COPTA Dan vs MLPC Act
MLTP Act thlak a nih dawn a, MLPC hman tura tih a nih chhoh lai khan khauh taka dân kenkawh kha thuneitute lam chuan an tum hle mai. Tichuan an hmang chho a, a tir chuan an ṭang ve khawp mai a, zu tuih avanga hrem, vantlang hmun tifaite kha kan hmu a, sorkar pawhin a theihtawp a chhuah a nih hi ka ti hman.
Anthurium Festi-val kan han hmang chiah a, MLPC Act chu engmah a nih lohzia a lang chiang hle. Puipunna hmuna zu rui hmuh tur an tam mai bakah, a remchanna lai hmuna zu in hmuh tur an awm nual mai. Sorkar mi pawimawh an tam a, dan kengkawhtu lam pawh an ṭhahnem viau laia khatianga an awm hmuh kha chuan dan hi kan siam ve mai mai a ni tih a tilang chiang hle.
MLPC Act hman hma aṭang tawh khan COPTA dan hman a ni tawh a, a khât tawkin puipunna hmunah te mei zu an awm leh awm loh an check reng a, hetianga dan awm, a hlawhtlin theih nana theihtawp an chhuah hi a lawm-awm hle.
Mei zuk khuah-khirh-na dan hi khawng taka kenkawh zel a ṭha a, ṭhangthar tam takin meizial an zuk loh phah a ni. Mizorama thunei ber chhungkua aṭanga tuipui a ni bawk a, COPTA dan a hlawhtlin theih nan hma pawh an la chak a, chanchinbuah pawh meizuk phal lohna hmuna meizial zu man an nih thu kan hmu châmchi a ni.
COPTA dan a hlawhtlin nana theih-tawp an chhuah ang hu tal hian MLPC Act a hlawhtlin theih nana ṭanlak hi a lawm lo. Thuneitu ber chhungkua aṭanga tuipuitu a neih loh vang te, rorelna fawng chelhtuten an duh ve vangte pawh a ni ang a, tih tur âwm ang hialin kenkawh ṭhat a ni lo hle. Phal lohna hmuna mei zu kan vai peih ang tal hian MLPC Act hi kenkawh ni se la a va ṭha dawn em. Sorkar office-a office kai hun chhunga zu in leh ruite hi MLPC Act kengkawhtute hian vai ve rawh se. Chu bakah bazar hmun leh puipunna hmuna zu in leh rui an awm em tihte hi zawng ve rawh se.
Sorkarin hman deuha zu aṭanga chhiah an lak aṭanga sum a hmuh zat a tarlang a, a tam hle mai. Chutihlai chuan sorkar hnathawk, zu avanga a taksain a tawrh a, damdawi hmanga enkawl an ngaih aṭanga sorkarin sum a sên zat hi a tam ve hle ang. Zu avanga sorkar hna-thawk Medical Reim-bursement Bill hi eng-zat tak ni ve ang maw?
- Ramropuia