumnaah a ngaih theih. ‘Hralh’ tih awmzia dik tak chu kan hre vek ang, ‘hralh’ letling chiah chu ‘lei’ a ni. Hralh leh lei awmzia kan hre vek; sum emaw, a aiawh emaw a tel ṭhin a, neitu nihna pawh a inthlâk hlawk ṭhin.

Political party mite’n ‘hralh’ tih ṭawngkam an lo hmang a nih pawhin, NGOCC hruaitu, mi zahawm tak tak, zirna lama thleng sang tak takte hi chuan hmang tawh lo se a mawi hle ang. Political party mite pawhin party-a an nihna piah lamah hian kohhran leh khawtlangah nihna leh mawhphurhna pawimawh tak tak nei an ni ve bawk a ni tih hriain, ṭawngkam ṭha leh dik zawk hmang thei se a duhawm.

Tlipna – Ka ngaihdan

IAF hnena Lengpui Airport hlan hi thâwm a awm ṭan tirh lamah kha chuan a ṭha lo zawk mai àwm mang e aw, ka ti rilru. Mahse, mi hrang hrang sawite ka’n hriat belh zel a, airport leh aviation lama a taka tawnhriat nei, kalphung leh inrêlbâwl dan (system & management) a taka hun rei tak tawng tawhte ngaihdan pawh ka’n hre chho a; chu’ng mite chuan min hmin ta viau. IAF hnena hlan duh loa dodaltu zinga a tam ber hi chu a taka tawnhriat nei miah lo, rinthu leh thu dik tawk lo nena thil ti kual vel mai mai niin ka hmu. Hre tlem viau mah ila, a tam ber phei hi chu kei aia hre zawk bik lo tura ka ngaihte an ni.

Mizoram sorkar hian Lengpui Airport hi IAF enkawltir ngei se ka ti hran lo a; an lo enkawltir a nih pawhin a pawi lo ang, tih ngaihdan ka nei ta a ni ber. A enkawltu chu tu pawh ni se, kan rama awm a ni a, Mizote ta a ni reng dawn a, Airport a awm chhung chu a hmang ṭangkai bertu pawh Mizoram mipui kan ni zel ngei ang.(Phek 7-ah zawm a ni)

- K Zothanpara