World Tourism Day pualin aw...!

World Tourism Day vawi 36 na chu kumin (2016) September 27 hian kan lo hmang dawn ta reng mai a. He hun ropui tak thleng tur hian UNWTO General Assembly, 2003 chuan kan ram ṭhenawm Thailand ram chu a ruat a, Bangkok khawpuiah nghah a ni dawn a ni. He ni pual hian Tourism awmzia, a pawimawhna leh kawng hrang hranga a thawhhlawkna (contribution) te sawiin Mizorama Tourism Industry a ṭhan theih nan ngaihdan tlem i han sawi nghal bawk teh ang aw...

Tourism hi mawlmang leh awlsam taka kan hrilhfiah dawn chuan 'chhan leh vang hrang hrang avanga hmun pakhat aṭanga hmun danga zin chhuah' hi a ni kan ti thei awm e. Kan zin chhuah hian tourist kan lo ni ta tihna a nih chu. Hetih lai hian Mizotena 'khualpang zin' kan tih ang ni lo deuh hian tourist ni tur chuan tum nei rana kan zin chhuah a ngai a, chu kan zinna hmunah chuan darkar 24 tal kan cham tur a ni a, mahse kum 1 aia rei erawh kan cham thiang lo thung. Tourism hi hlawm lian pui pui pathumah ṭhen a ni a, chungte chu:-

1. Inbound Tourism - ram pawn aṭanga ram danga zin luh

2. Outbound Tourism - ram chhung
aṭanga ram pawna zin chhuah

3. Domestic Tourism - mahni ram chhung veka zin kualte hi an ni.

Outbound tourist leh Inbound tourist-te hi International tourist tia hriat an ni.

Tourism hian khawvel hmun hrang hrang a cheng te, hmel leh pianphung inang lo tak tak te, ṭawng, sakhua leh hnam nunphung inpersan tak takte leh finna leh thiamna inang lo tak takte hmun khatah min hruai khawm a, chu chuan hnam dangte nunphung leh tihdan phungte hriatthiamna min siamin heng hnam hrang hrangte inkarah hian in unauna min siam a ni. Thiamna nasa tak min pe bawk. Kan zin chhuahna apiangah sum tam tak hman a lo ngaih ṭhin avangin ram tam tak sum leh pai dinhmun a chawikang nasa hle bawk. Heng khawtlang in unauna, hnam ziarang humhalhna, thing leh mau nungchate humhalhna leh ram sum leh pai dinhmun chawikanna kawnga a thawh hlawkna te hi hre rengin kum 1980
aṭang khan United Nation World Tourism Organisation (UNWTO) chuan kum tinin September ni 27 hian World Tourism Day hi a lo hmang tawh ṭhin a ni.

He ni hi khawvela remna leh muanna a awm theih nan te, sik leh sa inthlak danglam thut thei laka invenna te leh thil pawimawh hrang hrang inzirtirna niah hman ṭhin a ni. UNWTO General Assembly, 2003 chuan he ni thleng (host) tur hian khawpui hrang hrang a lo ruat tawh ṭhin a, kuminah hian kan sawi tak angin Bangkok khawpui chuan a thleng dawn a ni. World Tourism Day vawi 36-na theme atan "Tourism for All-Promoting Universal Accessibility" tih thlan a ni.

Khawvel hmun hrang hranga zin veivak mi lut leh chhuak zat te, an zin veivahna leh a kaihhnawiha sum che velte hi uluk taka chhinchhiah leh vawn fel a ni. India ramah chuan The Market Research Division Of The Ministry of Tourism hi heng information pawimawh tak takte vawngtu a ni. Heng tourist-te chetvel dan leh a kaihhnawih tam tak hi Foreign Tourist Arrivals (FTAs), Foreign Exchange Earnings (FEEs), Tourism Satellite Account, etc te hmanga fel taka vawn a ni ṭhin. Heng aṭanga a lan dan chuan nikum 2015 khan Foreign Tourist mi 80.27 lakh an awm a, kum 2014 nena khaikhin chuan a ṭhanna hi 4.5% a ni. FEE aṭangin Rs. 135193 core hmuh chhuah a ni bawk. Kum 2012-13 chhung khan 6.88% lai Indian GDP-ah a contribute a, hemi hun chhunga India ram chhunga hna lak thar 12.3% zet tourism industry hian a siam bawk.

Mizoram State bik han sawi ila, Tourism Department hi Department naupangte a la ni na a, kum 2012-13 chhung khan Rs. 680.70 lakh Revenue Domestic Tourist leh Foreign Tourist
aṭangin a hmu. Tourism Department hi Mizoram sawrkar hnuaia Department
ṭhang duang ber pakhat a ni mek a, tunah hian Tourism Department hian Tourist Lodge enkawl lai 39 a nei mek a ni.

Kan sawi tak te aṭang khian Tourism Industry pawimawhzia chu kan hre thei mai awm e. He Industry hi a ṭhang reng a, hei aia nasa taka ṭhang tura beisei a ni bawk a, chu vang chuan he Industry aṭang hian hlawkna tak tak kan hmuh ve theih nan keini Mizote pawh hi kan inher danglam ve a ṭul ta viau. Mizoram hian tourist-te hip turin theihna leh chakna tam tak a nei a, heng a 'ro phumruk' te hi hai chhuah dan kan zawn thiam a ngai ve ta. Kan ram boruak thianghlim tak te, thing leh mau leh nungcha mawi tak tak te, Mizo khawtlang nun 'inpawh taka chen ho dial dial na' te leh thildang tam tak hi khualzin hip tura kan pho chhuah thiam a ngai ta.

Tourism lama kan u en ṭhin Sikkim te hian Mizoram neih loh thil dang a nei tam bik vak lo, heti khawpa Tourism Industry-a an ṭhan chak chhan chu an thil neih an hmang ṭangkai thiam a ni mai. Mizote chuan tourist hip nana hma kan lakna chi hrang hrangah hian kan 'Mizo na' hliahkhuh khawpa 'changkan' kan tum ṭhin a, hei hi thil pawi tak a ni. Tourist-te hian kan nundan leh nihphung (custom and culture) hriat an chak ber a ni tih hi kan theihnghilh fo ṭhin. Engvang nge kan Chapchar Kut te leh Anthurium Festival te hian ram chhung leh pawn tourist-te a hip hleih theih loh laia Hornbill Festival (Nagaland) lemin tourist tam tak a hip tih te hi kan zirchian a ngai tawh takzet a ni.

Mizo mipuite pawhin hnam dangte kan 'khawdang sial' en tlatna thinlung pawh hi kan paih bo a hun. Heng hnam hrang, sakhua hran nei leh nunphung hran neite nena kan danglamna hi a ṭha zawnga kan pawm thiam a pawimawh. Mizo te hi rual pawl thiam, midangte chunga ṭhat chhuah ṭhin hnam kan nihna hre reng chunga hnam dang tourist-te hi kan lo dawnsawn thiam a hun ta. Kan 'hospitality' hi heng khualzin ho lo zawrh theih tur kan neih zinga kan neih hlu ber a ni tih hre reng ila, ram leh hnam hre reng chunga 'hospitable' thiam dan erawh kan zir a pawimawh ang. Sawrkar hian hma nasa takin la mahse chung hmalakna hlawhtlinna tura pawimawh ber chu keini mipuite hi kan ni tih hre reng chungin kan ram mawina leh hausaknate hi pho chhuak turin ṭan i han la teh ang u.

Mizoram chhungah pawh Tourism Fulltime Degree Course hi ICFAI University lamah a zir theih a, Bachelor of Hospitality and Tourism Management (BHTM) chu Bachelor of Hospitality Management(BHM) leh Bachelor of Travel and Tourism Management (BTTM) ah ṭhenhran a lo ni ta a ni.

- Lalpeklawmawma

Bachelor of Hospitality &

Tourism Management

ICFAI University, Mizoram