Eiruk vanga hrem tawh LADC CEM-a dah hian kei chu min tihrehawm a ni

Eirukna thubuai ngaihtuahtu Special Court (Prevention of Corruption Act)-in eiru ngei tuih a finfiaha thiam loh a chantir tawh Pu V. Zirsanga chu LADC Chief Executive Member (CEM) atan February ni 27, kum 2025 khan lak luh a ni a, ZPM sawrkar a ni. Eiruknaa fihlim tur nia insawi leh eirukna haw tak nia insawi ZPM party-in Court-in eiruk vanga a hrem hotu pawimawh taka an dah hian kei chu ka rilru an tina a ni.

Pu V. Zirsanga hi amah ka hre lo va, ani pawhin min hre lo. Chuvang chuan amah ngawr ngawr va huat chiam chhan tur ka nei lo va; mahse, a thuneihna hmang suala eiru tih Court-in a finfiah tawh a ni a, chuvang chuan politics aṭang leh ram hruaina aṭang hian bo vang vang se ka ti em em a ni.

Spoecial Court (PC Act) chuan Pu V. Zirsanga hi LADC Executive Member i/c Education (Middle School) a nih laia dik lo taka thil ti-ah puh a ni a, mi dangte pawh an tel. Court Judgement-a a lan dan chuan, Pu V Zirsanga leh a thurualpuite'n Mizoram sawrkar sum Rs. 1,33,56,884 (nuai 133.56) an khawih chingpen a; sum an tihchingpen aṭang chuan Pu V. Zirsanga hian Rs. 21,00,000 a chang a ni.

Hei vang hian Special Court chuan Pu V. Zirsanga hi nikum 2024 January ni 19 khan thiam loh chantirin, a hnu lawk January ni 22-ah hremna tur a puang a, kum 4 chhung jail-a tâng tur leh Rs. 4,00,000 chawi turin a hrem a ni.

Court-in eirukna thubuaia thiam loh a chantir lai leh a hrem lai hian Pu V. Zirsanga hi LADC-ah CEM a ni a, chumi hnuah a kaihhruai sawrkar chu a tlu zui a. District council sawrkara hotu lu ber eiruk vanga hrem a ni hi a mawi lo tak zet ZPM pawhin press release an siam phah hial. Lai District ZPM phei chuan, "LADC-a MNF rorelna kal mek CEM Pu V. Zirsanga’n eirukna thubuai a neih avanga jail bang zut a, LADC suspend a ngai ta hi a hnam ang pawha mualphona namenlovah kan ngai,” an ti hial a ni. Mahse, tunah CEM-ah an dah leh si!

Eiruknaa fihlim tura intiam, eirukna haw em em tura kan ngaih ZPM-in Court-in eiruk vanga a hrem Pu V. Zirsanga an la lut leh LADC-ah dinhmun sang ber CEM an nihtir leh si hi kei chu hrehawm ka ti a ni, ZPM ni miah lo mah ila, ka rilru a lo nâ ve ngawih ngawih.

Pu V. Zirsanga CEM an nihtir hian ZPM-in corruption an huat tak tak lohzia a tichiang viau ka ti a. Corruption duh loh angin an ṭawngkam thiam chi tinreng nen sawi chiam mah se, ka ring tawh kher lo vang. Ṭawngkaa sawi ringawt hi a ni lo, kan duh leh kan duh lohte chu kan thiltihah a lang tur a ni.

ZPM hian beiseina sang tak ka lo nei ve a. LADC-ah hian sawrkar siam loh pawh inhuamin eiruknaa fihlim lo hi chu hnawl ngam se ka va ti tak em...!

- Lalduhmawia