MIZORAM LEH ASSAM RAMRI (POLITICS THLIRNA ATANGIN)

"I am hopeful that the border dispute between Mizoram and Assam will be permanently resolved  by March or later next year" 

- Satyendra Garg, Jt Secretary, Union Home Ministry.

Assam Sawrkar Official-ten Thinghlun, Phaisen, Saihapui V leh Vairengte min rawn tibuai / run a. Chumi kal zelah Union Home Joint Secretary lokalim Lailapur ah Mizoram Home Secretary leh Assam Home Secretary nen inbiakna an nei a. An ngaihtuah ber chu ramri bawra chengte leh State pahnih inkara inremna awma Peace & Normalcy thlen tir a ni. Keini Mizoram aiawh Home Secretary thu ken chu Vaihoten Mizoram lo lut tur motor an dante chhuah rawh se, tih a ni. Aizawl aṭangin MZP, MSU leh CYMA thlawpna lehkha motor lo lutten harsatna an tawk lovang, tih intiamkamna a ni zawk mah awm e, a keng a. 

Union Home Joint Secretary, Satyendra  Garg hi Aizawlah lokalin mi pawimawhte a hmu a, hetah hian "Mizoram leh Assam ramri buai lai hi nakum March thla emaw a aia tlaiah emaw kan chinfel theih ka beisei" a ti a. Hei hi National paper-ah te a lo lang a. Kei erawh chuan i ti ve mai mai a ni, my sir or unaupa ka ti deuh. India ram pumah Inter State boundary buai, lui tui inchuhna thubuai a tam hle, chungte chu buaina rei tawh state leh state inbiakna Joint Verification, Central sawrkar inrawlh Verification, High Court & Supreme Court thuthlen pawha rem theih loh pending a dah a ni deuh vek. PM Modi leh HM Amit Shah te ngei chi-al liahna State - Gujarat leh Rajasthan ramri Magath Hill inchuhna pawh a rei tawh hle, an chingfel thei chuang lo. 

Assam Sawrkar hian Official te hmangin ngatinge min rawn nek run tak chiam chiam le? Assam hi kum thar April bawra inthlang tur an ni a, BJP sawrkar CM Sonawal, Himanta te tan mipui hmasawnna lam sawi tur a vang hle. Economic dinhmunah 2018 chho aṭangin unemployment rate a sang lutuk a, Covid vanga State pawn aṭanga lo haw nuai 4 dawn an nei bawk a, "No work or not enough work - no income" dinhmuna election nei tur an ni si a. Educated un employment mi 2 lakh te eizawnna bul ṭan nan Rs 50000/- kan pe ang tihte an puang a. Assam sawrkar hi a mangang takzet a, Assamese ṭhalaite a hmin vak lo. Kum 2014 MP Election, PM Modi tiamkamna hlawhtling a vang bawk si a. 

Supreme Court order anga NRC kalpuia 1971 Census list hmanga foreigner zawn chhuah kalpuina pawh Central sawrkarin CAA a kalpuina vangin Assam BJP sawrkar hian a ti ṭhuanawp zui nghal a ni ber a. September thla Covid Lockdown hnua Assam sawrkar hotu CM Sonawal leh Himanta Biswa Sarma, Delhi kal pawhin Home Minster Amit Shah hmuin Assam NRC kalpui dan thu hi an manganna a ni, tiin an thlen a. Assam Political Party dang leh zirlai pawlten CAA duh lovin NRC ti ṭhuanawpah Assam BJP sawrkar an puh bet nghet tlat tawh bawk si. 

State sawrkar tinin Central sawrkarin State puihna tur sum a nei lo tih an hria, state sum harsatna thlen tur ni lovin NRC leh CAA chungchanga Assam mipui laka hmai phihfaina zawn a ngai a ni ber. 

5th October khan Minister Himanta Biswa hian Homeless/Landless te hnenah ram/ inhmun Patta Certificate sing chuang a hlan a. Heti hian 20l6 Assam BJP CM Sonawal sawrkar aṭangin ram/ inhmun 55000 an pekna a ni. Chung ram chu Assam ram pum/ ramri hrul thlenga mimalin Dan loa sawrkar ram an lo neih Bighas 13,362 sawrkarin a chhuh let aṭanga pek an ni. Tichuan, mimal ram chhuhsak letna chu rang taka kalpui zelin election hmain Assam Citizen ni si ram nei lo 1,00,000 chuang pek hman an tum thu Minister, Himanta hian a puang nghal a. 

9th October 2020 - Hailakandi DC Ambanmuthan MP leh Official dangten Thinghlun Pu John Zolawma thlam leh midang leilet an rawn khawih ta a. Phaisen, Saihapui V leh Vairengte an rawn chetna kha Assam Official-te chetna leh kaihhruaina vek a ni. A hruizen hnawr chelhtu chu Assam sawrkar Gwahati a ni.  An tum chu Mizoram chhung thlenga Assam Citizen vote nei tawh landless-te hnena ram pek a ni. Chuvang chuan tuna che velah Bengali Hindu mai ni lo Muslim ho pawh an che phur a, Mizote leilet leh khua an rawn bitum ta hial a ni. 

Civil lamah Mizoram dep Assam sawrkarin a enkawl, Forest Reserve chhungah Bangladesh Illegal Migrants, Vote nei tawh si NRC-in a hnawl tur tam tak an cheng a. Assembly election hmasa 2016 khan ramri bawrah BJP a che ṭha vak lo, MP 2019 ah erawh Silchar leh Karimganj a la a. Tunah hian BJP hian Illegal Bengali & Muslim Vote a khel hle tiin puh ang. 

Home Jt Secretary hian ramri chinfel nan nakkum March a tin zawn a, March-ah chuan Assam Election puan a ngai dawn a, ramri chinfel a theih loh tluk a ni. Assam-in an pawm duh a rinawm lo a, Mizoram an rawn la hek duai dawn a nih chuan thuhran,  Himanta te hian  ramri bula an voter's te hnenah sawrkar tharah Cabinet meeting hmasa berah tih ang velin, Central sawrkar behchhanin helai ramri bawrah hian election campaign auhla an hman a rinawm. 

Assam sawrkarin min puhna chu District Council hunlai 1957 bawr aṭangin Assam Forest chungah Leilet an nei khua an rawn din tih a la ni reng. Hemi thu hi Jt Secy Garg lokal tur hnenah khan hrilhin, Lailapur meeting-ah "Assam territory chhung Mizoram Police-in an luah, chhuahsan rawh se" min ti ta a. Assam Officials leh Civil-ten Mizoram dep hmun 4 ngawta unlawful taka an rawn chetna lam demna, Road Block Dan bawhchhiatna hawi a sawi lo. 

Assam Election hawi thlira Assam sawrkar lai advantage theihna tura rawn kal niin ka hmu.