COVID 19 HRILENG DONA ATAN 'FIMKHURNA'

COVID 19 hripui lêng mek chuan min chim chho zel niin a lang a. Kan inkai darh hluai loh nan eng nge a danna ṭha ber tur ni ang tiin kan ram hruaitute pawhin an ngaihtuah a. 26.10.20 aṭang chuan 'Covid 19 No Tolerance Fortnight' hman ṭan tur a ni ta. Hemiin a tum ber chu mitin fimkhur tura in zirtirna a ni ber awm e. 

Ṭhenkhat chuan Lockdown mai  pawh an duh mai thei bawk. Mahse tun ang dinhmunah chuan mitin fimkhurna hi kan hmanraw ṭha ber a ni ringawt mai. Lockdown pawh a chhunga chengte an fimkhur loh chuan awmzia a awm  lo. Ram hrang hrangin kawng hrang hrangin dan an tum a, an hlawhtling lem lo. Ramri khar te leh mahni in Lockdown pawh hmang lo ram an awm meuh lo awm e. 

Lockdown hi Covid 19 danna emaw umbona a ni lo a, tlema hrileng tihkhawtlaina a ni deuh mai. Chumi chhunga damdawi in leh hmanrua  lo thuam ṭhatna atan hman a ni ber ṭhin. Lockdown chu spring kawih beh ang a ni a, thlah hun hunah na takin a thawk leh tho ṭhin. Khawvela Lockdown rei ber chu South America ram Peru khu a ni a, thla thum chuang (March thla - June 2020) an in Lockdown a, sipai silai keng nen an veng a. An hlip chiah kha an pung chak chho ta lutuk a, tunah khawvel hrikai tam pakuana an ni. An ram ei leh bar (economy) an sawp chhe hle bawk. 

Chuvangin, kan India sawrkar Lockdown lo experience nasa tawh pawh hian hripui leng kara economy tluchhe mai thei vên a ṭul avangin Lockdown a phal mai lo pawh hi a finthlak khawp mai. 

Hetianga kan lo kai darh ve tan chuan kan Mizoram tana ṭangkai ber tur chu fimkhurna hi a lo  ni ta. Chung kan fimkhurna tur te chu sawi nawn leh ang:  

1. Social Distancing (midang hlata awm): Tumah hnaih loh tum tur. Feet ruk (6) emaw hlam khat dana awm tum tlat tur. Lenchhuah loh tum tlat tur. Puipunnaah tel miah loh tum tur. Mahni ina tawm tam a him ber. Tun ang hunah chuan chhiatni/ ṭhatni-ah phungthluk loh deuh mai a him ber. A bikin kum upa leh natna benvawn neite tân a ṭul lehzual. Mi biak tlem hi a him. Hnathawk tura nitin chhuah ngai tân pawh inven reng a ṭha. 

Hri vei zinga 10% - 15% vel chauh hi pu darh nasa (super spreader) an tih te hi an ni. A hrikai 70 - 80% hian pahnih khat bâk an kai darh lo niin mithiamten an sawi. Heng kâi darh nasatute hi hmun tina leng kual, titi peih leh hmun hrang hranga hnathawhna avanga kal kual ṭhin, mi fel, zuanzang an ni  tlangpui. 

2. Hmaituamna (Face mask): Loh theih loha chhuah pawhin Facemask vuah ngei ngei tur. Facemask hi ni khat dana suk theih loh chi a nih chuan, a thar hman zel a ṭha - pakhat Rs 10 man vel a ni a, kuhva man ai pawhin a tam lo a nia! Kut tihfai hmasak loh chuan hmai khawih loh tur. Facemask hma lam hi khawih loh a him. 

3. Kut sil: Kut hi a zing thei angin sahbawna sil ṭhin tur. Kut sil a rem loh chuan Hand Sanitizer  hman reng tur a ni. 

Hetianga kan fimkhur ṭheuh chuan hri in kai darh zel tur hi kan titawp thei zawk ang. Covid 19 vei zinga nitin hnathawk doctor leh nurse leh thawktu dang pawhin hri an kai mai loh chhan pawh hi an 'fimkhur' vang a ni. Chuvangin, naktuk aṭang chuan mitin fimkhur lehzual ila, he hripui inkai darhna zel tur hi kan dang chat thei ngei ang. 

Fimkhurna hi tuna kan hmanraw neih ṭhat ber a ni e.