Vairengte khawtlang an chhuanawm

Vairengte khaw­tlangin Lailapur mite an hnawh kian dan kimchang kha ngun takin ka lo zir ve a. Kha thil thlen dan leh an beih let dan kha hnatlang anga chhuak khawm si khan huaisen takin fing tak siin an che a, Vairengte khawtlang zarah Mizo­ram chu mualpho lovin kan awm ta hi a lawm­awm a, Vairengte an chhuanawm takzet zet. 

Thinghluna Mizo Pa thlam ngei Assam-in an suamsam duh tawk lova diriam taka an hal khan Mizo zawng zawng thinlung chhung a na a ni. Kan ram chhunga kan pawm mai pawh ni lo, Mizo pain Mizoram chhunga chhiah a pekna hmun ngei leh thlam ngei pawh a va neihna hmun chhun pachangah an rawn hal siah siah kha a ni a. Khatia titute kha Assam sorkara DC hovin Assam Police an ni a, kan va han thangtlawm tak em ve le.

Mizoram sorkar pawhin a hre ve a, Assam lamin an tih chhiat tur ang ang an tih chhiat tawh hnu mai pawh ni lo an hal vek tawh hnuah Assam Police va kap lo tur tih chiang takin Police an va thleng ve a. Assam lam haw vek tawh hnuah khan position an va la a, an silai tin lai te pawh thlalak a han awm a, a va han tlai tawhin a va han lemchan thil tih em ve le. 

Kan Chief Secre­tary hlui Pu M Lalman­zuala'n, "Drama a ni e, drama," a tih ti chiangtu atan Mizo­ram Police lamin Assam hmachhawn tura inpeih sa ata an ding kha a hma lam aṭanga thlalak a darh a, a hmalam aṭanga an lak chuan thlalatu cameraman kha Assam lam hnaiah a awm tihna a ni a, a hlauhawm lovin a ralmuang tihna a ni nghal bawk thei. 

Kah tur awm lova kan police ten Assam lam hawia an silai an tin kha Social Media lamah chuan, "Police in ramri an veng," tia darh si lovin, "MNF sorkar huaisenzia," tih te a han ri chhuak ta a, a va han zahthlak ṭhin em mawle. 

MNF leh Congress leh ZPM lam sawina hun a ni lo. MNF anga sawi dawn phei chuan khami tuk khan Mizoram sorkar lamin FIR an thehluhna kha Kanhmun Police Station a ni. Kan­hmunah thlam hal tirtu Assam DC kha a lo kal asin, MNF or Mizoram sorkar chuan a lo man em? Man teh suh e. Mamit DC nen an inkawm a ni. 

Ramriah silaiin kan tin a, thlam haltu chu Kanhmunah a meeting a nih chu! Drama a ni e drama, tih kha kan hre chhuak lo thei lo. 

Saihapui V ah kan Police te awm lai ngeiin Vaihovin kan Covid 19 Duty Post min ṭhiah sak vek a, Lailapur Vaiho lahin Vairengte daia kan Police duty an vawm ngam bawk a nih chu mawle! Sorkar Police chu vawm ngam mahse Vairengte khawtlang an ngam ta lova, Vairengte khawtlang kha MNF, Congress, ZPM, BJP lam sawi lovin Vai vel turin an chhuak a, hneh­na an chang ta a ni. 

MNF an huai, Cong­ress an huai zawk, ZPM hi an huai ber ang tih sawina hun a ni lo a, Vairengte khan political party sawi lovin ramri an humhalh a nih kha. 

Party worker hovin thu lo inchuh ve tawh lovin Vairengte khaw­tlang chawimawi mai hi kan zavaia tih tur chu a ni.