Aizawl khawpui kawng lunlai

Aizawl khawpui kawng hi khawlai mai pawh hi a pawi-mawhin a lun em em vek mai a. Mahse tawite a kan sawi ve duh chu Aizawl Temple leh Dak in pui inkar hi a ni.

Zing dar 9 vel
aṭang chuan tlaklam aṭangin Taxi leh City bus in Temple kawtah an han in chhawp chho zut zut mai a, chung mipui tam berte chu Vanapa Hall hnuaiah Dak inpui lam panin an innek chho mu mup a. Kawng a te si, motor lo chhuk thla a tam bawk si, mipui tan a him loin chetsual a hlauhawm hle a ni. Chutih laiin two wheeler leh motor a in park khat vek mai bawk si a, he kawng hi nilengin a lun a ni ber mai. Kawng hi a khuarin tuihawk a tling nasa viau bawk a, motor chil per hlau chung chungin fimkhur takin kan kal a, min han chil per hram bawk
ṭhin a. Kan sorkar mi pawimawhte hi helai kawngah hian an kal ve ngai lo em ni aw.... Nge an hai der zawk?

A dawt lehah chuan Aizawl Temple kawtah hian motor kawng mipuiin him zawka kan cross theih nan Zebra Cross hi awm ve se a va duhawm em. Kan taxi driver ṭhenkhat lah hi mi kawng kal zah der nachang hre miah lo an awm ve bawk si, chetsual palh te pawh a hlauhawm ṭhin hle mai.

Tin, tun hmaa zebra cross awmna ṭhin Supply Directorate office kawt te, Zodin Square, Assam Rifle Mandir kawtah te hian zebra cross ziak leh bawk se a va duhawm ve. Zarkawt leh Dak inpui kawtah te hian zebra cross hi dah belh leh a ngai bawk. Tun hmaa traffic lam hotuten taxi driver-te training an pek ṭhin kha pe leh ṭhin se, taxi driver-te hnenah zebra cross zah dan te thlengin zirtir an ngai a nih ber hi maw.

Bazar Bungkawna flyover (leihlawn) an siam mawlh mai hi a va huphurhawm em. Kea kawng kan kânna ṭhin kha an ping daih mai. September 12 (Monday) khan ruah a sur si, ka hmaah kum 70 chuang hmel pu hi a chho a, a kal hleithei miah lo. A chung zawl thlen dawnin a asthma a chhuak a, a buai hle. Kei a hnunga kal kum 70 mi khup ruh na tan pawh ka kal nawn tawh lo ang ka ti hial a ni.

AMC lam pawh hian hetiang leihlawn sang hi an siam dawn a nih chuan hospital road leh dawrpui phei inkar dawr pali vel hi lei se, tichuan zal deuhin leihlawn an siam thei ang a, upa lam te pawhin kan zawh ve thei tawh ang chu. A nih loh pawhin a hnuai kawng kanna tal hi ping lo se ka va ti em!

- F. Sangkhuma, Venghlui, Aizawl