Staff nurse lak leh a kaihhnawih

Hnathawk tur lak hi thil harsa leh hrehawm tak a ni. Lak aiin lak loh an tam fe zel a, lungawi aiin lungawi lo an tam zel tihna pawh a ni. Chuvang chuan hna lak dan leh kaihhruaina fel neih mai ni lovin zawm a pawimawh hle. Sawrkar hna lak dan chi hrang hrang a awm a. Direct recruitment (mi thar lak) te, promotion (kaisantir) te, Service regularization (hna tihngheh/ dahngheh) te, Limited Departmental Exam (thawklai zinga mi thiam bikte kaisanna tura a bika exam) kan tih te hi a tlangpuia hna ruak atana mi lak dan te an ni.

Promotion leh service regularization-ah te hian a teh fung lian ber chu service seniority (hna thawh rei zawng) a ni. LDE-ah pawh hian exam bei thei chin siamah seniority a pawimawh thei bawk. Direct recruitment-ah erawh chuan thawh rei tawh emaw, kum upat emaw, zirnaa lo pass hmasak emaw hi teh fung a ni lova, mi thar lak dan kaihhruaina hmanga teha a tling leh ti ṭha apiang lak mai tur a ni. Hna ruak a lo awmin engtia lak tur nge tih Recruitment Rules-ah chiang taka ziak a ni. Entirnan UDC hna a lo ruahin zaa engzat nge direct recruitment-a lak tur ni a, engzatnge kaisantira lak tur, engzatnge LDE a lak tur tih a awm vek a ni. By Promotion-a lak tur a nih chuan LDC hna lo thawh rei tawh dan (seniority) chu teh fung lian ber a ni.

Direct recruitment-a lak tur a nih erawh chuan University graduate chin, diltu written exam leh interview a ti ṭhate lak mai tur a ni. LDC thawk mek (graduate) pawhin direct-a lak turah hian a dilin a exam ve thei a, mahse LDC-a a lo thawh rei tawhna chu teh fungah a hman theih loh a, BA lo pass hmasak pawh chhuan theih a ni lo. Chutiang zelin a nghet lova thawkte dahngheh dan pawh sawrkarin a nei a. Contractual basis a thawk dahngheh dan te, Muster Roll-a thawk dahngheh dante pawh fel takin a awm. Hengah te pawh hian hna thawh rei zawng (seniority) a pawimawh.

Tuna Staff Nurse lak hi direct recruit-ment a lak a ni a. Kum 2013-a inkaihhruaina awm sa anga written exam leh interview hmanga lak an nih khan staff nurse thawk senior tawh lamten written exam neih an duh loh avangin harsatna a awm a nih kha. Chu an duh lohna chu Sawrkarah thlenin, Sawrkar chuan hrethiamin MPSC Staff Nurse Direct recruitment Rules awmsa chu hnawlin Staff Nurse-te chu written exam awm lovin interview hmanga lak tur tih a lo ni ta a ni. Chu dan chu hmangin tuna Staff Nurse lak hi interview chauh hmanga lak an ni ta a. Written exam hmanga in thlit fim a rem loh avangin thla khat chhung zet nitin interview neih a ni a, a hautak hle.

Kan sawi tawh ang khan direct a hna lakah chuan service seniority hman theih a ni lo. Amaherawh chu thawk senior-te duhsakna avanga interview chauh hman a nih hre rengin he hna zawrhna (advertisement) ah kum khat lo thawh tawh zelah mark khat zel pek sa an ni ang tih a ni. Hemi avang hian candidate tam takin mark engemaw zat nei sain interview an hmachhawn a ni. Hetianga mark in pek sa baka seniority kawngro sut tir leh zel chu direct recruitment atan chuan a dik (fair) lo mah tawh zawk awm mange tih tur chu a ni.

An thawh senior dan anga lak tur anga sawi leh beiseina lo awm hi tih hlawhtlin tur ni ta se, kha tianga rim taka interview leh, fresh candidates mi za tam tak koh buai kha a ngai hauh lova. Contract etc a thawh senior dan chu fel taka vawn a ni a, hahdam leh awlsam taka tih mai theih a ni.

A nghet lova ṭhahnem ngai taka ram tana lo thawk tawhte hi an zahawmin duhsak pawh an phu a ni thei e. Amaherawhchu, kan sawrkar hian a duhsaka a khawngaih tak tak a nih chuan hetianga direct recruitment, tlin lo chunga beih (compete) tir a, Dan leh inkaihhruaina fel tak awm sa ṭhiat bawrh bawrh lo hian Service regularization hmang hian dah nghet thei se an duhsak awm hle a ni. A ṭul a nih chuan Contract Employees Regularization Rules kan neih mek hi siam ṭhain emaw, One time relaxation (vawikhat atan a thlah dul) hmangin emaw, a tih theih zat (percentage) kum nga chhung ti tamin emaw an vai hian khung luh hram dan ngaihtuah se, kan thawktu senior ho hian an phu mai ni lovin Labour Law lam phei chuan a phut sak tlatin a lang.

Tunah pawh hian hetianga a nghet lova thawk rei tawh Middle School zirtirtu 70 chuang lai chu Court thupek angin Sawrkarin a dah nghet dawn tho si a. Nurse an nih avanga Direct recruitment-a kum bithliah pel tawh ngaihhna thiam (age condone), written test dan awmsa nuai bo leh interviewer-te zalenna chhuhsak a, MPSC pal bawrh bawrh lo hian kan Sawrkar chak tak hian kawng dangin kan Staff Nurse senior tak tak, hei chen tihdam hna thawka hun leh tha lo seng tawhte hi duhsakna a hlan thei lawm ni tih te ka lo ngaihtuah ve mai mai a. Tichuan, fresh candidate pakhatmahin an chuh pui hauh lo ang. Kei, Sawrkar hnaa tawn hriat nei lo ngaihtuahna hi a mawl mang lutuk a nih erawh chuan chhiartute leh thuneitute ngaihdam ka dil nghal e.

- Zosangliana Colney, MSVT