Congress sawrkarin IAF hnena Kan Airport hlan an tum tawh dan
Vanglaini ka hai let chiam a, ka zawn ber–khatih laia Chief Secretary Pu Lalmalsawma'n Lengpui Airport chungchanga press conference a neih chungchang October ni 13, 2015 issue-ah ka hmu chhuak hlauh mai.
Congress party-in sorkara thuneihna an chan lai October 12, 2015 khan Chief Secretary Pu Lalmalsawma chuan a pisaah press conference a nei a, Mizoram sorkarin mi dang hnena Lengpui Airport hlan a tum dan leh hlan a duh chhan a sawifiahna tarlan a ni a. Sorkarin mi dang hnena Lengpui Airport hlan a duh chhan bera a sawi chu, state sorkar phurrit mi dang hnena bel duhna leh tumna vang a nih thu a sawi.
Chief Secretary chuan, "Airport hi sawrkarin IAF kutah kan pe ang, pe lo ang, tih a la awm lo a, ngaihtuah mek chauh a ni a, Cabinet-in a la ngaihtuah ang," tiin a sawi a ni.
Hengte hi Chief Secretary-in a sawi tlangpui dang, Vanglaini-in a tarlante a ni.
* Lengpui Airport hi Airport Authority of India (AAI)-ah hlan tum a ni tawh a, mahse, AAI-in security zawng zawng Mizoram sorkar tum tura a tih avangin inrem theih a ni lo.
* IAF lamin Lengpui Airport chu an operation atan pawimawhna a neih avangin hman hawh (lease) turin June 24, 2015-ah Chief Minister hnenah ngenna an thlen.
* IAF ruahman dan chuan, IAF-in Lengpui Airport an enkawl chuan, security lam operation area–runway, runway lights, ILS leh communication hmanruate an enkawl ang a; terminal building leh apron (thlawhna dinna) erawh chu Mizoram sorkarin a enkawl ang. Hetiang hian IAF-in Guwahati, Silchar, Bagdogra leh Mohanbari airport-te an enkawl mek.
* IAF-in operational area zawng zawngah venghimtu an tum ang a, terminal building venhimna lam erawh state sorkarin a tum ang.
* Operation area aṭanga sum lutte chu IAF-in an chang ang a, terminal building leh car parking aṭanga sum lut chu state sorkarin a chang ang. Terminal building leh parking aṭangin chawhrualin kum tin cheng nuai 200 vel hmuh ṭhin a ni.
* Airlines-te'n airport runway an hman man (landing fee) chu AAI-in an chang.
Hengte aṭang hian Congress sawrkar khan IAF hnenah Lengpui Airport hlan an duh a, hlan tumin hma an la ngei tih a chiang viau mai. Tin, AAI hnenah pawh hlan tumin hma an la a, mahse, an inrem theih loh avangin AAI lam chu an hawisan ta tih pawh a chiang.
Tunah hian Congress party hian an sawrkar laia an kalpui dan ang thova ZPM sawrkarin hma a la ve leh chu sawiselin an dodal leh ta chiam mai si! ZPM sawrkar hian Congress sawrkar tih dan ang thovin hma an la a; AAI an dawr hmasa a, a remchan loh avangin IAF lam an hawi leh ta mai niin a lang.
Congress ho hi ruling party an nih lai leh opposition party an nih laia an rilru a dang a, ṭha an tih zawng leh ṭha lo an tih zawng pawh a dang daih mai! Thil mak tak zawng a ni.
Tunah hian Congress ho hian IAF hnena hlan dodalin, AAI hnena hlan an duh thu an hotute'n an sawi a ni awm e. AAI hnena hlan a remchan loh dan chu an sawrkar lai khan an hre chiang viau tawh tho si! A mak ngei e, ṭhiana!!
- Zodinsanga