Kohhran hlimna hi kristian nundan tur a ni ber em?
Kohhran lam kan tuipui lai tak hi rem-changah kan la teh ang. Hmar lam kohhran, Kelkang kal chin chu hlim takin hun an la hmang thei a. Zai a tuiin Missionary pawh an chhuak ta nual mai.
Upa leh Pastor rual tân hei hi a ni lawm ni kan duh, tiin an tân chuan hun nuam tak a ni ngei ang. Zai hnam kan nia kan tih rual hian da hnam kan ni kan ti duh hauh lawi lo va!
Naupang aṭangin ṭan teh ang. An inkhawm-pui zo a, kawr thar nen mawi takin chang an sawi a. Nuam an ti, nu leh pa pawh an hlim.
Keini naupan lai erawh a dang si. Nu leh pa ten Bible milem chanchin ziakna min lei sak a. Davida chanchin te, Solomon-a chanchin te, Zawlnei chanchin te, Ruthi chanchin etc kan chhiar a, kan nun nghet taka kaihhruaiin a awm ṭhin. Chu chu Bible kan ngainat chhan pawh a ni. Kan naupangte hi a hlim zawng an hlim, mahse an nun kaihruaitu tur ber Bible erawh an ngainain an hre viau lem ta lo!
Chu chu puitlingah rawn kangkaiin harhna chu lam hlimna emaw kan ti ta a. Mi a harh kan tih hian a sual a bansan tihna a nih chianzia chu Welsh leh France ram harhna a thlen khan Tan In a ruak! Harhna chuan ringtu ṭhang mek nunah ngialnghehna a thlen tur a ni.
Upaten tunlai kan kohhran kan ro an tih chuan an zai boruak a chhia tih an sawina mai a ni tih kan hria em? Davida kha a hun laia mi hlim lo ber, a zai hla lah lungchhiatthlak tak tak ni mah se, a da ve ngai tlat lo. Zawlnei nun kha hreawm tak a ni, Jona kha a da zuai a, midang tumah an dak kan hre lo!
Pentikos nia harhna a lo thlen khan an
ṭawngṭai a, keini chu kan lam mup mup hian kan lawm êm êm a. A nunah harsatna a lo thleng ta a, lam pawh a nuam a ti lo ta a, a da ta emaw kan tiin amah pawh chu a inringhlel ta mai a! Chu chu Zoram kristian nun a ni tih camping aṭang hian a chiang lutuk!
A lam a lam a, Bible erawh a ngaina chuang si lo. Ṭhalai thil-tih tam ber chu pawl budget tlin tuma pawisa thawhchhuah dân ngaihtuah a ni, a dawth chuan hla zir a ni. A huhova ṭawngṭai nuam ti fianrial ngaina erawh za-a 10 pawh an awm leh si lovang. Chu chiah chu nu pawl leh pa pawl kaldan pawh a ni. Budget tlin hi pawl dinchhan emaw kan ti fur bawk!
Miten i nunah eitur an hmu tur a ni.
- Lalremliana Pachuau