PU LALDUHOMA HEKNA HI

Pu Lalduhoma hèkna hian sawi a hlawh hle a, tlai khawhnu-ah kan han sawi zawm ve dawn a ni.

1. Kan lo hriat ve dan chuan hetiang thilah hian hèk ngai a awm a nih chuan hèktu tur Legislature party-in a ngaihtuah phawt a, Petitioner atan pawh an Legislature party leader emaw, Secretary emaw an hmang ṭhin tih a ni a. Hèk ngai a nih chuan mi pakhat a titu awm berin hèkna thu theh lût se, a tâwk mai a. Tuna an tih anga a tam hlel hlel ti niawm taka mi pariat, a hnua mi dang pali-ina an han belh leh hi chu a ṭul vak lo va. An inring tâwk lova, an tam deuh chuan rin an kai an rin vang nia ngaih theih a ni zawk.

2. Dan kalha thil tih hi an huat vang tak tak a nih chuan kan sorkarte hian anmahni dan siam ngei pawh an bawhchhe fo va. RESTRICTED TENDER phei hi chu Sapṭawng takin, “in letter and spirit”-a dan bawhchhiatna nasa tak leh a hnua ram leh hnam tana nghawng ṭha lo tak leh hlauhawm tak nei a ni a. Hetiang zâwk te hèk ahneka a lian ber ber a bawhchhetu-a an ṭang si te hi a mak a. Tuna an tihdan hi chu dan bawhchhiat ngaihmawhna aiin a bawhchhetu nia an ngaih tihmualpho tumna leh duhna ni zawkin a ngaih theih a ni. State pachhe bera mite Rawngbawltute'n State hausa pui puia mite Rawngbawltute aia hlawh sâng leh hamṭhatna dang danga uchuak tak inpèkna dan siamte hi, dan bawchhiatna aia huatthlala zawk leh nghawng ṭha lo tak nei a ni zawk.

3. Dan bawhchhiatna a awm a, Court-in emaw, thuneitu dangin emawa a hremna dan a ngaihtuah chuan, leh lam leh lam aiawha dan hremite'n dan ena hrem an nih theih dan emaw hrem theih a nih loh dan emaw an sawi a, chumi hnuah thuneitu chuan thutlûkna a siam ṭhin a ni ngai a. Kan MLA 12-te chuan thuneituin dan a hre tâwk lo ang ti niawm takin dan hrilhfiah nan thu tam tak an sawi thung a ni. Heng thute hi sawi ngai a nih chuan hèkna thu an theh luh hunah khan sawi zawk awm tak a ni.

4. Thutlûkna siamtu chu thuneitu(Speaker) a ni a. Sawi tur nei chuan a hnena sawi tur a ni a. Kan MLA 12-ten an thiamthu mipuite hnena an sawi daih hian ṭangkaina a nei lo. Insawithiam an tumna mai ni zawka a lan avangin rin an kai loh phah zawk thei a ni.

5. He thil ina kan ram politics-a thil duhawm lo tak a rawn lantir hi a ngaihmawhawm zawk tak chu a ni a. Kan politician, a bíkin kan hruaitu liante hi dawt sawi chíng, an dawt sawiina a daih loh huna an dawtsawi sawi mam inel nana hmang an nih thu kan sawi fo tawh ṭhin a. Kan MLA Sawmpahnihte 12 (Lal Isua zirtirte zât chiah an nih hian awmzia a nei lo turah ngai ila, a neih palh hlauh chuan an zinga mi pakhat Juda Iskariot-a a chan a ngaih hmèl si ang a)–in thiamthu sawi ngai an han ti leh mauh mai hi, dawtsawi sawi mam bakah thudik nia an ngaih pawh mi dangin dik lo nia an ngaih chuan sawi mam a ngai leh ta tlat hi a ni. Tichuan an nihna sawifiah nan chuan, dawtsawi, dawtsawi sawimam, thudik nia an ngaih pawh, mi dangin dik lo nia an ngaih chuan sawi mam, tih a ngaizui dawn ta a ni.

6. MLA 12-ten press conference meuh ko-in, an thil tih chu an mahni thu ngeia an tih a nih thu leh ti tura ‘pressure’ an dawn miah loh thu an sawi a. Hetia press conference meuh an koh tak hnuah hi chuan CM beng pawh a thleng ngei tawh tur ah ngai ila, mahse a ni chu a la ngawi tlat chu a la ni si. A leh lamah chuan ramri buaia kan buai lai a, IR duty te an in-withdraw a hriat ve miah loh chu MZP te hmaah telephone-in CS leh Home lam chang tute a bezui nghal tih thu kan hre leh lawi si. An withdraw thu a hriat ve leha an awmna hmun pangngaia awm leh tura thutlukna a siam thei ang khan Pu Lalduhoma hèkna thu pawh hi a hre ve ngei tawh niin a lang si a, thutlûkna chu a eng zawng pawha siam ve tawh awm a ni. Kan sawi tâk ang khian hetiang thil pawimawh hi ama hova rèl a, ṭul a nih chuan amah ngei chu hèktu tur dik tak pawh chu a ni si a.

7. Kan ram hruaitu lûte hi rilru tè tak tè pu-a, an chutiang rilru tè tak tè chu an mi huatzawngte chunga hrithla ṭhin an ni tih a taka hria a, tuar tawh ṭhintu ka ni a. Pu Lalduhoma pawh hian chutianga ka tawrh ṭhin chu a tuar ve dawn te pawh a ni ang e.

DIKNA hi Pathian thu-ah leh khawvel thila kan inrelbawlna pawha pawimawh ber a ni a. Chu chu kan tlakchham ber a ni fo mai hi kan buaina ber chu a ni a. Eng tikah nge kan  HNÁR (nose ni lo, source) hi a fím ve theih dawn le? A fím hma chuan a mawng lam chu kan nu but but zel mai dawn a ni si a.