Thei rah ei theih lam chi phun uar ni se

Fur lai hian kum tin sawrkar hian thing phun beihpui a thlak ṭhin a, thing ṭiak chi hrang hrang hmun tam takah phun a ni ṭhin. Sawrkar Department hrang hranga thawkte pawh thing phun beihpui thlakin an thawk chhuak ṭhin a, mimal huan leh inhmuna thing phun pawh kan awm. Thing leh mau kan tichereu nasa tawh a, thing phun belh zel hi kan tih makmawh chu a ni.

Hetia thing kan phun belh zel lai hian thei rah thei chi lam hi kan thing phun zingah hian ka hmuh awm pawh ka la hre lo a, ka hmuh lohah thei rah thei chi lam an lo phun a nih chuan a ṭha khawp ang a, kan thing phun tam ber erawh chu rah thei lo chi a ni.

Ka lo vei ve ṭhin chu hetia Forest Depart­ment nena ṭang ruala thing kan phun ṭeuh ṭeuh lai hian mihringte leh sava leh rannung dangtena an ei theih chi thei chi hrang hrang hi phun uar zawk ta ila a ṭhat zawk ka ring ṭhin. Savate kan humhalh chhoh mek lai hian an ei tur theirah thei chi hrang hrangte hi phun uar ila kan ramah savate an lo pun phah bawk ang a, thil ṭha tak a nih a rinawm.

Forest Department lam pawh hian nakkum fur lo thlen leh huna thing phun beihpui kan thlak leh huna phun turin heng thei - theihai, lamkhuang, tengtere leh thei dang dangte hi lo kui ṭiak ṭeuh sela, hmun hrang hrangah phun ṭeuh ila kan ramah savate leh thei rah ei chi rannung dangte an lo pun phah ang a, mihring ei tur thei chi hrang hrang pawh a lo tam phah dawn a ni.