Assam Rifles hmunhma luahtu tura ka duhte

Mizoram State Day of Prayer 2025, kohhran hrang hrangte leh political party hrang hrangte’n kan han hmang za thei kha a va lawmawm em! Lalpa’n ropuina chang mawlh rawh se. He ni pawimawh leh chhinchhiah tlak taka Dr. P.C. Biaksiama ṭawngṭainaah, sipai hmun kan nei let leh theih avanga Pathian hnena lawmthu sawi tel nachang a hria kha a va ropui em!

Sipai hmun kalsan tur ramte hi ka hriat dan hi dik tak maw, Zarkawt MacDonald’s Hill-ah hmun ṭha tak zau vak lo, Tuikual South & North, Dawrpui, Khatla leh Tuikuahtlanga awmte hi ka rawn rinzawn/tinzawn ve tawng mai dawn e.

Heng hmunhmate (a bik takin, a building-te hian heritage value an nei) hi tiang hian kan sem zai ve ringawt teh ang. Mimal, pawl leh sawrkar department-te pawi ka lo sawi palh hlauh chuan ngaihdam ka dil nghal e. Sawrkar pawisa neih leh neih loh lam ka hisap lo, ka duhthusam mai a ni tih min lo hriatpui bawk u la.

Business din dawnin mithiamte chuan pawisa mamawh tur (capital/seed money) hi business din dawna thil pawimawh hmasa ber pathum zingah a pathumnaah an dah chauh a ni awm e. Kan inang lo awm kher mai! A pakhatnaa an dah chu, business neitu/enkawltu tur an ngai pawimawh hmasa ber, a dawtah plan/scheme a ni. Chuvangin, hlemhletna tel lo, ngaihtuahna fim tak kan hman chuan kan Pathian thil ti thei hian min pui chak ngawt ang tih hi ringhlel hauh lo ang u.

Aw le, veh kual veh kual loin, sipai hmunhma luah ngei tura ka duh leh siam rem ngaia ka hriatte list chu han sawi ila.

1. Legislative Assembly House hian kawngpui a hnaih lulai lutuk. Session neih laiin motor traffic lamah vantlang chet velna a tibuai a, bengchheng a tam. Security chungchangah pawh sawn chhuah ngei hi a ṭuah tawh tak zet. A hmun ṭhalai berah awm ngei se.

Kan Assembly House hman mek hi Aizawl Municipal Corporation (AMC)-in chang ta mai se.

2. State Library atan changtlung tawkin awm se, e-library, e-learning centre, etc keng tel vekin han dah/duan ni se.

3. State Museum kan neih sate hi a bei tham deuh, changtlung takin awm se. Arts and Culture departmen office, Vanapa Hall thar leh typical village te keng tel se, Tuna Vanapa Hall hi parking-ah let daih ila.

4. Raj Bhavan Lawn (Mual te, kawngpui bul) etc. sawn kawng zauhna a dal avangin sawn luh mai ni se. Remchang dang, entir nan CM Bunglow-ah hman hlauh ni ta zawk se, CS Bunglow nen a inhnaih ṭha dawn si (State mi pawimawh ber pahnihte inhnaih mawi tawka awm hi a ṭha riau a ni). Amaherawhchu, a building leh compound dang erawh tihdang lam nasat vak ni lo thei hram se.

5. State Guest House thar awm thei ngei se.

6. War Memorial Monument, Aizawl kum 100 tlinna monument & Pu Laldenga thlan, Treasury Square-a mite leh hriatrenga phun zel tur hisapin sawn leh siam ni se.

7. Botanical Park (Japanese type-in, Mughal & European type ni loin) nuam tak, zau tak dah ila; amaherawhchu, a chunga building kan rawn tarlante khian open lawn nuam tak, tê chhe lo keng tel vek se.

8. Mandir, Canteen Kual-a mi saw sawn luh ngei dan awm bawk se.

Ka insawi tui ta sa sa, department, etc pawisawi hlau tak chungin hengte hi kan thailang leh hram.

MINECO-A sawn luh atana ka îtte leh thil dangte

1. Accounts & Treasury Officem Chanmari-a awm saw, dawrtute tan parking a awm si lo, an office pakhat MINECO-ah a awm tho tawh bawk si, MINECO-ah tho sawn dah theih ni se. Tuna MINECO an office building-a an leng lo a nih pawhin building dang ngaihtuahsak ni mai se. Tuna building Chanmari-ami saw lilâm mai ni .

2. Chief Medical Officer, Aizawl East, Dinthar Veng pawh a chunga mi ang chiah khian kalpui theih ni se.

3. Power & Electricity Department, Electric Venga mi saw, a department sawn tlawmngaih chhuahin kan loneitute thar chhuah, maxicab, etc Aizawl Bazarpuia zawrh tur rawn phurtute parking zauh nan an hmun saw boruakah tuna parking level sawn an ram tibuai lutuk lo sawn han kian thei se.

4. Agricuolture leh Horticuolture department building-te MINECO-a sawn phei a, a dawrtute a bik takin, kan loneitute dawr awlsam nan heng department pahnihte hi MINECO lamah inhnaih takin awm dun thei se. Tuna an building hman mek leh sak mek saw thil dangah hman ṭangkai ni leh mai se.

Sawrkar hnuai board leh corporation , etc. office building la nei lote’n kan hmunhma chhuahsan tur tam tak a chunga kan thai lante khi hi an luah lum thei ang a; tin, sawi leh sawi hnu, lilam turte pawh a awm nual turah ngai ila.

Assam Rifles ram chhuahsan tur hmun hman ṭangkai dan tur hi han rawt ve chhin teh u le; duhthu sâmte chu a thiang alawm maw le.

- Lalmalsawma @ Cisa, MV-183/1, Mission Veng, Aizawl