ANTHURIUM FESTIVAL
Kum sawm kaltaaṭanga kum tina hman chhoh ni ta Anthurium Festival hi a awmzia leh a nihna hre chiang tawk lo kan tam hle niin alang.
Ka hriat chin tlem azawng ka han sawi ve ang e.
Mizo pawh hi kan lo tam ve ta a ni ang, ze chi hrang hrang kan awmkhawm a, a hminga buai tawk, festival hmang tura kal duh lo laklawh te, Mizoram budget sawk hek emaw ti tlat te kan awm. Chutih rualin nuam ti a zawng-chhangthlak ti pawh tam tak an awm.
2010 kum khan a vawikhatna atan ka kal ve a, a hnuah chuan sawi nawn a ngai tawh lo, ka kal ta ziah. Tam tak kal loh chhan hi chu a hming vang hi a ni tak tak. Ṭhian ṭhenkhatte pawh hi ‘ralkhata a hminga buai buai lo hian vawikhat tal kal ve chhin ula’ ka ti
ṭhin. Kan Minister-in a sawi ‘A hming kan thlak daih te chuan Anthurium Festival a ni nang’ a tih hi a dik viau in ka hria.
Sawrkhar laipuiin State tinte hnenah tourist hip luh nan Festival hmanna tur kum tin sumfai a pe ziah a, a phut ang ngeiin Mizoramah pawh Tourism depart-ment kaltlangin chu chu Anthurium leh Ṭhalfavang Kut atan a hmang ṭhin a ni.
Ram changkang tehna pakhat chu khualzin (tourist) neih leh neih lohah a ni tih hria a, Central-in hetiang a buatsaih hi a lawmawm a, tunah a hlawhtlinna lang chho mekin heng ni-ah te hian hnamdang khualzin hmel pawh kan hmu tam chho ve tial tial a nih hi.
Kut phuahchawp tia ṭawngkam lo thlahdah maite zingah pawh hian sawrkhar laipuiin state min sponsored liau liau a ni tih hi hre lo kan tam ang. Mizo Kut kan tih deuh bik pathum nen hian ngaih fin loh a ṭha khawp mai. A buaipuitu department pawh a hran daih an ni e. State sawrkhar chuan Chapchar Kut bak lawm tur hian kan ram inrelbawlna in a la tlin lo mai zawk niin alang, theih nise ‘Mim Kut’ leh ‘Pawl Kut’ te hi han hmang vek ila a nawm dawn vei nen.
Sawichhiatna neuh neuh chhiar tur awm bawk te hian an thil hmuh chhun an sawi vawng hluai ni maiin ka hria; chu pawh zeldin thubawl a ang lek lek. Kumtin ka kal ziah a, rui lo hai loa mi chetla ka thlir ve ṭhin hian mawi lo uchuak a awm hi ka hmu meuh lo. Nuam ti taka hmang ni vek hian ka hmu ṭhin a, ruahsur ve ziah erawh chuan kar hnih vela sawn hlat nise aw tiin min ngaihtuah tir ziah.
Engpawhnise, kum a lo thar ang a, chunglamin rem a tih chuan hlim takin kan la hmang leh dial dial turah ngai ang.
- H Lalrinliana